Əli Orucov: “Bir sıra post-sovet ölkələri Rusiyadan çəkinərək Ukrayna ilə münasibətdə məsafəli davranırlar”
Prezident İlham Əliyev Ukrayna Prezidenti Volodimir Zelenski ilə mətbuata bəyanatında bildirib ki, son dörd ildə yeddi görüşün keçirilməsi gözəl göstəricidir:
“Son dörd il ərzində prezidentlər səviyyəsində yeddi görüşün keçirilməsi, - sonuncu görüş iki ay bundan əvvəl Münhen şəhərində olmuşdur, - gözəl göstəricidir. Bu, əlaqələrimizin nə qədər dinamik olmasından xəbər verir. Biz bu gün qarşılıqlı hörmətdən, qarşılıqlı maraqların təmin edilməsindən danışırıq. Əminəm ki, bugünkü səfər Azərbaycan-Ukrayna dostluq əlaqələrinin inkişafına növbəti mühüm töhfə olacaqdır”.
Sözügedən məsələni baki-xeber.com-a şərh edən AMİP funksioneri Əli Orucovun fikrincə, Azərbaycan MDB məkanında nadir ölkələrdəndir ki, müharibə başlayandan sonra Ukrayna ilə sıx əlaqələrə malikdir: “Məsələn, Azərbaycan MDB-də yeganə ölkədir ki, Ukraynaya humanitar yardım göstərir. İrpen şəhərinin bərpa edilməsində bu və ya digər formada iştirak edir. Məsələ ondadır ki, Rusiya 2022-ci ilin fevralında Ukraynaya qarşı müharibəyə başladıqdan sonra bir sıra post-sovet ölkələri Ukrayna ilə münasibətdə məsafəli davranırlar. Əsas səbəb odur ki, Ukrayna ilə hansısa təmas Rusiyanın xoşuna gəlməyəcək. Hətta Ukraynanın ərazi bütövlüyü məsələsində belə, konkret mövqe ortaya qoymaqdan çəkinir və ehtiyat edirlər. Ancaq Azərbaycanın sözügedən məsələdə mövqeyi birmənalıdır və bunu rəsmi səviyyədə dəfələrlə bəyan edib. Müharibə başlayandan sonra Azərbaycan Ukraynaya bir neçə dəfə humanitar yardım göstərib. Beynəlxalq tədbirlərdə Prezident İlham Əliyev bir neçə dəfə həmkarı Zelenski ilə görüşlər keçirib. Əlbəttə ki, bütün bunlar Azərbaycan-Ukrayna əlaqələrinin dinamikliyini, önəmini ortaya qoyur. Düzdür, müharibədən sonra Azərbaycanın Ukrayna ilə ticarət dövriyyəsi azalıb. Ancaq bu, sırf obyektiv amillərlə əlaqədar olan məsələdir. Ona görə ki, ölkə müharibə şəraitində olduğu üçün əvvəlki nəqliyyat zənciri qırılıb. Hesab edirəm buna da təbii yanaşmaq lazımdır. Zelenskinin Azərbaycana səfəri bir daha göstərdi ki, ölkəmiz həm regionun lider dövlətidir, həm də Ukrayna üçün önəmli əhəmiyyətə malikdir”.
Vidadi ORDAHALLI
