Məhərrəm Zülfüqarlı: “Makronun bu təklifinin İran və ABŞ tərəfindən qəbul ediləcəyinə inanmıram”
Fransa prezidenti Emmanuel Makron ABŞ prezidenti Donald Trampı və İranı Hörmüz boğazını açmağa inandırmaq üçün səylər göstərdiyini bildirib. BFMTV-nin məlumatına görə, o, bu açıqlamanı 27 aprel bazar ertəsi günü Andorra səfəri zamanı verib.
Makron Livana da şamil edilən mövcud atəşkəsi alqışlayıb və Hörmüz boğazında gəmiçiliyin bərpası üçün əlindən gələni etdiyinə əminlik verib.
“Bu atəşkəs və danışıqlar zamanı gəmiçiliyin normal bərpasını təmin etmək üçün əlimizdən gələni edirik”, - deyə Fransa prezidenti bildirib.
Yanacaq qiymətlərinin artması nəzərə alınmaqla, Makron "problemi kökündən həll etməyə" və Hörmüz boğazını açmağa çağırıb.
O, həmçinin amerikalı həmkarı ilə danışaraq boğazı açmağa razı saldığını da bildirib.
Xatırladaq ki, ötən həftəsonu Tramp amerikalı danışıqçılar Stiv Vitkoff və Cared Kuşnerin İranla danışıqlar aparmaq üçün Pakistana səfər etməyəcəyini açıqlamışdı.
Tramp bildirib ki, İran müharibəyə son qoymaq üçün ABŞ-a zəng edə bilər.
Bazar günü Tramp bildirib ki, Amerika blokadası nəticəsində daha da ağırlaşan texniki problemlər səbəbindən İranın neft infrastrukturu təxminən üç gün ərzində partlaya bilər.
Makronun nüfuzu, gücü, sözü hər iki ölkə üçün nə qədər yetərli ola bilər ki, onlar Hörmüz boğazını açsınlar? Onlar Makronu eşidərlərmi, eşidəcəklərmi?
Tarix elmləri doktoru, professor, siyasi icmalçı Məhərrəm Zülfüqarlı baki-xeber.com-a bildirdi ki, İran və ABŞ rəhbərlərinin Makronu eşidəcəkləri inandırıcı görsənmir. “Bu yalnız Makronun öz nüfuzunu qaldırmaq üçün irəli sürdüyü bir fikirdir. Onun nə ABŞ, nə də İran rəhbərliyi yanında heç bir nüfuzu yoxdur. Makronun bu təklifinin İran və ABŞ tərəfindən qəbul ediləcəyinə inanmıram. Dediyim kimi, Makronun heç bir nüfuzu yoxdur. Hətta öz ölkəsində də elə bir nüfuzu yoxdur. Ona qarşı irəli sürülən tənqidi fikirləri təkrarlamaq istəmirəm. Həm Amerikada, həm də Avropada ona qarşı çox geniş fikirlər yayılır. Qaldı, onun özünü sülhpərvər kimi göstərməsinə, bir azərbaycanlı olaraq unutmamalıyıq ki, Azərbaycanla Ermənistan arasında münasibətlərin normallaşmasına və Cənubi Qafqazda sülhün bərqərar olmasına ən çox əngəl törədən dövlət Fransadır və onun prezidenti Makrondur. Yəni Ermənistanı bizə qarşı yönəltmək, düşmənçiliyi qızışdırmaq, münaqişəni yenidən alovlandırmaq məqsədi güdən bir siyasət yeridir. Amma özlərini guya insan haqlarının qoruyucusu kimi qələmə verirlər. Yəni bu Avropa ölkələrin keçən əsrdən gələn siyasətidir ki, həmişə özlərin inperialist siyasətlərinə sülhpərvər don geydirməyə çalışırlar. Bu da XXI əsr üçün məqbul olan bir şey deyil. Qaldı Hörmüz boğazına, bu boğaz o zaman açılar ki, Amerikanın və İsrailin İrana qarşı təcavüzü dayansın. Azərbaycan da burada maraqlıdır ki, qonşu dövlət olan İranda sülh bərqərar olsun. Çünki təcavüzdən ən çox əziyyət çəkən dinc əhalidir, uşaqlardır, qadınlar. Vicdanı olan heç bir şəxs müharibəni arzulamaz. Ancaq böyük dövlətlər və onların başçılarıdır ki, dünyada davam etdirdikləri bu siyasətlə müharibəni qızışdırmaqla məşğuldurlar”.
M.Zülfüqarlı qeyd etdi ki, indiki dövrdə ABŞ və İsrail rəhbərliyi İrana qarşı başlatdıqları müharibədə səhv etdiklərini görürlər. M.Zülfüqarlı hesab edir ki, Makron və digəriləri sülh siyasətini dəstəklədiklərini deyirlərsə onda qızışdırıcılıqdan, dövlətləri bir-birinə qarşı qoymaq siyasətdən əl çəksinlər.
İradə SARIYEVA
