17/07/2019 09:17
728 x 90

Xaricdəki radikal “antimillilərimiz” Fransa məhkəmələrinin antierməni qərarlarından məmnun qalmadı...

“Xaricdəki antimilli ünsürlər tapşırıqla hərəkət etdikləri üçün, bu məsələdə susdular”

img

Məlum olduğu kimi, mayın 29-da Fransanın Sersi-Pontuaz İnzibati Məhkəməsinin qərarı ilə bu ölkənin Arnuvil şəhəri və 1992-ci ildən bəri Ermənistan silahlı qüvvələri tərəfindən işğal altında saxlanan Dağlıq Qarabağ regionunda yaradılmış qondarma qurumu təmsil edən Şeher inzibati bölgəsi arasında imzalanmış “dostluq xartiyası” qanunsuz elan olunaraq ləğv edilib.

İyunun 11-də isə Qrenobl İnzibati Məhkəməsinin qərarı ilə Drom, Valans, Bur le Valans və Bur de Peaq departamentlərinin Dağlıq Qarabağdakı 4 “bələdiyyə” ilə imzalanmış “dostluq xartiyaları” qanunsuz sayılaraq ləğv olunub.

Beləliklə, Fransa qarabağlı ermənilərin separatizmini dəstəkləməməsi ilə yanaşı, dünya miqyasında separatizmə qarşı olduğunu bəyan etdi. Çünki sözügedən “xartiyalar” Fransanın xarici siyasət kursuna və beynəlxalq öhdəliklərinə zidd olmaqla yanaşı, ATƏT-in Minsk Qrupunun həmsədrlərindən biri kimi bu ölkənin bitərəfliyini şübhə altına salırdı. Təbii ki, bütün bunlar Azərbaycanın uğurudur və buna bütün soydaşlarımız sevinməlidir.

Ancaq qəribədir ki, xaricdə fəaliyyət göstərən söyüşcül mühacirlər, hansı ki, müxalif mövqedən çıxış edirlər və ancaq qərəzli tənqidlə məşğuldurlar, bütün bunları sükutla seyr etdilər. Fransa məhkəməsinin məlum qərarını bir kəlmə belə şərh etmədilər. Söyüş və təhqiri yaşam tərzinə çevirmiş bu şəxslər ümummilli məsələlərdə, həmişəki kimi, lal, kar və kor qaldılar. Faktiki olaraq milli təəssübkeşlik hissindən uzaq olduqlarını göstərdilər. Məlum oldu ki, bu kimi məsələlər xaricdə yaşayan və ölkəmiz əleyhinə təbliğat aparan orduxanların maraq dairəsinə daxil deyil. Yəni xaricdə bizə qarşı fəaliyyət göstərən “mühacirət müxalifəti” bir dəfə də olsun Dağlıq Qarabağdan danışmır. Çünki onlar, sadəcə, anti-Azərbaycan dairələrdən aldıqları təlimatlarla hərəkət edirlər. Odur ki, onlar adətlərinə uyğun olaraq, Fransa məhkəmələrinin çıxardığı bu qərarlardan da bir kəlmə belə söz açmadılar.

  • Aydın Mirzəzadə: “Onlar belə bir addım atsalar, o zaman söyüşə görə aldıqları vaxtaşırı maddi yardımdan məhrum olacaqlar”

Sözügedən məsələ ilə bağlı fikirlərini “Bakı-Xəbər”lə bölüşən millət vəkili Aydın Mirzəzadənin sözlərinə görə, xaricdəki antimilli ünsürlər tapşırıqla hərəkət etdikləri üçün, bu məsələdə susdular: “Xaricdə fəaliyyət göstərən, Azərbaycandan çıxmış söyüşcül müxalifətin fəaliyyəti orada xüsusi olaraq tənzimlənir. Onlar heç bir addımı maddi mükafat olmadan həyata keçirmirlər. Etdikləri hər bir çıxış, paylaşdıqları videogörüntü üçün müvafiq mükafat alırlar. Heç də təsadüfi deyil ki, biz zaman-zaman onların hansısa kiçik bir məbləğ uğrunda bir-birilə qanlı savaşa çıxdıqlarının şahidi oluruq. Fransa məhkəməsinin Azərbaycanla bağlı verdiyi qərar, əslində, bu ölkənin özünün sivil, demokratik, hüquqi bir dövlət olması imicini möhkəmləndirməsi uğrunda atdığı bir addımdır. Avropanın bəzi ölkələrində vaxtaşırı separatçı meyllər baş qaldırır. Böyük Britaniyadaki Şotlandiya, İspaniyadaki Kataloniya gözümüz qarşısında olan məsələdir. Avropa dövlətləri separatçılığın nə qədər böyük bir problem olduğunun artıq fərqinə varmağa başlayıblar. Ona görə də Fransa müvafiq addımlar atır. Bu, Fransanın böyüklüyüdür və bu ölkənin dövlətçilik yoluna yaraşan bir hərəkətdir. Ancaq bütün bunlar xaricdəki anti-Azərbaycan mərkəzlərinin maraqlarında deyil. Ona görə də xaricdə vaxtaşırı Azərbaycan dövlətçiliyinə qarşı çıxış edən həmyerlilərimiz belə bir tapşırıq almayıblar. Hətta bunu başqa cür də demək olar. Hesab edirəm ki, onlar belə bir addım atsalar, o zaman söyüşə görə aldıqları vaxtaşırı maddi yardımdan məhrum olacaqlar. Yəni bunun arxasında birbaşa tapşırıq və maddi maraq durur”.

Vidadi ORDAHALLI

Son xəbərlər