Gürcüstandan Azərbaycana yönələn sərhəd və ərazi iddiaları hər gün yeni formada özünü büruzə verməyə başlayıb. Bu xüsusilə də Salome Zurabişvilinin prezident seçilməsindən sonra daha intensiv hal alıb. Hər iki ölkədən yaranmış vəziyyətə etiraz səsləri qaldırılsa da, sanki prosesi qızışdırmaqda olan maraqlı qüvvələrin fəallığı nəzərə çarpır.
İndi də Azərbaycan-Gürcüstan sərhədinin Keşikçidağ monastır kompleksinin yerləşdiyi hissəsində gürcü vətəndaş fəalları toplaşaraq aksiya keçiriblər. Fəallar əl-ələ tutaraq monastır kompleksinin sərhədin Azərbaycan tərəfində qalan hissəsini əhatəyə alıblar. Fəalların bildirdiyinə görə, onların məqsədi kompleksin Gürcüstanın tərkibində olduğuna dair Azərbaycana mesaj verməkdir. Aksiyada iştirak edənlər gürcü milli mahnıları oxuyublar. Onlar bir neçə kilometr piyada yol qət edərək monastır kompleksinə gəliblər. Kompleksə aparan cığırların bəzilərində Azərbaycan sərhədçiləri dayanıb, onlar situasiyaya müdaxilə etmədən vəziyyəti izləyiblər. Perimetr boyu gürcü sərhədçiləri də dayanıb və onlar fəalların hərəkətinə nəzarət ediblər. Aksiyanı “Güc birlikdədir” adlı hərəkat təşkil edib. Hərəkatın rəhbəri David Katsarava bildirib ki, onlar belə aksiyaları müntəzəm olaraq təşkil edəcəklər.
Xatırladaq ki, Keşikçidağ monastır kompleksi ilə bağlı məsələ aprelin 25-də Azərbaycan sərhədçilərinin gürcü ziyarətçilərinin kompleksə ziyarətini məhdudlaşdırmasından sonra gündəmə gəlib. Daha sonra iki ölkə xarici işlər nazirlikləri məsələni yoluna qoyublar və sərhədlərin demarkasiyasına dair danışıqlara hazır olduqlarını bildiriblər.
Bundan əvvəl Gürcüstanın Baş naziri Mamuka Baxtadze deyib ki, Gürcüstan-Azərbaycan sərhədində razılaşdırılmayan ərazilərin delimitasiyası və demarkasiyası prosesi mürəkkəb olacaq, lakin son nəticə uğurlu olacaq.
Azərbaycan XİN-in mətbuat katibi Leyla Abdullayeva bundan əvvəl demişdi ki, Azərbaycan həmişə Azərbaycan-Gürcüstan sərhədinin tezliklə delimitasiya olunmasının tərəfdarı olub və bu prosesi ən qısa müddət ərzində başa çatdırmağa hazırdır.
Lakin Bakının obyektiv mövqeyinə baxmayaraq, gürcü tərəf inadla sərhədlərin dəqiqləşdirilməsini tezləşdirməyə çağırır. Hətta Gürcüstanın din xadimləri də qədim alban kilsəsinə iddialarını davam etdirir, konflikt yaratmağa cəhd göstərirlər.
Qeyd edək ki, Dövlət Sərhəd Xidmətinin (DSX) rəisi general-polkovnik Elçin Quliyev və Gürcüstan Sərhəd Polisinin rəisi Teymuraz Kekelidzenin başçılıq etdiyi nümayəndə heyətlərinin “Şəmkir” sərhəd dəstəsinin xidməti ərazisində, dövlət sərhədində işçi görüşü keçirilib. DSX-nin Mətbuat mərkəzindən verilən məlumata görə, görüş zamanı Azərbaycan-Gürcüstan dövlət sərhədində əməliyyat şəraiti, sərhəd təhlükəsizliyinə qarşı təhdidlərlə birgə mübarizə aparılması, məlumat və təcrübə mübadiləsinin davam etdirilməsi, əməkdaşlıq əlaqələrinin inkişaf etdirilməsi məsələləri müzakirə olunub.
