Ramil Məmmədli: “Çexiya və Azərbaycan birgə artilleriya sistemləri, sursat istehsalını qura bilər”
Biz Çexiyadan hərbi təyinatlı bir çox məhsullar alırıq və indiki mərhələdə birgə istehsalla bağlı konkret layihələr üzərində danışıqlar gedir. Bu sözləri Prezident İlham Əliyev Çexiyanın Baş naziri Andrey Babişlə mətbuata bəyanatında deyib.
Bu sahənin də çox genişmiqyaslı olacağına əminliyini bildirən dövlət başçısı qeyd edib: “Çünki Azərbaycan öz müdafiə potensialını, o cümlədən yerli istehsal hesabına təmin edir və gələcəkdə bu sahədə böyük təcrübəsi olan Çexiya kimi ölkələrlə bizim müştərək işlərimiz xüsusi önəm daşıyır”.
Maraqlıdır, Azərbaycan Çexiya ilə birgə hansı hərbi məhsulları istehsal edə bilər? Konkret hansı sahələrdə perspektivlər var?
Sözügedən məsələyə aydınlıq gətirən hərbi ekspert Ramil Məmmədli baki-xeber.com-a açıqlamasında bildirdi ki, Azərbaycanın Çexiya ilə hərbi sahədə əməkdaşlığı uzun illərdir mövcuddur: “Hələ 44 günlük Vətən müharibəsindən əvvəl Azərbaycan Çexiyadan bir sıra artilleriya sistemləri və onun mərmilərini alıb. Söhbət "Dana" tipli özüyeriyən haubitsalardan gedir. O cümlədən, digər hərbi təyinatlı məhsulların satınalmasını həyata keçirib. Artıq Azərbaycanla Çexiya arasında hərbi sahədə əməkdaşlığın bazası formalaşdırılıb. Hesab edirəm ki, sözügedən əməkdaşlıq daha dərin forma ala bilər. Azərbaycanın müdafiə sənayesi təmsilçiləri çexiyalı həmkarları ilə birlikdə ortaq layihələrin həyata keçirilməsini təmin edə bilər. Nəzərə almaq lazımdır ki, Çexiya post-sosialist ölkəsi olmaqla yanaşı, həm də Qərb texnologiyalarını mənimsəmiş ölkədir. Deməyim odur ki, Çexiyanın müdafiə sənayesi həm NATO standartlarını, həm də sovet platformalarını özündə ehtiva edir. Buna uyğun birgə istehsalı qurmaq olar. Çexiya hərbi sənayesi əsasən artilleriya sistemləri, zirehli texnika və sursat istehsalında ixtisaslaşıb. Hər iki ölkənin müdafiə sənayesi müəssisələri bu istiqamətdə ixtisaslaşıblar. Bu baxımdan hesab edirəm ki, Çexiya və Azərbaycan birgə artilleriya sistemləri, sursat istehsalını qura bilər. Çexiya ilə əməkdaşlıq Azərbaycanın hərbi arsenalını keyfiyyət baxımından diversifikasiya etmək üçün faydalıdır. Bu, xüsusilə aşağı və orta texnologiyalı sahələrdə ciddi nəticələr verə bilər. Bununla yanaşı, iki ölkə hərbi sənayesi aviasiya vasitələrinin avadanlıqlarını, detallarını birgə istehsal edə bilər. Ümumilikdə, həm artilleriya sistemləri, həm reaktiv yaylım atəş sistemləri, həm də zirehli texnikaların istehsalı ilə bağlı bir sıra layihələrin həyata keçirilməsi mümkündür. Bu, həm Çexiya, həm də Azərbaycan müdafiə sənayesi kompleksləri üçün olduqca əhəmiyyətli imkanlar yaradacaq. Yəni Azərbaycan həm regionun, həm də dünyanın bir sıra ölkələri üçün müdafiə sənayesi məhsulu istehsal edən əsas dövlətlərdən biridir. Çexiya da sırada yer aldığı üçün, birgə layihələrin perspektivi böyükdür”.
Vidadi ORDAHALLI
