2019-cu ilin birinci rübündə Ermənistana yatırılan birbaşa xarici investisiya axını 7,6 milyon dollar təşkil edib. Bu barədə Ermənistan Milli Statistika Komitəsi məlumat yayıb. Bu, keçən ilin analoji dövrü ilə müqayisədə dəfələrlə az olub. Belə ki, 2018-ci ilin ilk rübündə Ermənistana yatırılan birbaşa investisiyalar 83,6 milyon dollar təşkil edib.
Cari ilin ilk rübündə ölkəyə ən çox xarici investisiya Rusiyadan qoyulub. Rusiyadan sonra bu ölkəyə xarici sərmayə qoyan əsas ölkələr isə İtaliya, Livan, Finlandiya, Kipr və Birləşmiş Ərəb Əmirliyidir.
Göründüyü kimi, Paşinyan hökumətinin ciddi səyləinə baxmayaraq, xarici sərmayə ölkədən qaçır. Yeri gəlmişkən onu da qeyd edək ki, bu günlərdə Ermənistanın Baş naziri Nikol Paşinyan bu ölkədə akkreditə olunmuş xarici ölkələrin diplomatik nümayəndələri ilə görüşüb. Paşinyan deyib ki, onların ən böyük problemi xarici investisiya ilə bağlıdır. Belə məlum olub ki, xarici sərmayədarlar ölkəyə investisiya qoymaqda maraqlı deyillər: “Biz ölkəmizdə xarici investisiyalar üçün ən cəlbedici şərait yaratmaq üçün əlimizdən gələni edirik”.
Eyni zamanda, Paşinyan onu da qeyd edib ki, müstəqil fəaliyyət göstərən məhkəmə sistemi olmadan bu məsələ tam həll olunmayacaq. Çünki hər hansı bir investor onun investisiyalarının, əmlakının təminatına zəmanət istəyir: “Lakin belə bir zəmanət yalnız müstəqil məhkəmə sistemi tərəfindən verilə bilər”.
Maraqlıdır, bəs ekspertlər xarici investorların Ermənistana maraq göstərməməsini nə ilə əlaqələndirirlər?
Vüqar Bayramov: “Hansı tərəfdən baxsaq görərik ki, orada sərmayə mühiti əlverişli vəziyyətdə deyil”
Sözügedən məsələyə aydınlıq gətirən iqtisadçı-ekspert Vüqar Bayramov xarici investorların Ermənistana maraq göstərməməsini bir sıra amillərlə əlaqələndirdi. Onun fikrincə, belə vəziyyət hələ bir neçə il davam edəcək: “Paşinyanın bir sıra cəhdlərinə rəğmən, xarici sərmayədarlar Ermənistan iqtisadiyyatına investisiya qoymaqda maraqlı deyillər. Səbəblərdən biri Ermənistan iqtisadiyyatının kiçik və rentabellik səviyyəsinin aşağı olmasıdır. Ermənistan iqtisadiyyatı regionda xarici investorlar üçün cəlbedici deyil. Cəlbedici iqtisadiyyat olmadığına görə bu, investorların ölkə iqtisadiyyatına marağının artmasına gətirib çıxarmır. Baxmayaraq ki, Paşinyan bununla bağlı islahatların aparılacağını demişdi, amma hələlik ortada ciddi iş yoxdur. Başqa bir tərəfdən, Ermənistanda investisiya mühitinin yaxşılaşması zaman tələb edir. Hansı tərəfdən baxsaq görərik ki, orada sərmayə mühiti əlverişli vəziyyətdə deyil. Ona görə də yaxın illərdə Ermənistan iqtisadiyyatına xarici sərmayə qoyuluşunun artacağı gözlənilmir”.
Vidadi ORDAHALLI
