ABŞ prezident Donald Trampın İranla bağlı fəlakətli planlarından narahatdır. Demokrat senator Kris Merfi sosial mediada bildirib ki, Ağ Ev hələ də ölkəyə qurudan müdaxilə etməyi düşünür. Siyasətçi vurğulayıb ki, Amerika liderinin münaqişəyə son qoymaqdan imtina etməsi Tehranın Hörmüz boğazı üzərində nəzarətini və nəticədə "fəlakətli dərəcədə yüksək enerji qiymətlərini" qoruyub saxlayır.
Merfi hesab edir ki, İranla müharibənin vuracağı ziyan daha da böyük ola, qlobal ərzaq böhranına və Amerika hərbçiləri arasında itkilərə səbəb ola bilər: "Bu müharibə İranı daha güclü edir, Amerikanı zəiflədir və tariximizin ən böyük korrupsiya sxemlərindən birini asanlaşdırır".
CNN-in məlumatına görə, bu durumda ABŞ ordusu, razılaşma pozularsa və atəşkəs razılaşma olmadan başa çatarsa, İrana qarşı yeni zərbələr endirməyi düşünür . Müzakirə Hörmüz boğazı ərazisində kiçik hücum qayıqlarına, mina qurğularına və digər "asimmetrik döyüş vasitələrinə" mümkün hücumlarla bağlıdır. Kanal həmçinin ABŞ administrasiyasının elektrik stansiyaları və körpülər kimi ikili məqsədli obyektlərə zərbə endirmək təhdidini tətbiq etməyi düşündüyünü bildirib. Bundan əlavə, hərbi planlaşdırıcılar İranın ayrı-ayrı hərbi komandirlərinə və liderlərinə qarşı əlavə hücumların olacağını istisna etmirlər. Bir mənbə bildirib ki, İran İslam İnqilabı Keşikçiləri Korpusunun komandiri Əhməd Vəhidi hədəfə alına bilər. Belə vəziyyətdə ABŞ və İran arasında atəşkəs fonunda Yaxın Şərqdə gərginlik davam edir. ABŞ tərəfi bildirib ki, İranla müharibənin bitməsi üçün son tarix yoxdur, İran tərəfi isə ABŞ-ı günahlandıraraq Hörmüz boğazının açılmasının "mümkün olmadığını" deyir.
Hazırda Pakistanda sülh danışıqlarına hazırlıqlar davam edir, lakin ABŞ və ya İrandan nümayəndə heyətlərinin iştirak edəcəyi barədə hələlik təsdiq yoxdur. İran prezidenti Məsud Pezeşkian Tehranın müzakirələrə açıq olduğunu bildirib. Onun sözlərinə görə, ABŞ tərəfindən "öhdəliklərin pozulması, blokada və təhdidlər əsl danışıqlara əsas maneələrdir". ABŞ nümayəndə heyətinə rəhbərlik etməsi gözlənilən vitse-prezident Ceyms Vens isə Pakistana gəlməyib. Bundan başqa, ABŞ prezidenti Donald Tramp atəşkəsi uzatdıqdan sonra İranla müharibənin bitməsi üçün "vaxt çərçivəsi" olmadığını söyləyib. Ağ Evin mətbuat katibi Karolin Livitt atəşkəsin uzadılmasının müddətsiz olduğunu və yeni bir son tarix olmadığını bildirib. Bu durumda Hörmüz boğazı ətrafında gərginlik davam edir. İran parlamentinin spikeri Məhəmməd Baqir Qalibaf X sosial media hesabında bildirib ki, rəsmi Tehran "döyüş meydanında göstərmək üçün yeni kartlar hazırlayır" və "təhdidlərin kölgəsi altında danışıqları qəbul etməyəcək". Bu arada, ABŞ İrana məxsus karqo gəmisini ələ keçirdikdən sonra da Hörmüz boğazını blokadada saxlamağa davam edir və hər iki tərəf bir-birini atəşkəsi pozmaqda günahlandırır.
Tahir TAĞIYEV
