22/07/2019 04:07
728 x 90

Fransa məhkəmələrində məğlub olmuş erməni lobbisi məhkəmə demarşlarının ikinci mərhələsinə başlayır...

img

Məlum olduğu kimi, Fransa məhkəmələrində Qarabağdakı separatçı rejimlə bu ölkənin şəhərləri arasında imzalanmış “dostluq xartiyaları”nın ləğv edilməsi prosesinə start verilib. Fransanın Serji-Pontuaz məhkəməsinin Arnuvilin qondarma Dağlıq Qarabağdakı Şeher inzibati bölgəsi ilə “Dostluq haqqında xartiya”sını ləğv etməsinin ardınca Qrenobl inzibati məhkəməsi tərəfindən də bənzər qərar qəbul olunub.

Qondarma separatçı erməni rejimi ilə bağlanmış “dostluq müqavilələri” hüquqi cəhətdən ləğv olunsa da,  bəzi Fransa məmurları bunu qulaqardına vurmaqda davam edirlər. Erməni KİV-inin verdiyi məlumata görə, həmin şəhərlərin bəzilərinin merləri məlum qərara sayğı ilə yanaşmayacaqlarını deyirlər.

Valans şəhərinin meri, Rona-Alpı regionunun vitse-prezidenti Nikolas Daraqo bəyan edib ki,  Qrenobl məhkəməsinin Xankəndi ilə “dostluq xartiyası”nı ləğv etməsinə rəğmən biz  “Artsax xalqı” ilə dostluq münasibətlərimizi davam etdirəcək və bu “ölkə”nin öz “müstəqilliyini” qoruma səylərini dəstəkləyəcəyik. Fransız mer məhkəmənin bu qərarından təəssüfləndiyini bildirib.

Şuşa ilə “qardaşlaşan” şəhərlərdən birinin meri Marlen Mur isə bildirib ki, həmin qərardan yuxarı instansiyalara şikayət etmək niyyəti var.

Göründüyü kimi, Fransa məhkəmələrindən fərqli olaraq, həmin ölkənin məmur kontingentində erməni sevgisi açıq özünü büruzə verir. Onlar sona qədər bu mübarizəni aparacaqlarına dair söz verirlər. Bunun qarşısını almaq üçün Azərbaycan hansı hüquqi mexanizmlərdən və diasporumuzun dəstəyindən necə istifadə etməlidir?

  • Samir Adıgözəlli: “Niyə bizim müxalifət və ya xaricdə yaşayan müxalif mövqeli şəxslər bu məsələ ilə bağlı mövqe ortaya qoymur?”

Aktiv diaspor fəaliyyəti ilə məşğul olan İctimai-Siyasi Proseslər və Beynəlxalq Əlaqələr Mərkəzinin sədri (İSBAM) Samir Adıgözəlli “Bakı-Xəbər”ə bildirdi ki, bu məsələdə təbliğata güclü önəm verilməlidir: “Bu, Azərbaycan üçün böyük qələbədir. Sadəcə, dinamikanı saxlamaq lazımdır. Ermənilərin sakitləşmək istəməməsinin səbəbi aydındır. Çünki onlar olduqca güvəndikləri və diasporlarının güclü təşkilatlandığı bir ölkədə acı məğlubiyyətə düçar olublar. Bilirlər ki, bu, Fransanın digər şəhərləri və dünyanın başqa ölkələri üçün də presedent rolunu oynaya bilər. Biz bilirdik ki, Fransadakı məmurların arasında çoxlu sayda erməni və erməni təsiri altına düşənlər var. Separatçı rejimlə əməkdaşlıq edən, müqavilə bağlayan yerli ərazi subyektləri təsadüfən seçilməyib. Erməni diasporu seçib məhz ermənipərəst merlərlə bu işi görüb. Təbii ki, bunun müqabilində onlara hansısa ödənişlər də edilib. Hətta əminliklə deyə bilərəm ki, həmin merlərin seçilməsinə belə, erməni diasporu təsir etmək gücündədir. İstisna edilmir ki, onlardan bəzilərini məhz erməni diasporu dəstəkləyib mer edib. Onların müqaviməti yersiz və perspektivsizdir. Çünki məhkəmə tam ədalətli, qanunlara söykənən qərar verib. Məhkəmənin qərarını isə hay-küylə, şantajla dəyişmək mümkün deyil. Fransanın yuxarı instansiya məhkəmələri qərarı qüvvədə saxlayacaqlar. Çünki onu ləğv etmək üçün heç bir qanuni əsas yoxdur. Amma bu məsələdə bütün dünyadakı Azərbaycan diasporu fəal olmalıdır. Biz aktiv şəkildə Fransa məhkəmələrinin ədalətli qərarını alqışlamalıyıq. Belə dəstək aksiyaları bütün şəhərlərdə keçirilsə yaxşıdır. Burada söhbət Azərbaycanın ərazi bütövlüyündən gedir. Fransa məhkəmələri faktiki olaraq onu dəstəkləyib. Mən başa düşə bilmirəm, niyə bizim müxalifət və ya xaricdə yaşayan müxalif mövqeli şəxslər bu məsələ ilə bağlı mövqe ortaya qoymur? Onlar çox yanlış yol seçiblər. Biz bu məsələdə informasiya mübarizəsi aparmalıyıq. Bir də xaricdəki diaspor təşkilatlarımızı bu təbliğata səfərbər etməliyik. Biz bu istiqamətdə işlərə artıq start vermişik. Digər təşkilatları da fəal olmağa çağırıram”.

Məhəmmədəli QƏRİBLİ

Son xəbərlər