Sahil İsgəndərov: “Azərbaycan Şimal-Cənub dəhlizində əsas oyunçulardan, aktorlardan biridir”
Zəngilan şəhərində keçirilən Azərbaycan Respublikası ilə Rusiya Federasiyası arasında iqtisadi əməkdaşlıq məsələləri üzrə Höküumətlərarası Dövlət Komissiyasının 24-cü iclasında hökumətlərarası Komissiyanın Azərbaycan tərəfindən sədri, Baş nazirinin müavini Şahin Mustafayev Azərbaycanın regional sabitliyə və humanitar əməkdaşlığa verdiyi töhfələrə toxunaraq, İran ərazisindən Rusiya vətəndaşlarının təxliyəsində göstərilən operativ dəstək, eləcə də Rusiya humanitar yardımının Azərbaycan ərazisindən tranziti üçün yaradılan şərait vurğulayıb. Bildirilib ki, “Şimal-Cənub” Beynəlxalq Nəqliyyat Dəhlizi mövcud mürəkkəb geosiyasi şəraitdə də etibarlı və fasiləsiz fəaliyyət göstərərək öz rəqabətqabiliyyətini sübut edib.
İqtisadi məsələlərə toxunan Ş.Mustafayev qeyd edib ki, Prezident İlham Əliyevin təşəbbüsü ilə Azərbaycan ərazisindən müxtəlif istiqamətlərdən, o cümlədən Rusiyadan Ermənistana yüklərin daşınması ilə bağlı məhdudiyyətlərin aradan qaldırılması regionda etimadın möhkəmləndirilməsinə və nəqliyyat-logistika əməkdaşlığının genişlənməsinə xidmət edir. Hazırda Azərbaycan ərazisindən tranzitlə Ermənistana təxminən 26 min ton yük daşınıb.
Bu iclasda səsləndirildiyi kimi, Azərbaycan üzərindın İrana Rusiya humanitar yardımları yaxşı şəkildə çatdırılıb və bu da İran müharibəsi zamanı Şimal-Cənubun əhəmiyyətini bir daha sübut edib.
Politoloq Sahil İsgəndərov baki-xeber.com-a bildirdi ki, son vaxtlar Azərbaycanla Rusiya arasındakı münasibətlərin artıq tənzimlənməsi məcrasına yönəlik addımlar təqdirəlayiqdir. “Bu məsələdə xüsusi rola malik olan addım atıldı. Yəni Rusiya tərəfindən Azərbaycanın sərnişin təyyarəsinin vurulmasından sonra Rusiyanın təzminat ödəməsi ilə bağlı üzərinə öhtəlik götürməsi bir müddət gərgin olan Azərbaycan Rusiya münasibətlərinin yenudən normal məcraya yönəlməsinə səbəb olub. Mən əvvəlcədən də bunun nə vaxtsa belə olacağına əmin idim. İstənilən halda Azərbaycan və Rusiya uzun illər qonşuluq siyasətinə sadiq qalmalı olublar. Çünki nə Rusiya, nə də Azərbaycan buradan köçüb gedəsi deyil. Coğrafi taleyimiz belədir ki, biz qonşu dövlətlərik və qonşu dövlətlər arasında da münasibətlər normal olmalıdır. Düzdür, Rusiya ilə Azərbaycan arasında münasibətlər heç də həmişə hamar olmayıb. Çox təəssüf ki, bu həmişə Rusiyada müəyyən dairələrin apardığı oyunların nəticəsində belə olub. Bu Rusiyadakı müəyyən dairələrin Ermənistanı dəstəkləməsi, Azərbaycana təzyiq göstərilməsi cəhdləri fonunda olub. Məhz Azərbaycan Prezidentinin apardığı siyasət nəticəsində bu gərginliklər heç vaxt düşmənçilik səviyyəsinə qalxamayıb. Azərbaycan yalnız özünün beynəlxalq hüquqa söykənən tələblərinin icra olunmasında israrlı olub. Bu da son nəticədə öz bəhrəsini verib.
Məhz Azərbaycan vasitəsilə Rusiya vətəndaşlarının İrandan təxliyə olunması, eyni zamanda İrana humanitar yardımların göndərilməsi Azərbaycan ərazisindən getməsi önəmli bir məsələdir. Digər tərəfdən Azərbaycanın özünün Rusiyanın strateji müttəfiqi olan İrana humanitar yardımlar göstərməsi kimi amillər sözsüz ki, Moskvanı öz siyasətində dəyişiklik etmək məcburiyyəti qarşısında qaldı”.
S.İsgəndərov qeyd etdiynə görə, İran ətrafında, xüsusən də Hörmüz boğazı ilə bağlı baş verənlər onu deməyə əsas verir ki, Azərbaycan bütün tranzit marşurtlarının qovşağıdır. “Azərbaycan həm Orta Dəhliz, həm Şərq, həm də Şimal-Cənub dəhlizində əsas oyunçulardan, aktorlardan biridir. Moskva da dəfələrlə bəyan edib ki, Azərbaycanın yaxından iştirakı ilə birmənalı şəkildə Şimal-Cənub dəhlizinin reallaşdırılmasında maraqlıdır. Sözsüz ki, bu da Azərbaycanla Rusiya arasında münasibətlərin yalnız normallaşmasından keçir. Eyni ticarət, həm də siyasi əlaqələr kontektdində Azərbaycan Rusiya münasibətlərinin daha sıxlaşmasını, ən azı əvvəlki səviyyəsinə qayıtmasını şərtləndirir. Düşünürəm ki, məhz Azərbaycanın dinc qonşuluq siyasəti Moskvada düzgün qiymətləndiriləcək, oradakı müəyyən siyasi qüvvələrin bu münasibətlərə xələl gətirməsi cəhdlərini neytrallaşdıracaq. Rusiyanın indiki siyasi rəhbərliyi də bu məqamlara diqqət yetirməlidir. Rusiyada öz oyunlarını oynayan, yaxud kimlərinsə oyununu oynayan qüvvələrin heç vaxt güclənməsinə imkan verməməlidir, Azərbayacanla münasibətlər qorunub saxlanılsın və yüksələn xətt üzrə davam etsin.
Rusiyanın siyasi rəhbərliyi həm indi, həm də əvvəllər bir məqamı başa düşdü ki, əslində Azərbaycanın Cənubi Qafqazda yaratdığı o kövrək sabitlik indi yeni bir geosiyasi konfiqurasiya birmənalı şəkildə Rusiyanın təhlükəsizliyinin qarantıdır. Bəli, bəziləri üçün nə qədər qəribə səslənsə də Azərbaycanın apardığı siyasət Rusiyanın təhlükəsizliyinə, onun Cənubi Qafqazda, yaxud Cənub sərhədlərinin təhlükəsizliyinə təminat verir. Əgər Azərbaycan bu kövrək sülhü, bu sabitliyi yaratmasaydı indi siz təsəvvür edin ki, Şimali Qafqazda hansı hadisələr baş verərdi. Məsələ bundadır”-deyə S.İsgəndərov bildirdi.
İradə SARIYEVA
