Ermənistan KİV-i yazır ki, həmin ölkənin xüsusi xidmət orqanları şpionaj olayının üstünü açıblar. Ermənistanın təhlükəsizlik orqanlarına istinadən bildirilir ki, Azərbaycan kəşfiyyatı bu işə erməni casusları Türkiyə ərazisindən istifadə edərək cəlb edib.
Qeyd edilir ki, adı hələ məlum olmayan bir şəxs Türkiyə ərazisində özünü Ermənistan xüsusi xidmət orqanlarının işçisi kimi qələmə verib və tanışlığı yaranmış Ermənistan vətəndaşından həmin ölkə ilə bağlı bir çox mühüm məlumatı əldə edib. Məlumatlar sırasında hərbi hissələrlə bağlı bilgilərin olduğu vurğulanır və qeyd edilir ki, bu məlumat mübadiləsi 2011-2018-ci illər ərzində aparılıb. Qeyd edilir ki, məxfi məlumatlar Azərbaycan tərəfinin əlinə keçib və bu, Ermənistanın suverenliyinə olan zərbə kimi qeydə alındığı üçün, cinayət məcəlləsinin müvafiq maddələri ilə cinayət işi başlanıb.
Bu məlumatı Ermənistanın növbəti nağıl ssenarisi kimi qəbul edə bilərikmi?
Elşən Həsənov: “Türkiyənin beynəlxalq imicinə kəşfiyyat üçün açıq plasdarm olan ölkə kimi ləkə yaxmaq istəyirlər”
Təhlükəsizlik qurumlarının sabiq əməkdaşı Elşən Həsənov qəzetimizə açıqlamasında bildirdi ki, yayılan məlumatın özündə kifayət qədər ziddiyyətli məqam var: “Əvvəla onu qeyd edim ki, hansısa üçüncü ölkənin ərazisindən istifadə etməklə, üçüncü ölkənin vətəndaşlarının köməkliyi ilə başqa bir ölkəyə qarşı kəşfiyyat işlərinin görülməsi praktikası geniş yayılıb. Konkret olaraq bu halı nəzərdə tutmuram. Çünki bunun Ermənistanın hansısa uydurma oyunu olduğunu da zənn edirəm. Ümumən götürdükdə isə bizim Ermənistanla bağlı müəyyən kəşfiyyat hərəkətləri həyata keçirməyimiz normaldır. Çünki, faktiki olaraq, biz həmin ölkə ilə düşmənik və aramızda müharibə gedir. Müharibə deyəndə yalnız səngəri nəzərdə tutmuram. Söhbət həm də informasiya və kəşfiyyat müharibəsindən gedir. Biz və ya Ermənistan desə ki, belə fəaliyyətə üstünlük vermir, inandırıcı görünməz. Çünki müharibənin şərtləri belə bir fəaliyyətin zəruriliyini diqtə edir. Ancaq görürsünüz ki, həmin məlumatın Türkiyədə kimin tərəfindən əldə olunması qeyd edilmir. Deyilir ki, Ermənistan vətəndaşına özünü həmin ölkənin xüsusi xidmət orqanlarının əməkdaşı kimi təqdim edib. Ortada 8 illik əməkdaşlığı olduğu bildirilir. Hər halda, yalnız özünü Ermənistanın xüsusi xidmət orqanlarının işçisi kimi təqdim etmək bu məsələdə kifayət etmir ki, hansısa erməni gətirib materialları həmin şəxsə versin. Bunun üçün həmin şəxsin erməni dilini bilməsi, üstündə müəyən sənədlərin olması və həqiqətən erməni olduğunu təsdiq edə biləcək elə dəlillər olmalıdır ki, digər ermənini inandıra bilsin. Mən burda başqa detalların olduğunu ehtimal edə bilərəm. Ola bilər ki, hər iki şəxs həqiqətən Ermənistan xüsusi xidmət orqanlarının əməkdaşı olub və Türkiyədə öz xeyirlərinə şpionaj həyata keçiriblər. İfşa olunduqları üçün, mövzunu bu şəkildə yayındırırlar. Başqa versiyam isə budur ki, məqsədli şəkildə Azərbaycana yaxın olan qardaş ölkənin adını hallandırırlar. Türkiyənin beynəlxalq imicinə kəşfiyyat üçün açıq plasdarm olan ölkə kimi ləkə yaxmaq istəyirlər”.
Məhəmmədəli QƏRİBLİ
