Fransanın Serji-Pontuaz məhkəməsinin Arnuvilin qondarma Dağlıq Qarabağdakı Şeher inzibati bölgəsi ilə “Dostluq haqqında xartiya”sını ləğv etməsinin ardınca Qrenobl inzibati məhkəməsi tərəfindən də bənzər qərar qəbul olunub. Bu barədə Fransadakı erməni diasporunun media orqanlarından biri məlumat yayıb.
Məlumatda Qrenobl məhkəməsinin 4 “dostluq xartiyası”nı ləğv etdiyi bildirilir. Vurğulanır ki, prefektin müraciəti əsasında Qrenobl inzibati məhkəməsi iyunun 11-də Drom departamentinin özü, həmçinin, bu departamentdə yerləşən Valans, Bur-le-Valans və Bur-dö-Peaj kommunaları ilə Azərbaycanın 25 ildən artıqdır işğal altında olan ərazilərindəki inzibati bölgələr arasında imzalanmış dörd “xartiya”nı ləğv edib.
Bu “xartiya”ların ləğv olunmasının səbəbləri kimi onların Fransanın xarici siyasət kursuna və beynəlxalq öhdəliklərinə uyğun gəlməməsi, həmçinin, bu ölkənin ATƏT-in Minsk Qrupunun həmsədrlərindən biri kimi bitərəfliyini şübhə altına alması göstərilir. Qeyd edək ki, bu, Fransanın deyilən istiqamətdə atdığı ilk addım deyil. Bir neçə gün əvvəl başqa bir yerli məhkəmə də analoji qərar qəbul etmişdi. Fransada qondarma “DQR”lə bağlı prosesin belə xarakter alması nəyin əlaməti sayıla bilər?
Yeganə Hacıyeva: “Fransa ermənilərin dünyada nüfuzlarını itirdiklərini anlayır, buna görə də maksimum dərəcədə erməni diasporunun təsirlərini neytrallaşdırmağa çalışır”
Beynəlxalq məsələlər üzrə ekspert, politoloq Yeganə Hacıyeva “Bakı-Xəbər”ə açıqlamasında bildirdi ki, bunun bir sıra səbəbləri var: “Fransa sıradan bir ölkə deyil. Dünya siyasətində belə onun rəyi ilə hesablaşırlar. Xüsusilə də Dağlıq Qarabağ probleminin həlli ilə bağlı məsələdə fəallıq göstərməyə həmin ölkənin əlində tam əsas var. Çünki bununla bağlı rəsmi həmsədrlik statusuna malikdir. Biz münaqişənin həlli boyunca Fransadan fəallıq görmüşük. Ancaq hiss etmişik ki, bu fəallığı belə biz ondan zorla qoparmışıq. Çünki həmin ölkədə olan çox güclü erməni diasporu bacardığı qədər buna təsir etməyə çalışıb. Bəli, həmin ölkədəki erməni diasporu olduqca güclüdür və hətta deyərdim ki, Fransa siyasətinə belə təsir etmək gücündədir. Zaman-zaman bizim Fransa ilə aramızda yaranan kiçik anlaşılmazlıqlar da məhz həmin dairələrin səyi nəticəsində yaranıb. Bu münasibətlərə xələl gətirən və hətta Fransanın özünün belə demokratik imicinə kölgə salan mövzulardan biri də həmin ölkənin əyalət subyektlərinin qondarma “DQR”lə ikitərəfli əlaqələr qurması, qarşılıqlı səfərlərin təşkili olub. Biz buna daim etiraz etmişik. Ancaq hər dəfə Fransanın mərkəzi hakimiyyəti əyalət subyektlərinin bu cür məsələlərdə sərbəst olmalarını əsas gətirərək məsuliyyətdən yayınıb. Hətta bildirib ki, belə mövqenin Fransanın rəsmi mövqeyinə heç bir aidiyyəti yoxdur. İstənilən halda, həmin hərəkətlər bizi dərindən narahat edirdi və Fransanın da həmsədr kimi neytrallıq imicinə zərbə vururdu. İndi isə Fransa məhkəmələri ard-arda “DQR” məsələsini silir və onun kitabını bağlayır. Bütün bunların əsaslı səbəbləri var. Çünki məhkəməyə müraciət edən subyektlər bunu əvvəl etməkdə maraqlı deyildilər. İndi isə edirlər. Deməli, ölkələr arsındakı münasibətlərdə yeni mərhələ başlayıb. Fransa ermənilərin dünyada nüfuzlarını itirdiklərini anlayır, buna görə də maksimum dərəcədə erməni diasporunun təsirlərini neytrallaşdırmağa çalışır. Hesab edirəm ki, Fransanın nümayiş etdirdiyi bu obyektiv mövqe onun dünyadakı nüfuzunu daha da artıracaq. Bu, eyni zamanda, Fransa ərazi subyektləri üçün də bir örnək olacaq ki, həmin separatçı qurumla əməkdaşlıq yolverilməzdir. Erməni diasporu onları nə qədər şirnikləndirməyə çalışsa da, mümkünsüz olacaq”.
Məhəmmədəli QƏRİBLİ
