Məhəmməd Əsədullazadə: “Azərbaycan PUA-lardan müdafiə olunmaq üçün Ukraynanın təcrübəsindən istifadə edə bilər”
"Hərbi-texniki əməkdaşlıqla bağlı fikir mübadiləsi aparıldı və burada da çox böyük perspektivlər var". Bu barədə Prezident İlham Əliyev Ukrayna Prezidenti Volodimir Zelenski ilə mətbuata bəyanatında bildirib.
“Həm Azərbaycanda, həm də Ukraynada hərbi sənaye kompleksi inkişaf edir və burada birgə istehsalla, ümumiyyətlə, sənaye sahəsində birgə istehsal ilə bağlı çox gözəl imkanlar var”, - deyə dövlət başçısı vurğulayıb.
Görünən odur ki, bundan sonra Azərbaycan Ukrayna ilə hərbi-sənaye sahəsində də əməkdaşlıq edəcək. Bu sahədə birgə müəssisələr yaradıla bilər.
Sözügedən məsələ ilə bağlı fikirlərini baki-xeber.com-la bölüşən politoloq Məhəmməd Əsədullazadə prinsipcə, hərbi sahədə iki ölkənin əməkdaşlıq qurmasına müsbət prizmadan yanaşdı: “Əvvəla, Azərbaycan və Ukrayna daima bir-birinə dəstək olub və bundan sonra da qarşılıqlı dəstək olacaq. Hər iki dövlət birmənalı olaraq bir birinin ərazi bütövlüyünü tanıyır. Başqa bir tərəfdən, Ukraynanın və Azərbaycanın döyüş sahəsində böyük təcrübəsi var. Azərbaycan 44 günlük müharibə zamanı PUA-lardan geniş istifadə edərək dünya hərbinə yeniliklər gətirdi. O zaman Azərbaycanın müharibədə bu sistemlərdən istifadə etməsi Ukraynada böyük maraqla izlənilirdi. Elə oldu ki, həmin müharibədən bir il üç ay sonra Rusiya Ukraynaya qarşı işğalçı müharibəyə başladı. O da məlumdur ki, bu gün Ukraynada güclü anti-dron sistemləri mövcuddur. Məhz Azərbaycan PUA-lardan müdafiə olunmaq üçün Ukraynanın təcrübəsindən istifadə edə bilər. Bununla belə, birgə müəssisələr qurub bu vasitələri istehsal etmək olar. Nəzərə almaq lazımdır ki, Azərbaycanın hərbi sənayesi inkişaf edir. Ukraynanın yeni anti-dronlar tətbiq etməklə, Rusiyanın “Şahed” zərbə dronlarına qarşı uğurlu şəkildə tətbiq edir. Ukrayna Səudiyyə Ərəbistanı və körfəz ölkələrinin PUA-lardan müdafiəsi üçün öz hərbi təlimatçıları ilə təlim keçir. Azərbaycan Ukrayna ilə bu sahədə əməkdaşlıq etməsi mümkündür. Qeyd edim ki, Ukrayna Rusiyaya qarşı kifayət qədər hərbi mövqeyini gücləndirib. Ölkənin güclü və inkişaf etmiş müdafiə sənayesi sistemi qurulub. Bu ölkə müdafiədən hücuma keçərək, güclü olduğunu ortaya qoyur. Ukrayna keçmiş post-sovet məkanının kilid ölkəsidir. Bu ölkənin təhlükəsizliyi həm Cənubi Qafqaz, həm də Avropa üçün mühüm strateji əhəmiyyət kəsb edir. Rusiya Ukraynada qalib gələrsə, Avropa və post-sovet məkanına təzyiqləri artıracaq. Ona görə də Ukraynanın güclü olması və bütün ölkələr tərəfindən dəstəklənməsi geosiyasi təhlükəsizliyin təmininə çevrilib”.
Vidadi ORDAHALLI
