Ceyhun Məmmədov: “Bu Azərbaycanın unikal siyasətinin göstəricisidir”
Azərbaycanın xarici siyasətində beynəlxalq münaqişələrdə tərəf tutmamaq və balanslı mövqe nümayiş etdirmək əsas prinsiplərdən biridir. Azərbaycan bu münaqişədə tərəf tutmur. Azərbaycan öz aralarında problem yaşayan ölkələrlə eyni, bərabərhüquqlu şəkildə əlaqələrini inkişaf etdirməyi bacarır. Buna Rusiya ilə Gürcüstan arasında münasibətlər nümunə göstərilə bilər. İki ölkə atasında diplomatik münasibətlər yoxdur. Rusiya ilə Gürcüstan arasında münasibətlərin ən gərgin fazasında belə Azərbaycan özünün düzgün, aydın siyasəti ilə hər iki tərəflə münasibətlərini inkişaf etdirib
Ukrayna-Rusiya Münaqişəsində Azərbaycanın tərəf tutmağı məlumdur. Azərbaycan bu münaqişədə hərbi komponentdən kənar duraraq, tərəflərdən heç birinin yanında yer almır və humanitar yardım siyasətinə üstünlük verir. Eyni zamanda İsrail-Fələstin Qarşıdurmasını da yada salmalıyıq. Ötən ilin oktyabrından başlayan İsrail-Fələstin qarşıdurmasında Azərbaycan tərəf tutmur və beynəlxalq hüquq çərçivəsində obyektiv mövqe nümayiş etdirir.
Azərbaycan rəsmi olaraq, xüsusilə böyük güclərin toqquşan maraqlarında müstəqil siyasət yürüdür və balanslı davranır.
Rəsmi Bakı həmçinin, bütün ölkələrin ərazi bütövlüyünün tərəfdarı kimi çıxış edərək, münaqişələrin sülh yolu ilə həllinə dəstək verdiyini bəyan edir.
Millət vəkili Ceyhun Məmmədov baki-xeber.com-a bildirdi ki, Azərbaycan ümumiyyətlə bu məsələdə unikal bir siyasət həyata keçirir. “Bu gün Azərbaycan bir dövlətlə münasibətini digər dövlətin başqa bir dövlətlə münasibətinə görə qurmur. Yəni ola bilər ki, Rusiyanın Ukrayna, Ukraynanın da Rusiya ilə münasibəti olmasın, amma bu o demək deyil ki, Azərbaycan Rusiya və Ukrayna ilə münasibətlərini inkişaf etdirməməlidir. Yəni Azərbaycan öz aralarında problemlər yaşayan ölkələrlə eyni, bərabərhüquqlu şəkildə əlaqələri inkişaf etdirir. Bu Azərbaycanın unikal siyasətinin göstəricisidir. Bu xüsusda Gürcüstanla Rusiya arasında münasibətlər buna misal göstərilə bilər”.
C.Məmmədovun sözlərinə görə, bu ölkələr arasında diplomatik münasibətlər yoxdur, Gürcüstan və Rusiya arasında münasibətlərin ən gərgin vaxtlarında da Azərbaycan düzgün, aydın siyasəti ilə hər iki tərəflə münasibətini qorudu və inkişaf etdirdi. “Yəni bu Azərbaycanın böyük uğurudur, bu unikal bir nümunədir. Azərbaycan bununla yetinmir. Azərbaycan zaman-zaman bu nümunəni ortaya qoyub. Hətta vaxtilə Türkiyə və Rusiya arasında vasitəçilik edib. Azərbaycan zaman-zaman İsrail-Suriya, İsrail-Türkiyə münasibətlərinə də töhfə verməyə çalışıb. Ümumilikdə Azərbaycanın balanslaşdırılmış, düşünülmüş, uzaqgörən bir siyasəti var və bu siyasət özündə bir çox mühüm elementləri, prinsipləri əhatə edir. Bu ənənərimizin daha da genişlənməsi üçün xüsusi önəm daşıyan bir prosesə çevrilib. Burada təbii ki, cənab Prezidentin siyasətini xüsusi qeyd etməliyik”-deyə C.Məmmədov qeyd etdi.
İradə SARIYEVA
