Akif Nağı: "CHP parçalansa belə, bir müddətdən sonra yenidən birləşəcək, bu artıq oturuşmuş bir partiyadır"
Türkiyə mediasında belə bir müzakirə başlayıb: bir neçə il əvvəl Özgür Özəlin Cumhuriyet Xalq Partisi başqanı seçildiyi və Kamal Kılıçdaroğlunun məğlub olduğu qurultayın nəticələrinin məhkəmə qaydasında ləğv ediləcəyi, nəticədə Kamal Kılıçdaroğlunun yenidən CHP lideri postuna qaytarılacağı və Özgür Özəlin isə yeni partiya yaradacağı iddia olunur.
Bu ssenari nə dərəcədə ağlabatan və realdır? Bu gün CHP Türkiyədə ana müxalifət mövqeyindədir və hazırkı reytinq göstəricilərinə görə hakim partiyanı üstələməyə başlayıb. Belə bir şəraitdə bu addımın atılması Türkiyənin daxili siyasətinə nə vəd edir? Belə bir hadisə baş verərsə, münasibətlər daha da kəskinləşə və nəzarətdən çıxa bilərmi? Özgür Özəlin CHP-ni yeni adda təşkil etməsi hansı perspektivlər vəd edir?
Məsələ ilə bağlı "Bakı-Xəbər" qəzetinə açıqlamasında Akif Nağı vurğuladı ki, fikrincə, bu uğurlu düşüncə deyil, Türkiyədə kəskin siyasi mübarizə gedir, hakim partiya nəyin bahasına olursa-olsun iqtidarda qalmağa çalışır: "CHP isə hakim partiyanın çox ciddi rəqibidir. Son yerli seçkilərdə CHP əksər böyük şəhər bələdiyyələrində qalib oldu. İstənilən qurumun daxilində mənfi hallar ola bilər, amma belə hallardan istifadə edilərək CHP-nin mövqeyi xeyli zəiflədildi. Partiyanın yeni rəhbərlərinə qarşı cinayət işi qaldırılıb, onlar həbs olunub. Amma Türkiyə siyasi mühitində bir xüsusiyyət var: partiyaya nə qədər ləkə vurulsa da, insanlar partiya mənsubiyyətini saxlayır. CHP-nin parçalanması, Kəmal Kılışdaroğlunun yenidən partiya sədriliyinə gətirilməsi isə partiyanı zəiflətmək istəyən qüvvələr tərəfindən atılan addımdır. Bu AK Partiyanın hakimiyyətdə qalmasına xidmət edir. İnanmıram ki, ciddi nəticəyə nail ola bilsinlər - CHP parçalansa belə, bir müddətdən sonra yenidən birləşəcək, bu artıq oturuşmuş bir partiyadır. Tərəfdarıyam ki, CHP-nin daxili siması, xarakteri, ideoloji xətti dəyişdirilməlidir. Bu Atatürk tərəfindən yaradılmış partiyadır, amma ənənəvi siyasi xəttindən xeyli geri çəkilib. Bu gün CHP haqqında düşünəndə açıq-saçıq qərbyönümlü bir partiya təsəvvürü yaranır. Avropa dəyərlərinin milli siyasi çalarlara uyğunlaşdırılmadan, olduğu kimi tətbiqini görürük. Elə məsələlər var ki, o barədə həm ölkələr arasında, hətta ölkə daxilində fikir ayrılıqları mövcuddur. Məsələn, LGBT və ya eyni cinsli nikahlarla bağlı fərqli fikirlər var, amma bu əksər hallarda azadlıq və demokratiya göstəricisi kimi təqdim edilir, CHP isə bunu təqdim edildiyi kimi qəbul edir. Məsələn, CHP-nin İzmir mərkəzində LGBT təşkilatı sərbəst şəkildə fəaliyyət göstərir. Çox böyük ofisləri var. Mən partiyadakı tanışlarımdan soruşanda ki bu nədir, dedilər demokratiyadır, kim nə istəyir edə bilər. Amma bu, Atatürkün ideologiyasına uyğun məsələ deyil. CHP-nin daxilində bu məsələyə yenidən baxılmalıdır. Bütün dünyada hər bir siyasi qüvvə milli dəyərlərə daha çox bağlanır - Amerika və Avropada da bu belədir. Qərb dəyərləri saydığımız dəyərlərin özünə Avropada münasibət birmənalı deyil. O dəyərlər bir çox Avropa ölkələrində qadağan edilib. Ona görə də CHP bu məsələlərə yenidən baxmalıdır.
Partiyanın daxilində belə müzakirələrin açılmasına müqavimət göstərən qüvvələr də var. Eyni zamanda CHP bu mövqeyi ilə bir çox Avropa mərkəzlərinin dəstəyini qazanır. Əks mövqe bu dəstəyin itirilməsi ilə nəticələnə bilər. Ona görə də bu xətti dəyişmək çətindir. Amma dəyişməsələr də mümkün deyil".
Dəniz NƏSİRLİ
