Rusiya Prezidenti Vladimir Putin Moldovanın rusiyapərəst prezidenti İqor Dodonu indiki mürəkkəb vəziyyətdə dəstəkləməkdən əl çəkməyəcəyini deyir.
Baki-xeber.com xəbər verir ki, Putin, Kremlin prezident Dodon və onun koalisiya tərəfdaşlarını dəstəkləməkdə davam edəcəyini deyib.
Putin Moldovadakı hakimiyyətin oliqarx strukturları, oliqarxlar tərəfindən qəsb olunduğunu deyib. Rusiya lideri həmin qüvvələrin Moldovada qazandıqları pulları öz durumlarını və dövlətə təsir vasitələrini möhkəmləndirməyə xərclədiklərini deyib: “Onlar Moldova xalqının hesabına qazanıblar və bu puldan öz şəxsi sərvətlərini, dövlətə nəzarəti gücləndirməkdə istifadə ediblər”.
Qeyd edək ki, hazırda Kişinyovda iki rəqib hökumət özünü legitim sayır. Fevralda keçirilən parlament seçkisindən sonra hökumət formalaşdırılmayıb. İyunun 7-də Konstitusiya Məhkəməsi parlamentin buraxılması, yeni seçkinin keçirilməsi barədə qərar çıxarıb.
Moldova qanunvericiliyinə görə, hökumət seçkidən sonrakı üç ay ərzində formalaşdırılmalıdır. İyunun 8-də isə Dodonun moskvapərəst Sosialist Partiyası Avropa Birliyi tərəfdarı kimi tanınan ACUM bloku ilə sürpriz razılaşma əldə edib.
Parlamentdəki 101 yerdən 61-nin sahibi olan yeni alyans baş nazir Pavel Filipin hakim Demokratik Partiyasını (PDM) hakimiyyətdən uzaqlaşdırmaq istədiyini bildirib. Filip sentyabrın 6-na seçki təyin edib. Alyans məhkəməni konstitusiyanı yanlış yozmaqda, seçkinin nəticələrini üç ay əvəzinə 90 gün sonra ləğv etməkdə günahlandırıb. Alyans həmçinin ACUM liderlərindən Maia Sandunun rəhbərliyi ilə yeni hökuməti təsdiqləyib.
Məhkəmə isə iyunun 9-da Sandu hökumətini qeyri-konstitusion elan edərək Sosialist Partiyasının keçmiş lideri Dodonu prezidentlikdən kənarlaşdırıb. Aralıq dövr prezidenti kimi iş başına keçən Filip parlamenti dərhal buraxaraq sentyabrın 6-na növbədənkənar seçki təyin edib.
Demokratik Partiyanın rəhbəri ziddiyyətli maqnat Vladimir Plahotniucdur ki, bir çoxları onun ölkəni pərdəarxasında idarə etdiyini düşünür. Sosialistlər və ACUM Konstitusiya Məhkəməsini Plahotniucun əsiri olmaqda ittiham edir.
