Dağlıq Qarabağla bağlı danışıqların növbəti raunduna start verilir. Budəfəki təşəbbüsü ABŞ götürmək istəyir. ABŞ Prezidentinin milli təhlükəsizlik üzrə müşaviri Con Bolton Azərbaycan Respublikasının xarici işlər naziri Elmar Məmmədyarov və Ermənistanın xarici işlər naziri Zöhrab Mnatsakanyanla görüşəcəyini bildirib. Bu barədə o, özünün “Twitter” səhifəsində yazıb:
“Azərbaycan və Ermənistanın xarici işlər nazirləri arasında dialoqun davamına imkan yaratmaq üçün onlarla görüşü səbrsizliklə gözləyirəm”.
Onun sözlərinə görə, rəsmi Vaşinqton regionda sülh məsələsinin irəliləyişində kömək göstərməyə hazırdır.
İyunun 20-də baş tutacaq görüşun müsbət nəticəsilə bağlı ümidlərin az olduğu qənaəti hasil olur. Çünki sözügedən görüş Ermənistanın açıq təxribatları və sülh danışıqlarını pozmaq cəhdi fonunda baş tutacaq. Son günlər ərzində biz təmas xəttində ermənilərin açıq şəkildə törətdikləri təxribatları görürük. Danışıqlar prosesinin aktiv fazasında onlar ordumuzun mayorunu snayperdən açılan atəşlə öldürdülər. Sonra isə daha bir əsgərimiz şəhid oldu. Ermənistanın müdafiə naziri açıq mətnlə dedi ki, Azərbaycan əsgərinin öldürülməsinə göstərişi şəxsən onun özü verib. Hətta həmin əmri icra edən erməni əsgərini şəxsən mükafatlandırdı. Eləcə də Ermənistan rəhbərliyinin verdiyi bəyanatların ruhundan hiss edilir ki, onlar hər vəchlə sülh prosesini ləngitməkdə maraqlıdırlar. Digər diqqətçəkən məqam isə bu görüşə ABŞ-ın baş diplomatı kimi tanınan dövlət katibi deyil, Boltonun vasitəçilik etməsidir. Adətən belə formatda olan görüşlərə həmsədr ölkənin xarici işlər nazirləri vasitəçilik edirlər. Məlumdur ki, Boltonun ötən il münaqişə zonasına səfəri olub. Hər iki ölkə rəhbərliyi ilə təmasları baş tutub. Tərəflər arasında görüşün məhz Boltona həvalə olunması nəyin əlaməti sayıla bilər?
Nəzakət Məmmədova: “Tramp administrasiyası öz Cənubi Qafqaz siyasətini “qırğılar”a həvalə etməklə Rusiyaya və İrana bundan sonrakı siyasətinin sərt olacağı mesajını vermiş olur”
Politoloq Nəzakət Məmmədova “Bakı-Xəbər”ə açıqlamasında bildirdi ki, ABŞ Cənubi Qafqaz regionu üzrə prosesləri idarə etməyi Prezidentin milli təhlükəsizlik müşaviri Con Boltona həvalə edib: “Bolton ötən ilin oktyabr ayında regiona səfər edib mühüm mesajlar verməklə, ABŞ-ın regiondakı proseslərdə fəal iştirakçı olmaq niyyətini ortaya qoymuş oldu. Dövlət katibi Mayk Pompeoya deyil, milli təhlükəsizlik müşaviri Con Boltona bu məsələlərin həvalə olunmasının bir neçə səbəbi ola bilər. Əvvəla Tramp administrasiyası öz Cənubi Qafqaz siyasətini “qırğılar”a həvalə etməklə Rusiyaya və İrana bundan sonrakı siyasətinin sərt olacağı mesajını vermiş olur. Pompeo və Bolton eyni düşərgəyə - “qırğılar”a mənsubdurlar və Cənubi Qafqaz regionunun o düşərgənin nümayəndələrinin kurasiyasına verilməsi ABŞ siyasətinin xarakterini göstərir”.
Politoloqun sözlərinə görə, ABŞ indiyədək Sayrus Vensdən başlayaraq regiona zaman-zaman öz missiyalarını göndərib və hazırda bu missiyanı davam etdirir: “ABŞ müəyyən regionlara təcrübəli diplomatlar təyin etməklə uğurlu xarici siyasətini təmin etmiş olur. Məsələn, "məkik diplomatiya"sının banisi Kissincer uzun illər Yaxın Şərq siyasətini həyata keçirən aparıcı fiqur olmuşdu. Cənubi Qafqaz isə siyasi şəraitə və geosiyasi mövqeyə görə mürəkkəb regionlardan hesab olunur. Belə ki, burada xidmət etmiş diplomatlar, səfirlər sonradan, bir qayda olaraq, dünyanın qaynar bölgələrinə təyinat alırlar. Boltonun təyinatı da ABŞ-ın regiona marağının artdığı indiki dövrdə təcrübəli diplomatı təyin etməklə prosesləri uğurla idarə etmək planlarından xəbər verir”.
Nəzakət Məmmədovanın sözlərinə görə, onun Putinlə sərt polemikaları, Paşinyana ultimativ xarakterli göstərişləri də Boltonun Moskva və Tehran arasında sıxışmış bölgədə çevik, ağıllı, fövqəldövlətin maraqlarının təmin edilməsinə yönəlmiş siyasət həyata keçirəcəyini deməyə əsas verir.
Məhəmmədəli QƏRİBLİ
