Məlum olduğu kimi, aprelin 25-də Qəbələdə Azərbaycan prezidenti İlham Əliyev ilə Ukrayna dövlət başçısı Volodimir Zelenskinin əvvəlcə təkbətək, daha sonra isə nümayəndə heyətlərinin iştirakı ilə geniş tərkibdə görüşləri keçirilib. Görüş zamanı tərəflər ikitərəfli əməkdaşlığın genişləndirilməsi perspektivlərini müzakirə edib, bu səfərin əlaqələrin inkişafına yeni təkan verəcəyinə əminliklərini ifadə ediblər. Energetika, kənd təsərrüfatı və digər sahələrdə əməkdaşlığın dərinləşdirilməsi, həmçinin Hökumətlərarası Komissiyanın fəaliyyəti ilə bağlı geniş fikir mübadiləsi aparılıb.
Zelenski Azərbaycanın Ukraynaya göstərdiyi humanitar dəstəyi, o cümlədən ukraynalı uşaqlara göstərilən xüsusi qayğını yüksək qiymətləndirib və buna görə minnətdarlığını bildirib. Tezliklə bir qrup ukraynalı tələbənin reabilitasiya məqsədilə Azərbaycana səfər edəcəyi qeyd olunub. Görüşün yekununda liderlər mətbuata bəyanatlarla çıxış ediblər. Prezident İlham Əliyev vurğulayıb ki, siyasi dialoqla yanaşı, xüsusilə energetika sahəsində əməkdaşlıq uğurla inkişaf edir. Dövlət başçısı SOCAR-ın Ukraynadakı təcrübəsinə əsaslanaraq, yeni layihələr və qarşılıqlı investisiyalar üçün böyük potensialın olduğunu bildirib: "Bizim ticarət dövriyyəmiz yarım milyard dolları ötüb və bu göstəricinin daha da artırılması istiqamətində iş aparılır". Onun sözlərinə görə, hərbi-texniki əməkdaşlıqla bağlı geniş fikir mübadiləsi aparılıb və bu istiqamətdə böyük perspektivlər mövcuddur. "Həm Azərbaycanda, həm də Ukraynada hərbi sənaye kompleksi inkişaf edir. Burada birgə istehsalla, ümumiyyətlə, sənaye sahəsində əməkdaşlıqla bağlı geniş imkanlar var. Bu gün sözügedən məsələlər ətrafında ətraflı müzakirələr apardıq. Biz bütün sahələrdə əməkdaşlığımızı daha da dərinləşdirmək niyyətindəyik".
Zelenski müxtəlif sahələri əhatə edən altı sənədin imzalandığını diqqətə çatdırıb. O, təhlükəsizlik və müdafiə sənayesinin əməkdaşlıq sahəsində prioritet istiqamətlərdən biri olduğunu vurğulayıb: "Ukrayna müharibə şəraitində öz müqavimət gücünü nümayiş etdirib və bu təcrübəni Azərbaycanla bölüşməyə hazırdır. Ekspertlərimiz artıq Azərbaycandadır və həmkarlarına müvafiq dəstək göstərirlər. Biz bu tərəfdaşlığı genişləndirərək birgə istehsal mərhələsinə keçmək niyyətindəyik". Zelenski, eyni zamanda, sülh istiqamətində göstərilən səylərin müzakirə olunduğunu bildirib. Ukrayna prezidenti bu prosesdə vasitəçilik edən tərəfdaşlara minnətdarlığını ifadə edib: "Bizim üçtərəfli və digər formatlarda danışıqlarımız baş tutdu. Görüşlərin bir qismi Türkiyədə, növbəti mərhələsi isə amerikalı tərəfdaşlarımızın iştirakı ilə Cenevrədə keçirildi. Əgər Rusiya tərəfi də diplomatiya yolunu seçərsə, biz danışıqları Azərbaycanda aparmaq istərdik". Rusiya Federasiya Şurasının Beynəlxalq məsələlər komitəsinin sədr müavini Vladimir Cabarov bunu mümkün hesab edir. O vurğulayır ki, Rusiya ABŞ və Ukrayna ilə danışıqların bütün iştirakçılarının təhlükəsizliyinin təmin edilməsi şərti ilə həmin görüşün Azərbaycan ərazisində keçirilməsini mümkün hesab edir. Cabarovun sözlərinə görə, Rusiya-Azərbaycan münasibətlərinin hazırkı vəziyyəti nəzərə alınmaqla, Azərbaycan üçtərəfli danışıqlar üçün məqbul məkandır. Senator əlavə edib ki, əsas şərt ev sahibi ölkədə danışıqlar prosesinin bütün iştirakçılarının təhlükəsizliyinin təmin edilməsidir. Qeyd edək ki, Bakı indiyə qədər ABŞ-Rusiya, Rusiya-NATO, Türkiyə-İsrail, İsrail-Suriya danışıqlarına ev sahibliyi edib. Rusiya-Ukrayna münaqişəsində də bu təcrübədən istifadə oluna bilər. Azərbaycanın Ukrayna və Rusiya ilə münasibətləri növbəti danışıqlara ev sahibliyi etmək şansının yüksək olduğunu göstərir.
Ramil QULİYEV
