Rusiyanın Ermənistandakı səfiri Sergey Kopırkin Ermənistanın sabiq prezidenti Robert Köçəryanla görüşdən sonra bu ölkənin Xarici İşlər Nazirliyinə çağırılıb. Erməni mətbuatının verdiyi məlumata görə, bu barədə Ermənistan parlamentinin xarici əlaqələr komissiyasının sədri Ruben Rubunyan bildirib:
“Rusiya səfiri ilə Köçəryanın görüşünün də müzakirə edildiyi xarici əlaqələr komissiyasının iclasından sonra mən xarici işlər naziri Zöhrab Mnatsakanyanla danışdım. Nazir mənə səfirin XİN-ə çağırıldığını və onunla Ermənistanın daxili işlərinə müdaxilə kontekstində söhbət aparıldığını deyib”.
Ermənistan XİN-in mətbuat katibi səfirin Xarici İşlər Nazirliyinə çağırıldığını təsdiqləyib.
Xatırladaq ki, iyunun 13-də Rusiyanın səfiri Kopırkin ikinci prezident R.Köçəryanla görüşüb. Görüş Köçəryanın ofisində bir saatdan çox təklikdə davam edib.
Bundan sonra səfirlik açıqlama verərək, Kopırkinin Köçəryanla ictimai-siyasi və işgüzar dairələrin nümayəndələri ilə müntəzəm görüşlərin bir hissəsi kimi bir araya gəldiyini deyib.
Ermənistan parlamentinin spikeri Ararat Mirzoyan jurnalistlərə Rusiya səfirinin Köçəryanla görüşünü alqışlamadığını deyib: "Mən bu görüşü alqışlamıram. Hər hansı bir ölkənin səfiri siyasi sahənin bütün spektrinin nümayəndələri ilə görüşə bilər, burada isə başqa bir məqam var - bu insana qarşı irəli sürülən ittihamlar onu təmiz siyasi sahədən kənarlaşdırır. Burada söhbət bir çox başqa xüsusiyyətlərdən, maraqlardan gedir, buna görə də qəbul etmirəm. Yəni mən R.Köçəryanı siyasi xadim, siyasi sahəni təmsil edən biri kimi görmürəm, əks halda, Rusiya səfiri və yaxud digər səfirlə ünsiyyəti alqışlayardım”.
Göründüyü kimi, Ermənistan rəhbərliyi Rusiya səfirinin Köçəryanla görüşməsi faktını süngü ilə qarşılayır. Əslində, istənilən ölkədə akkreditə olunan səfirin həmin dövlətin ərazisində qanuni fəaliyyətlə məşğul olan qurumlarla təmaslar qurması tam normaldır. Burada qanunazidd nəsə yoxdur. Belə olan təqdirdə, niyə Rusiyanın Ermənistandakı səfiri eks-prezidentlə görüşdüyünə görə belə təzyiqlə üzləşib? Ermənistan nədən ehtiyat edir?
- Elşən Mustafayev: “Rusiya bununla Paşinyana növbəti baş naziri göstərir”
AMİP funksioneri Elşən Mustafayev qəzetimizə bildirdi ki, Ermənistan rəhbərliyinin keçirdiyi əndişə təsadüfi deyil: “Bilirsiniz ki, Paşinyan hələ ki, konkret siyasi oriyentasiyasını müəyyən edə bilməyib. Rusiya bilir ki, Paşinyanın qəlbi onlarla döyünmür. Sadəcə, müəyyən asılılıqlara görə Rusiyaya yaltaqlanmağa məcburdur. Rusiyanın Ermənistanda ciddi maraqları və dayağı var. Bura hərbi bazalardan tutmuş, İran və Türkiyə ilə sərhədə nəzarətə kimi məsələlər aiddir. Yəni Moskva heç vaxt Ermənistandakı prosesi nəzarətsiz buraxmaz. Paşinyanın bir il sürən hakimiyyəti göstərir ki, həmin adam heç ölkənin daxili siyasətinə belə nəzarət edə bilmir. İnqilab ərəfəsində Rusiya Paşinyanın hakimiyyətə gəlməsinə ciddi mane olmaq istəmədi. Onların addımları məhz buna hesablanmışdı. Bilirdilər ki, hakimiyyətin idarə olunmasında heç bir təcrübəsi olmayan komanda qısa müddətdə özünü biabır edəcək. İndi də həmin mənzərəyə şahidlik edirik. Ermənistan ciddi problemləri olan ölkədir. Bir tərəfdən müharibə və onun ölkəyə verdiyi iqtisadi blokada. Digər tərəfdən isə klan davası Paşinyanı çox rəzil durumla üz-üzə qoyub. Buna görə də Rusiya artıq indidən alternativ üzərində düşünür. Paşinyan da bilir ki, həmin şəxs R.Köçəryandır. Sarkisyana xalq qəzəbli olduğu üçün, hələlik Rusiya Köçəryanın üzərində dayanıb. Köçəryanın həbsdən Paşinyanın iradəsinə zidd olaraq çıxarılması və Baş nazirin onu yenidən həbsə qaytara bilməməsi cəmiyyət içində Köçəryanın mövqeyini xeyli gücləndirib. Paşinyan və komandası Rusiya səfirinin Köçəryanla görüşməsini təsadüfi saymır. Bu, çox böyük bir mənanı özündə kəsb edir. Rusiya bununla Paşinyana növbəti baş naziri göstərir. Yəni onların dəstək verəcəyi şəxsi. Əslində, səfirin hərəkətində qanunsuz məqam yoxdur. Paşinyan da bu cür sərt münasibəti ilə hadisələri qabaqlamaq istəyir. Rusiyaya plandan xəbəri olduğu ismarıcını verir. Yəqin ki, həmin görüşdə səfir Köçəryana gələcək fəaliyyətinin konturlarının necə olacağı ilə bağlı da istiqamətlər verib. Yaxın zamanlarda biz Köçəryanın daha da fəal addımlar atacağını görəcəyik. Ermənistan rəhbərliyinin narahatlığı Moskvanın onları devirmək istəyən şəxslə yaxından əməkdaşlıq etməsindədir”.
Məhəmmədəli QƏRİBLİ
.jpg)
.jpg)
