Fransa məhkəmələrinin Azərbaycanın Ermənistan tərəfindən işğal edilmiş ərazilərində yaradılan qondarma “DQR”lə bağlı qərarlarının işğalçı ölkədə yaratdığı çaxnaşma davam edir. Məlum olduğu kimi, əvvəlcə Serji-Pontuaz məhkəməsinin qərarı ilə Arnuvil şəhərinin qondarma Dağlıq Qarabağdakı Şeher inzibati bölgəsi ilə “Dostluq haqqında xartiya”sı ləğv edildi.
Eyni qərarla Arnuvil şəhəri ilə Azərbaycanın işğal altında olan Xocavənd rayonu arasında imzalanmış “Dostluq xartiyası” ləğv edildi. Daha sonra Qrenobl məhkəməsi eyni xarakterli 4 “Dostluq xartiyası”nı ləğv etdi. Ermənistan üçün ağır zərbə olan bu qərarlardan sonra İrəvanda ciddi siyasi narahatlıqlar yaşanır.
Erməni tərəfi heç cür Fransa məhkəmələrinin belə bir qərar verməsini həzm edə bilmir. Ölkə parlamentində müzakirələr zamanı Ermənistan hakimiyyəti, xüsusilə Xarici İşlər Nazirliyi ittiham olunub, Azərbaycan diplomatiyası qarşısında məğlubiyyətə uğradıqlarını etiraf ediblər.
O da məlumdur ki, başda Ermənistan olmaqla, xaricdəki erməni lobbisi qondarma “erməni genosidi” ilə bağlı bir sıra işlər görüb. Bəzi ölkə parlamentləri, bir sıra ABŞ ştatları saxta “genosidi” tanımaqla bağlı qərarlar qəbul ediblər. Erməni tərəfi bütün vasitələrlə çalışır ki, qondarma “soyqırımı” daha çox ölkə tanısın. Bu istiqamətdə bütün resurslarını işə salmağa çalışır. Fransa məhkəmələrinin məlum ədalətli qərarından sonra bir vaxtlar bəzi ölkə parlamentlərinin saxta “erməni genosidi” qərarlarının ləğvi məsələsi gündəmə gələ bilər. Yəni həmin ölkə parlamentləri yenidən buna baxıb qondarma “soyqırımı” tanımaqdan imtina etsinlər. Daha dəqiq desək, Fransa məhkəmələrinin ardınca saxta “erməni genosidi”ni bu vaxtacan tanımış dünyanın bəzi parlamentləri də bu qərarlarından imtina etsinlər.
Azərbaycanın dünyada artan siyasi-diplomatik gücü fonunda, ekspertlər sözügedən məsələnin perspektivini necə dəyərləndirirlər?
Elçin Mirzəbəyli: “Biz çalışmalıyıq ki, bəzi ölkə parlamentləri məsələyə yenidən baxsın və erməni yalanlarına yox desinlər”
Məsələyə münasibət bildirən politoloq Elçin Mirzəbəylinin sözlərinə görə, prinsipcə, bir sıra ölkələrin parlamentləri qondarma “erməni soyqırımı” məsələsinə yenidən baxıb onu ləğv edə bilər: “Baxmayaraq ki, bəzi ölkə parlamentlərində bununla bağlı qəbul edilən qərarlar siyasi motivli qərarlardır. Məhkəmələrin qəbul etdiyi qərarlar isə hüquqi qərarlardır. Məhkəmələrin qərarları hüquqi xarakter daşıdığı üçün, ayrı-ayrı işlərin baxılması prosesində həm də presedent olur. O baxımdan biz çox arzulayırıq ki, qondarma “erməni soyqırımı” ilə bağlı ayrı-ayrı ölkələrin parlamentləri öz qərarlarına yenidən baxsınlar. Baxmayaraq ki, parlamentlərin bununla bağlı qərarları siyasi xarakterlidir. Sözügedən siyasi qərarların heç bir hüquqi motivi olmadığı üçün, həmin qərarlar bu və ya digər formada Türkiyəyə qarşı hər hansı bir sanksiyanın qəbulu üçün əsas ola bilməz. Çünki, qeyd etdiyim kimi, sözügedən qərarlar hüquqi gücə malik deyil. Buna baxmayaraq, bəzi parlamentlər tərəfindən qondarma “erməni soyqırımı”nın tanınması qəbul edilən deyil. Ona görə ki, bəzi dairələr bundan Türkiyəyə qarşı təzyiq vasitəsi kimi istifadə etməyə çalışırlar. Ermənilər bu amildən istifadə edib Qarabağın işğalına haqq qazandırmağa çalışırlar. Ona görə də Azərbaycanla Türkiyə bu yöndə səylərini birləşdirib bu məsələ ilə bağlı birgə işlər görməyə çalışmalıdırlar. Biz çalışmalıyıq ki, bəzi ölkə parlamentləri məsələyə yenidən baxsın və erməni yalanlarına yox desinlər. Yəni qondarma “erməni soyqırımı”nı tanımaqdan imtina etsinlər”.
Vidadi ORDAHALLI
