19/09/2019 00:39
728 x 90

Ermənilərin Vaşinqton görüşünü pozmaq siyasəti intensiv hal alır - əsgərlərimizi öldürdülər, indi də hərbi təlimlərə başlayırlar...

“Danışıqlar prosesində hazırda gündəlikdə nəzərdə tutulan məsələlər ermənilərin xeyrinə deyil”

img

Məlum olduğu kimi, Azərbaycan və Ermənistanın xarici işlər nazirləri iyunun 20-də Vaşinqtonda görüşəcəklər. Ancaq görünən odur ki, erməni tərəfi sözügedən görüşü pozmaq üçün təxribatlara ara vermir.

Belə ki, iyunun 9-da cəbhənin Tərtər rayonu istiqamətində düşmən tərəfindən açılan atəş nəticəsində Azərbaycan Ordusunun hərbi qulluqçusu Elşən Xəlilov şəhid edildi. Adətən düşmən tərəf təmas xəttində baş verənlərə görə məsuliyyəti qondarma rejimin üzərinə atırdısa, bu dəfə fərqli taktika seçildi. Belə ki, Ermənistanın müdafiə naziri David Tonoyan 19 yaşlı azərbaycanlı hərbçini qətlə yetirən hərbi qulluqçulara hərbi mükafatlar təqdim edib. Eyni zamanda, əsgərimizin məhz onun əmrilə vurulduğunu açıqlayıb.

Bundan başqa, bu günlərdə ermənilər hətta bizim hərbi təyyarəmizi belə vurmağa çalışdılar.

Bu azmış kimi, Ermənistan ordusu işğal etdiyi Azərbaycan torpaqlarında 10 min nəfər hərbçinin iştirakı ilə genişmiqyaslı hərbi təlimlərə start verib. Azərbaycan Xarici İşlər Nazirliyi də haqlı olaraq bu təlimlərə münasibət bildirib. Məlum olub ki, ATƏT-in Minsk Qrupunun həmsədrlərinin təklifi əsasında iki ölkənin xarici işlər nazirlərinin Vaşınqtonda keçiriləcək görüşü ərəfəsində Ermənistan tərəfinin bu addımları anlaşılmazdır.

Görünən odur ki, Ermənistan tərəfi qarşıdakı Vaşinqton görüşünü pozmaq üçün bütün vasitələrə əl atır. Maraqlıdır, işğalçı tərəf gözlənilən Vaşinqton görüşünü pozmağa niyə bu qədər maraqlıdır?

  • Mübariz Əhmədoğlu: “Ona görə də müxtəlif təxribatlarla Vaşinqton danışıqlarını pozmaq istəyirlər”

Sözügedən məsələyə aydınlıq gətirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, danışıqlarla bağlı hazırkı vəziyyətdə ermənilər diplomatik və siyasi prosesləri tam uduzublar: “Danışıqlar prosesində hazırda gündəlikdə nəzərdə tutulan məsələlər ermənilərin ziyanınadır, onların xeyrinə deyil. Ona görə də müxtəlif təxribatlarla Vaşinqton danışıqlarını pozmaq istəyirlər. Məsələ ondadır ki, əldə olunan razılıqlardan biri atəşkəs rejimi barədə ikitərəfli müqavilənin imzalanması ilə bağlı olmalıdır. Yəni Azərbaycanla Ermənistan arasında. Bu vaxta qədər erməni tərəfi iddia edirdi ki, guya danışıqlar üçtərəfli gedir və bununla bağlı 1994-cü il müqaviləsi var. Vaşinqtonda 1994-cü il müqaviləsinin yenilənməsi, daha doğrusu, dəqiqləşdirilməsi məsələsi gündəlikdədir. Bu da ikitərəfli olmalıdır. Qeyd etdiyim kimi, Azərbaycanla Ermənistan arasında olmalıdır. Danışıqlarda Dağlıq Qarabağ tərəfi adı olmamalıdır. Məsələ ondadır ki, hazırda Ermənistan tərəfi siyasi-diplomatik baxımdan sözügedən vəziyyəti öz xeyrinə dəyişə bilmir. Ona görə də hərbi aktivliyi artırmaqla danışıqlar prosesini yubatmağa çalışırlar. Çalışırlar ki, danışıqlarla bağlı sözügedən sənəd imzalanmasın. O üzdən, hərbçimizi şəhid etdilər və çəkinmədən bunu bəyan etdilər. Eləcə də işğal olunmuş Azərbaycan ərazilərində genişmiqyaslı hərbi təlimlərə start verilməsi bunun tərkib hissəsidir. Hesab edirəm ki, Vaşinqton görüşü bu baxımdan müəyyən mənada həlledici olacaq. Sözügedən görüşdə məlum məsələlərlə bağlı razılıq əldə olunmasa, bu o deməkdir ki, Azərbaycan dərhal əlavə hərbi aktivlik nümayiş etdirmək məcburiyyətində qalacaq”.

Vidadi ORDAHALLI

Son xəbərlər