19/09/2019 07:02
728 x 90

Rusiya səfirinin İrəvanda Köçəryanla müəmmalı görüşü…

“İstisna deyil ki, səfir Köçəryanı yeni siyasi proseslərlə bağlı təlimatlandıraraq, ona lazımi istiqamətlər verir”

img

Rusiyanın Ermənistandakı səfiri Sergey Kopırkin Ermənistanın eks-prezidenti Robert Köçəryanla görüşüb. Bunu erməni KİV-inə açıqlamasında Köçəryanın mətbuat katibi Viktor Soqomonyan deyib. O, görüşün Köçəryanın ofisində baş tutduğunu bildirib.

Soqomonyan görüşün təkbətək keçirildiyini və bir saat davam etdiyini söyləyib. Əslində, Rusiyanın səfirinin hazırda Ermənistan hakimiyyətinə qarşı sərt müxalif mövqedə dayanan bir siyasətçi ilə görüşə təşəbbüs etməsi maraqlıdır. Çünki Rusiyanın xarici ölkələrdəki səfirliklərinin fəaliyyətində müxalif qüvvələrlə yaxından təmas qurmaq nadir hallarda müşahidə edilir. Belə olan təqdirdə, biz Köçəryana göstərilən aşırı marağı nə ilə izah edə bilərik?

  • Nəzakət Məmmədova: “Rusiya bununla həm də ABŞ-a meydan oxumaqda davam edərək…”

Politoloq Nəzakət Məmmədova “Bakı-Xəbər”ə açıqlamasında bildirdi ki, bununla bağlı müxtəlif versiyaların üzərində dayanmaq olar: “Bu, ilk növbədə, onun əlamətidir ki, Rusiya öz yaxın adamlarını taleyin öhdəsinə buraxmır, onlarla, şəraitdən asılı olmayaraq, kontaktlarını davam etdirir və sadiqliyi qiymətləndirir.

Köçəryan isə Rusiyanın sadiq adamı kimi daim bu dövlətin nəzarətindədir. Təbii ki, o, indiyədək Rusiyanın nəzarəti altında fəaliyyət göstərib, onların bütün məxfi təlimatlarını həyata keçirib və onun bu dövlətlə çox mühüm bağlılığı var.

Bu cür əlaqələr heç bir zaman asanlıqla bitmir. Ona görə də Rusiya səfiri Köçəryanla görüşüb, onun ətrafında baş verən prosesləri izlədiyini, Köçəryana dəstəyini ifadə edir.

Eyni zamanda, istisna deyil ki, səfir Köçəryanı yeni siyasi proseslərlə bağlı təlimatlandıraraq, ona lazımı istiqamətlər verir, Moskvadan gələn direktivləri tetatet onun diqqətinə çatdırır. Bu həm də o deməkdir ki, Rusiya Ermənistandakı prosesləri diqqətdə saxlamaqda davam edəcək və Köçəryanı yenə də əsas siyasi fiqurlardan biri kimi siyasi səhnədə görmək arzusundadır.

Rusiya bununla həm də ABŞ-a meydan oxumaqda davam edərək, onun göstərişi ilə Paşinyanın həbs etdiyi adamlarını sonadək siyasi səhnədə istifadə edəcəyinin mesajını vermiş olur. Rusiya həm də Köçəryanla işləməyə məcburdur, çünki proseslər sürətlə inkişaf edir, Paşinyana qarşı yeni siyasətçi yetişdirmək üçün zamana ehtiyac var və həmin müddətdə çox şey itirilə bilər. Odur ki, Rusiya "ən yaxşı yeni unudulmuş köhnədir" prinsipindən çıxış edərək Köçəryanla işləməyi üstün tutur və onunla yola davam edəcəyi istisna olunmur. Çünki yolayrıcında atları dəyişdirmirlər”.

Məhəmmədəli QƏRİBLİ

Son xəbərlər