Şakir Ağayev: “Görünür bu Trampın xarici siyasətinə qarşı bir etirazdır ki, səfir belə bir addım atır”
“Financial Times”ın mənbələrə istinadən yaydığı məlumata görə, ABŞ-ın Ukraynadakı diplomatik missiyasının rəhbəri Trampla fikir ayrılığına görə istefa verib. ABŞ-ın Ukraynadakı müvəqqəti işlər vəkili Culi Devisin yaxın həftələrdə Kiyevi tərk edəcəyi bildirilir.
Nəşrin məlumatına görə, Devis ABŞ Prezidenti Donald Trampın Ukraynaya dəstəyin azaldılması ilə bağlı mövqeyi ilə razılaşmır.
Bildirilib ki, diplomat artıq qərarı barədə Dövlət Departamentini məlumatlandırıb və 30 illik karyerasını başa vuraraq diplomatik xidmətdən getməyi planlaşdırır.
Culi Devis 2025-ci ilin mayından ABŞ-nin Ukraynadakı diplomatik nümayəndəliyinə rəhbərlik edirdi. Onun sələfi Bricit Brink də Trampın Ukrayna siyasəti ilə razılaşmadığı üçün istefa vermişdi.
C.Devisin istefası əslində Trampın Ukrayna siyasətinə etiraz deyilmi?
“Novoye vremya” qəzetinin baş rekatoru Şakir Ağayev baki-xeber.com-a bildirdi ki, deyilənlərə görə, o, Trampın Ukrayna siyasətinə etiraz olaraq öz vəzifəsini tərk edir. “Hesab edirəm ki, Devisin bu addımı Trampın təkcə Ukrayna ilə bağlı yürütdüyü siyasətlə bağlı deyil, həm də başqa məsələlərlə də bağlıdır. Çünki Tramp artıq ikinci ildir ki, Ukrayna ilə əlaqədar eyni siyasət aparır. Görünür, diplomat bu addımı Trampın xarici siyasətinə etiraz olaraq atıb. Son dövrlərdə Tramın xarici siyasətində ən uğursuz addım İrana qarşı müharibə aparmasıdır. Amerika cəmiyyəti bundan çox narazıdır. Ümumiyyətlə, belə görsənir ki, Tramp apardığı siyasətdə heç kimlə hesablaşmır, özü bildiyi kimi siyasət aparır”.
Ş.Ağayevin sözlərinə görə, Tramp hakimiyyətə Amerikanı daha böyük etmək, iqtsadiyyatını, enerji resurslarını inkişaf etdirmək, infilyasiyanı azaltmaq, qiymətləri aşağı salmaq, heç bir ölkəyə hücum etməmək, qoşun yeritməmək, sülh yaratmaq təşəbbüsü ilə gəlmişdi, amma onun fəaliyyəti tamamilə əks istiqamətdə oldu. Ş.Ağayev qeyd etdi ki, istər Venesuela hadisəsi, istər İrana qarşı apardığı müharibə onun verdiyi sözün əksinə getdiyini göstərir. “Diplomat Devis Dövlət Departamentinin əməkdaşıdır. Dövlət Departamenti də xarici siyasət həyata keçirir. Görünür bu Trampın xarici siyasətinə qarşı bir etirazdır ki, səfir belə bir addım atır. Təkcə Ukraynadakı diplomat deyil, görünür ABŞ elitasında Trampın apardığı siyasətə qarşı narazı qüvvələr var ki, onlar bu addımları atırlar”-deyə Ş.Ağayev qeyd etdi.
İradə SARIYEVA
