ABŞ Dövlət Departamentinin rəsmisi Corc Kent İrəvanda keçirdiyi mətbuat konfransında maraqlı açıqlamalar verib. O bildirib ki, ABŞ qonşuları ilə sülh şəraitində yaşayan Ermənistanla əməkdaşlıqda maraqlıdır. ABŞ diplomatına Paşinyan-Tramp görüşü barədə müzakirələrin aparılıb-aparılmadığı ilə də bağlı sual verilib.
Diplomat Baş nazir və digər yüksək çinli məmurlarla görüşdə geniş spektri əhatə edən məsələlər ətrafında fikir mübadiləsinin aparıldığını deyib. Ancaq maraqlıdır ki, ABŞ və Ermənistan rəhbərlərinin görüşünün nəzərdə tutulub-tutulmadığı ilə bağlı suala cavab verməkdən yayınıb.
Qeyd edək ki, Ermənistanla ABŞ arasındakı danışıqlar son vaxtlar yalnız Departament rəsmiləri səviyyəsində aparılır. Artıq bir neçə belə görüş keçirilib. Diplomatın keçirdiyi mətbuat konfransından iki vacib nəticəni çıxarmaq olar. ABŞ Ermənistana açıq şəkildə deyir ki, qonşularla sülhə getsin. Təbii ki, burada qonşu deyiləndə Azərbaycan nəzərdə tutulur. Bənzər bəyanatı yüksək çinli ABŞ rəsmisi Bolton da İrəvana etdiyi səfər zamanı səsləndirmişdi. İkinci vacib məqam isə budur ki, Tramp hələ də Paşinyanla görüşmək istəmir və ABŞ, ümumiyyətlə, Ermənistanla yüksək səviyyədə əlaqə qurmaqda maraqlı deyil. Bu qənaətləri nə dərəcədə əsaslı saymaq olar?
Yeganə Hacıyeva: “Bu, əslində, sadəcə bir tövsiyə deyil, eyni zamanda, Nikol Paşinyan hökumətinin qarşısına əməkdaşlıqla bağlı qoyulan vacib şərtdir”
Politoloq Yeganə Hacıyeva “Bakı-Xəbər”ə açıqlamasında bildirdi ki, Nikol Paşinyan hakimiyyətə gələndən sonra ABŞ-ın onlarla münasibətində yaxın qonşularla mehriban şəraitdə yaşamaq kimi tələbi prioritet təşkil edir: “Biz bu qeydi Trampın Paşinyana müstəqillik günü ilə bağlı ünvanladığı təbrik məktubunda da oxuduq. Bunun ardınca Boltonun fikirlərində buna rast gəldik. Bu da Departament rəsmisinin dedikləri. Bu, əslində, sadəcə bir tövsiyə deyil, eyni zamanda, Nikol Paşinyan hökumətinin qarşısına əməkdaşlıqla bağlı qoyulan vacib şərtdir. Ermənistan bunun fərqinə varır və bilir ki, söhbət nədən gedir. Hesab edirəm ki, ABŞ bu şərtinin arxasında sona qədər duracaq. Nikol Paşinyanın Tramp tərəfindən qəbul edilməməsi isə dəqiqdir. Bu, yaxın zamanlarda nəzərdə tutulmadığına görə ABŞ rəsmisi İrəvanda ona bu yöndə verilən sualı cavabsız buraxıb. Bunun səbəbi də bəllidir. Çünki Paşinyan hakimiyyətə gələndən sonra ard-arda çoxlu səhv buraxıb. Bu səhvlər yalnız Dağlıq Qarabağla bağlı məsələlər ətrafında gedən müzakirələrdə buraxılmayıb. Bir çox başqa detallar da mövcuddur. Burada daxili faktorlar da var. ABŞ görür ki, demokratiya şüarı altında hakimiyyətə gələn Paşinyan, əslində, başqa fəaliyyətlə məşğuldur. Artıq görünür ki, korrupsiya ilə barışmaz adam imici yaradan Paşinyanın öz ailəsinin adı korrupsiyada hallanır. Onun həyat yoldaşının adı 1,5 milyradlıq korrupsiya qalmaqalında hallandı. Qısa bir müddət üçün bu qədər varidatı toplamaq doğrudan da təəccüb doğurur. Bunu çox ciddi qurumlar təqdim edib. Avropa Birliyinin rəsmi sənədlərində bu məlulamt qeyd olunub”.
Politoloqun sözlərinə görə, Paşinyanın özünü bu tərzdə göstərməsi ABŞ-ın etibarını tamamilə sarsıdıb: “Gəlin Nikol Paşinyanın son üç ayda qəbul etdiyi qərarlara baxaq. İfadə azadlığının boğulması istiqamətində qərar qəbul edib. Söhbət sosial medianın nəzarətə götürülməsi ilə bağlı addımların atılması və bu istiqamətdə yeni qanunun qəbul ediləcəyindən gedir. ABŞ rəhbərliyinin Paşinyanı təhlükəli və stabil olmayan siyasətçi kimi qəbul etməsi üçün xeyli əsas var. Bu dəqiqə Ermənistan hakimiyyəti və ABŞ-dakı erməni lobbisinin can atdığı məsələlərdən biri Paşinyanın, heç olmasa, ABŞ-ın dövlət katibi səviyyəsində qəbul edilməsidir. Heç buna da nail ola bilmirlərsə, deməli, Trampla görüş, ümumiyyətlə, müzakirə mövzusu ola bilməz”.
Məhəmmədəli QƏRİBLİ
