Azər Həsrət: “Düşünmürəm ki, Zelenskinin səfəri Rusiya-Azərbaycan münasibətlərini gərginləşdirsin”
Ukrayna Prezidenti Volodimir Zelenskinin Azərbaycana səfəri Bakı-Kiyev münasibətlərinin çoxşaxəli və dərin mahiyyətini bir daha nümayiş etdirdi. Bu səfər təkcə diplomatik protokol çərçivəsində baş tutan görüşlərlə məhdudlaşmır, həm də iki ölkə arasında uzun illərə söykənən strateji tərəfdaşlığın yeni mərhələsini formalaşdıran mühüm siyasi hadisə kimi qiymətləndirilir.
Mövcud reallıqlar fonunda bu səfər həm regional, həm də beynəlxalq kontekstdə diqqətlə təhlil olunur və onun nəticələri yalnız bugünkü deyil, gələcək əməkdaşlıq perspektivlərini də müəyyənləşdirir.
Bütün bunların fonunda, Rusiyanın Zelenskinin Azərbaycana məlum səfərindən sonra siyasəti necə olacaq? Nəzərə almaq lazımdır ki, Zelenskinin səfəri, Azərbaycan-Rusiya siyasi münasibətlərində normallaşmanın olduğu bir dövrə təsadüf edir. Belə bir fikir var ki, bu səfərdən sonra Moskva-Bakı münasibətlərində iki variantdan biri ola bilər. Ya Azərbaycanla Rusiyanın münasibətləri yenidən gərginləşə bilər. Ya da Azərbaycanla Rusiyanın münasibətlərində başlanan yumuşalma, isinişmə tempi davam edə bilər. Maraqlıdır, bəs ekspertlərin bütün bu deyilənlərlə bağlı dəyərləndirməsi nədən ibarətdir?
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, əslində Zelenskinin Azərbaycana səfərini Rusiya-Ukrayna müharibəsini bitirmək üçün bir fürsətə çevirmək lazımdır: “Prezidenti Volodimir Zelenski öz dili ilə dedi ki, Azərbaycanın vasitəçiliyi ilə Rusiya ilə görüşməyə hazırdırlar. Hesab edirəm ki, Rusiyanın özü də bunu uyğun şəkildə dəyərləndirməlidir. Düzdür, son vaxtlar görürük ki, Rusiyada bəzi mərkəzlər isterika içindədir. Xüsusən Zelenskinin səfərindən sonra. Onlar Azərbaycanın “xəyanət” etdiyini, “arxadan zərbə” vurduğunu deyirlər. Ancaq ağlı başında olan adamlar da var ki, onlar buna normal yanaşırlar. Hətta bunun fürsətə çevrilə biləcəyinə işarə edirlər. O baxımdan hesab edirəm ki, Azərbaycanın nüfuzundan, imkanlarından istifadə edib Ukrayna ilə Rusiya elə məhz Bakının vasitəçiliyi ilə bir araya gələrsə, anlaşmaq problem olmamalıdır. Düzdür, ABŞ, Avropa İttifaqı, ayrı-ayrı Avropa dövlətləri vasitəçiliyə zaman-zaman can atıblar. Bu minvalla çalışıblar nəsə etsinlər, amma bəlli olan bir şey var. O da ondan ibarətdir ki, biz post-sovet respublikalarıyıq. Bir-birimizi biz daha yaxşı anlayırıq. Rusiyanı da, Ukraynanı da anlaya bilirik. Bundan başqa, Rusiya-Ukrayna münasibətlərində harada nədə güzəşt etmək olar, harada etmək mümkün deyil, bunu da yaxşı anlaya bilirik. Bu baxımdan Azərbaycanın vasitəçiliyi daha məqbuldur. Ən nəhayət, düşünmürəm ki, Zelenskinin səfəri Rusiya-Azərbaycan münasibətlərini gərginləşdirsin. Çünki burada gərginləşmə yarada biləcək hansısa əsas yoxdur”.
Vidadi ORDAHALLI