Tərəflər ikitərəfli əməkdaşlığın inkişaf dinamikasını müsbət qiymətləndiriblər, Azərbaycan və Gürcüstan sərhəd qurumları arasında mövcud münasibətlərin səviyyəsinin dövlət sərhədində qanunsuz fəaliyyətlərin qarşısının alınması üzrə məsələlərin birgə həll edilməsinə töhfə verdiyini vurğulayıblar.
Azər Süleymanov: “Təəssüf ki, bugünkü hakimiyyət Rusiya və Ermənistandan dəstəklənən həmin separatçıların diqtəsilə hərəkət edir”
Bütün bu tədbirlərə baxmayaraq, Gürcüstan tərəfdən Azərbaycana yönəlik ərazi iddialarının irəli sürülməsinin səngiməməsi maraqlı versiyanı ortaya çıxarmış olur. Məhz bu məqama aydınlıq gətirmək üçün Gürcüstan parlamentinin deputatı Azər Süleymanovla əlaqə saxladıq. O, “Bakı-Xəbər”ə eksklüziv açıqlamasında bildirdi ki, sərhədlə bağlı qalmaqalın tarixi yeni deyil: “Gürcüstanda hakimiyyətə İvanaşvilinin komandası gələndən sonra, demək olar ki, azərbaycanlılara qarşı tamamilə fərqli münasibət sərgilənməyə başladı. Onlar Azərbaycan tarixini və bizim millətin dərdini bilmədikləri üçün, belə addımlar atmaqla prosesləri 90-cı illərə doğru qaytarmağa başladılar. Son zamanlar sərhəd məsələsinin yenidən qızışması Salome Zurabişvilinin prezident seçilməsindən sonra sürətləndi. O, sərhədə gedib, heç də prezidentə yaraşmayan tərzdə bəyanatlar verdi. Sərhədə yaxın yerdə olan kilsənin Gürcüstana aid olduğunu bildirdi. Bu gün “Gürcü arzusu” partiyası azərbaycanlılara qarşı çox sərt siyasət yürdür. Zurabişvilini biz prezident kimi görmürük. Çünki əhalinin böyük əksəriyəti ona qarşı səs verib. Elə fəaliyyətində də göstərir ki, o, yalnız İvanaşvilinin prezidenti rolunda çıxış edir, onun dediyi ilə oturub-durur. Onun Gürcüstanda yaşayan azərbaycanlılar və başqa profilli bəyanatları qıcıq doğurur. Bu adam deyir ki, Abxaziya Gürcüstan üçün qanqrenadır, kəsib atmaq lazımdır. Əminliklə deyə bilərəm ki, Zurabişvili bu hərəkətləri prosesləri qızışdırmaqda olan 3-cü qüvvənin təhriki ilə edir. Həmin 3-cü qüvvə həm İvanaşvilini, həm də Zurabişvilini öz təsiri altına salıb. Artıq biz bunu yalnız sərhədlə bağlı məsələdə deyil, həm də digər vacib sahələrdə hiss edirik. Gürcüstan bazarında monopolist olan SOCAR artıq Rusiyanın şirkətləri tərəfindən sıxışdırılmağa başlayıb. Bizim xalqlarımız arasında problem ola bilməz. Biz əsrlərdir yanaşı yaşayırıq. Bizim problemimiz separatçı qüvvələrlə olub. Təəssüf ki, bugünkü hakimiyyət Rusiya və Ermənistandan dəstəklənən həmin separatçıların diqtəsilə hərəkət edir. Gürcüstanın sabiq məmurları və siyasiləri tərəfindən səsləndirilən bəyanatlar da İvanaşvilinin təhriki ilə olub. Mən hər iki dövlətin rəsmilərinə səslənərək deyirəm ki, təxribatların qarşısını almaq istiqamətində səylərini artırsınlar. Heç vaxt istəmirik ki, bu iki xalq və dövlət arasında narazılıq baş qaldırsın”.
Məhəmmədəli QƏRİBLİ
