22/10/2019 08:58
728 x 90

Ermənistanın Qarabağda gərginliyi artırmasının mahiyyəti - əsgər qətllərinin ardınca təyyarə vurmaq cəhdi...

img

Son günlər Ermənistanın təmas xəttində vəziyyəti gərginləşdirmək meylləri açıq nəzərə çarpır. Xüsusilə də bu təxribatlarda beynəlxalq ictimaiyyətə mesaj vermə cəhdləri olduğu aydın görünür. ATƏT-in Minsk Qrupu həmsədrlərinin Bakıda olduğu bir vaxtda ermənilər ordumuzun mayorunu snayperdən açılan atəşlə şəhid etdilər. Bunun ardınca növbəti təxribata cəhd edən zaman onların bir əsgəri öldürüldü. Ermənistanın müdafiə naziri açıq şəkildə bəyan etdi ki, həmin əsgərin qisasını alan hərbçiyə şəxsən mükafat verəcək. Belə də etdi.

Tez-tez təxribatlara cəhd edən erməni ordusunun layiqli cavabı verilir. Artıq Ermənistan raketlərlə təxribata əl atıb. Öz səmamızda təlim uçuşları keçirən qırıcılarımıza atəş açır. İyunun 12-də səhər saatlarında cəbhənin Füzuli istiqamətində Azərbaycan Hərbi Hava Qüvvələrinin aviasiya vasitələrinin planlı təlim uçuşları həyata keçirilib. Müdafiə Nazirliyinin mətbuat xidmətindən verilən məlumata görə, bu zaman Ermənistan silahlı qüvvələri “Osa” zenit-raket kompleksini tətbiq etməklə aviasiya vasitələrimizi vurmağa uğursuz cəhd göstəriblər. Zenit-raket kompleksindən buraxılan 2 ədəd raket hədəfə dəyməyərək havada partlayıb.

Bu, hərbi pilotlarımızın ustalığı və aviasiya vasitələrimizdə quraşdırılmış müasir cihazlar sayəsində, digər tərəfdən isə düşmənə məxsus hərbi texnikanın köhnə və keyfiyyətsiz olması, onun idarə olunmasına təhkim edilmiş döyüş heyətinin isə hazırlıq səviyyəsinin aşağı olması nəticəsində mümkün olub.

Düşmən tərəfindən buraxılan raketlərdən birinin hərəkət traektoriyası və hədəfdən yan keçməsi anı aviasiya vasitələrimizin təlim uçuşlarının çəkilişlərini həyata keçirmək üçün havaya qaldırılan pilotsuz uçuş aparatımız tərəfindən qeydə alınıb. Qeyd edək ki, Ermənistanın cəbhədə təxribat yaratmaq cəhdlərinin daha geniş vüsət ala biləcəyini həmin ölkənin müdafiə naziri öz dilindən etiraf edib.

İrəvanda jurnalistlər müdafiə naziri David Tonoyandan təmas xəttindəki vəziyyət barədə soruşublar. Erməni KİV-inin verdiyi məlumata görə, Tonoyan hazırda vəziyyətin “sabit olduğunu” açıqlayıb. “Dünənki və bugünkü məruzələrə əsasən hazırkı məqamda vəziyyət qismən stabildir” - Tonoyan qeyd edib.

Jurnalistlər bu dəfə Tonoyandan müharibə təhdidi barədə soruşublar, nazir onları əmin edib ki, müharibə təhlükəsi real olsa, bu haqda hökmən məlumat verəcək. Jurnalistlər əl çəkməyiblər, müdafiə nazirindən təmas xətti boyu Azərbaycan Ordusunun pilotsuz təyyarələrinin uçuşları haqda soruşublar. Tonoyan deyib: “Bizim pilotsuz aparatlar da bütün perimetr boyu uçuşlar həyata keçirir”.

Jurnalistlər Tonoyana Azərbaycan tərəfinin xüsusi təyinatlılar cəmləşdirməsi haqda xatırladıblar. Tonoyan isə qeyd edib ki, onlar tərəfdən də təmas xəttində xüsusi təyinatlı dəstələr var.

Ermənistanın bu təxribat cəhdləri nəyə hesablanıb?

Politoloq Qabil Hüseynli hesab ebir ki, Ermənistan tərəfi sərhəddən xeyli uzaq məsafədə təlim keçirən, təmas xəttini keçməyən və erməni hərbi hissələrinin üzərindən uçmayan hərbi təyyarələri vurmağa cəhd edirsə, bu, atəşkəsin kobud şəkildə pozuntusudur: “Ermənilər atəşkəsi mütəmadi pozublar. Bunların nəticəsində bizim çoxlu sayda əsgər və zabitimiz şəhid olub. Ancaq son günlər ərzində baş verənlər ermənilərin tamamilə başqa niyyətlərindən xəbər verir. Bəllidir ki, Ermənistanın atəşkəsi pozmaqda bir neçə məqsədi var. Bunlardan biri danışıqlardan yayınmaqdır. Digəri daxili qəzəbi mühiribəyə kökləyib Paşinyan hakimiyyətinin ömrünü uzatmaqdır. Ermənistanın davranışları göstərir ki, onlar lokal deyil, irimiqyaslı müharibəyə belə hazırlıq görürlər. Birdən-birə Azərbaycan ərazisi üzərində, təmas xəttindən xeyli kənarda aviasiya vasitələrinə atəş açılması beynəlxalq hüquq normalarına, eləcə də müharibəylə bağlı razılaşmalara kökündən ziddir. Bu, erməni tərəfinin növbəti provokasiyasıdır. Əvvəla bu təyyarələr təmas xətti boyunca uçsa belə, ən azından, təyyarənin uçuş xətti ilə sərhəd xətti arasında 50 km məsafə olur. Hərbi təlimlər əsasən döyüş hazırlığı xarakteri daşıyır. Bu təyyarələr çox böyük səs gücünə malikdir və cəbhəboyu xəttində erməni əsgərlərinə və burada yaşayan erməni əhalisinə mesaj məqsədi güdür. Azərbaycanın hərbi aviasiya təlimlərini keçirməkdə əsas niyyəti müharibə başlayacağı təqdirdə aviasiyanın gücündən tam istifadə ediləcəyini göstərməkdir. Təbii ki, Azərbaycan müharibədən qorxmur və hətta torpaqları işğaldan azad etməyin bütün mümkün yollarını nəzərdən keçirir. Amma Azərbaycan bilir ki, bu prosesləri nə vaxt və necə yerinə yetirmək lazımdır. Bu gün aviasiya sahəsində tam üstünlük Azərbaycana məxsusdur. Azərbaycanın qırıcı, bombardmançı, eləcə də pilotsuz kamikadze təyyarələri Ermənistan ərazisində istənilən nöqtəni vurmaq qabiliyyətinə malikdir. Onların atdığı raketin hədəfdən necə yayındığı bir daha Azərbaycan pilotlarının peşəkarlığını və hərbi texnikamızın üstünlüyünü nümayiş etdirdi”.

Məhəmmədəli QƏRİBLİ

Son xəbərlər