Azərbaycan Xarici İşlər Nazirliyi (XİN) Şuşa şəhərinin işğalının 27-ci ildönümü ilə əlaqədar bəyanat yayıb. Bəyanatda bildirilir ki, 1992-ci il mayın 8-də Ermənistan Respublikasının silahlı qüvvələri tərəfindən Azərbaycanın tarixi şəhəri olan Şuşa işğal olunub: “İşğalı nəticəsində Şuşa şəhəri və rayonun 30 kəndi dağıdılıb, 195 nəfər dinc sakin həlak olub, 165 nəfər yaralanıb, 58 nəfər itkin düşüb, 24 mindən çox əhali etnik təmizləməyə məruz qalıb...”.
XİN-in yaydığı bəynatda diqqətçəkən vacib məqamlardan biri də budur ki, işğalçı Ermənistan tərəfinin işğal etdiyi Şuşa şəhərində qanunsuz məskunlaşma aparması da sübuta yetirilir: “Beynəlxalq humanitar hüququn tələblərinə zidd olaraq, Şuşanın işğalı zamanı aparılmış etnik təmizləmənin ardınca orada Azərbaycan tarixi-mədəni mirasının məhv edilməsi və tədricən şəhərin mədəni simasının dəyişdirilməsinə yönəldilən cəhdləri etməkdədir. Belə ki, Şuşada qeyri-qanuni məskunlaşma aparılmaqla, təqribən 4 min nəfər yerləşdirilib. Qarabağ hökmdarı İbrahim xanın qızı Gövhərağanın sifarişi ilə tikilən Yuxarı Gövhərağa (Cümə) məscidi ermənilər tərəfindən “bərpa” olunaraq fars məscidi kimi qələmə verilir. Bütün bunlar işğalçı tərəfin Şuşanın əzəli Azərbaycan şəhəri olması faktının üzərinə kölgə salmaq niyyətini açıq şəkildə nümayiş etdirir”.
Göründüyü kimi, bəyanatda ermənilərin Şuşanı işğal etdikləri və bütövlükdə, azərbaycanlıların yaşadıqları şəhərlərdə məskunlaşma apardıqları konkret olaraq əksini tapır. Sülh danışıqlarına sadiqlik imitasiyası edən bir ölkənin “əbədi işğala” hesabladığı bu cür addımlarına beynəlxalq birlik niyə reaksiya vermir?
Akif Nağı: “Özü də Ermənistanın üzərinə öhdəlik qoyan bir qərardan söhbət getməlidir”
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, bu olduqca ciddi faktdır: “Bununla bir daha sübut olunur ki, ermənilər heç bir güzəştə hazır deyillər. Əksinə, tarixi Azərbaycan şəhərlərində də süni məskunlaşma aparıb, hətta həmin yerlərin tarixini də saxtalaşdırmağa cəhd edirlər. İşğalı daimi etmək üçün hər vasitəyə əl atırlar. Hətta bu yöndə saxta kitablar da yazırlar. Görürsünüz ki, Dağlıq Qarabağın vuran ürəyi olan Şuşanı da öz tör-töküntüləri ilə doldururlar. Bizim XİN 4 min nəfərin məskunlaşdığını yazırsa, deməli, onlar məsələni tam ciddiləşdiriblər. Azərbaycan, mütləq mənada, bu məsələni beynəlxalq təşkilatların qarşısında qaldırmalıdır. Onlar da bu məsələyə ciddi şəkildə reaksiya verməlidirlər. Əgər reaksiya verməsələr, bunu tam ictimailəşdirmək lazımdır və bu fakt ermənilərə göstərilən havadarlıq kimi qeyd edilməlidir. Dağlıq Qarabağın ərazisində Şuşa qarışıq 57 yaşayış məntəqəsi olub. Onların hər biri ilə bağlı bu araşdırma aparılmalıdır. Dağlıq Qarabağ bütövlükdə bizə məxsusdur, ancaq bu 57 məntəqədə, ümumiyyətlə, ermənilər yaşamayıb. Bu məntəqələrin hər biri ilə bağlı beynəlxalq təşkilatların qərarı olmalıdır. Özü də elə belə qərar yox, Ermənistanın üzərinə öhdəlik qoyan bir qərardan söhbət getməlidir. Bu hədəfə çatana kimi Azərbaycan addımlarını atmalıdır. Çox təəssüflər olsun ki, bu yöndə olan səylərimiz nəticə vermir. Beynəlxalq təşkilatlar hətta bu cür faktlarla da bağlı seyrçi mövqe tutmağa üstünlük verirlər. Ermənistan nəinki Dağlıq Qarabağın hüdudlarında, hətta ondan kənarda belə məskunlaşma siyasəti aparır. Laçında, Qubadlıda, Kəlbəcərdə və başqa ərazilərimizdə də belə faktlar çoxdur. Belə bir acı reallıq qarşısındayıq. Bu bir daha göstərir ki, bizim beynəlxalq təşkilatlardan nəsə gözləməyimiz yersizdir. Sözü Azərbaycan Ordusu deyib həmin əraziləri işğaldan azad etməlidir. Çıxış yolu budur”.
Məhəmmədəli QƏRİBLİ
