22/08/2019 20:33
728 x 90

Qazaxıstan Prezidentinin qazax-erməni identikliyi barədə sözləri Ermənistanda da təəccüblə qarşılanır...

“Qazaxlarla ermənilər arasında tarixi və dil baxımından bağlantı yoxdur”

img

Məlum olduğu kimi, Qazaxıstan Prezidenti Qasım-Jomart Tokayev “Ermənistanın səsi” qəzetinə müsahibəsində “Ermənistanla tarix və hətta dil baxımından ortaq nöqtələrimiz çoxdur. Ona görə də mən gələcək əməkdaşlığa optimist yanaşıram” deyib.

Onun bu açıqlaması təəccüb doğurub. Məsələ ondadır ki, qazax dili ilə erməni dili arasında heç bir oxşarlıq yoxdur. Bəlkə də Tokayev Sovet dövründə Ermənistanla ortaq məsələlər haqqında danışıb, amma erməni mətbuatı bunu təhrif edib. Ancaq belə olsaydı, o zaman Qazaxıstan tərəfi bunu təkzib edərdi. Ancaq qəribədir ki, Qazaxıstan bunu təkzib etmir. Yeri gəlmişkən onu da qeyd edək ki, onun bu fikirləri, "Forbes-Qazaxıstan" nəşrində də dərc olunub.

Ermənilərin özləri belə Qazaxıstanın yeni Prezidentinin sözügedən fikirlərindən təəccüblənirlər. Erməni mətbuatı yazır ki, bütün bunlar qəribədir. Çünki Tokayev bütün dünyaya kifayət qədər ciddi bir alim kimi təqdim edildi. Erməni mətbuatı yazır ki, Tokayev Nursultan Nazarbayevin siyasi uşağıdır. Belə olan halda, Tokayevin bu cür açıqlama ilə çıxış etməsi erməniləri daha da təəccübləndirir. Hətta ermənilər bunu özlərinə ar bilirlər. Hesab edirlər ki, Ermənistan guya Qazaxıstandan fərqli olaraq, demokratik ölkədir.

Bütün bu deyilənlərin fonunda, Qazaxıstan niyə səslənən fikirlərlə bağlı təkziblə çıxış etmir?

  • Mübariz Əhmədoğlu: “Bu cür açıqlamalar ermənilərə stimul verir”

Sözügedən məsələni “Bakı-Xəbər”ə şərh edən Siyasi İnnovasiya və Texnologiyalar Mərkəzinin rəhbəri Mübariz Əhmədoğlu buna bir neçə aspektdən yanaşdı: “Qazaxlarla ermənilər arasında tarixi və dil baxımından bağlantı yoxdur. Çünki ermənilər bu ərazilərin sahibi deyil. Bu ərazilərdə müxtəlif türkdilli tayfalar yaşayıb. Ermənistanda yaşayan türkdilli tayfalardan biri də qıpçaqlar olub. İndi İrəvandakı Matenadaran meydanında bir sıra qıpçaq əsərləri var. Ermənilər son dövrlərdə o əsərlərdən istifadə edərək Qazaxıstanla əlaqələri genişləndirmək istəyirlər. İstəyirlər ki, Qazaxıstandan neft alsınlar və s. Təəssüflər olsun ki, Qazaxıstan da buna meyllidir. Məsələ ondadır ki, Ermənistanın Qazaxıstandakı keçmiş səfiri öz ölkəsində yanacaqdoldurma mərkəzi açmaq istəyir. Bu cür açıqlamalar ermənilərə stimul verir. Baxmayaraq ki, bəzi ermənilər Tokayevin o açıqlamasını təəccüblə qarşılayırlar. Hesab edirəm ki, bu məsələni gündəmdə saxlamaq lazımdır. Biz sübut etməliyik ki, Ermənistan ərazisində tarixən qıpçaq türkləri yaşayıb, ermənilər bura gəlmə olublar. Onu da qeyd edim ki, Qazaxıstanla Ermənistan arasında əlaqələr var. Bu əlaqələr haçansa bizim maraqlarımıza toxuna bilər. Yəni bu tək Tokayevin səsləndirdiyi fikirlər deyil. Ermənistanın hazırkı prezidenti Armen Sarkisyanın Qazaxıstanın siyasi elitası ilə çox intensiv əlaqəsi var. Ona görə də bütün bunları nəzərə almalıyıq”.

Vidadi ORDAHALLI

Son xəbərlər