Xaqani Cəfərli: "HƏMAS-ın hücumu Azərbaycanın vasitəçiliyi ilə əldə olunan nailiyyətləri məhv eləmişdi"
NATO baş katibinin müavini Radmila Şekerinskayaya Türkiyədə jurnalistlər belə bir sual verib: İsrailin İrandan sonra Türkiyəni vuracağı barədə ehtimallar geniş müzakirə olunur. NATO baş katibinin müavini olaraq siz bu haqda nə fikirləşirsiniz?
Bu suala cavab olaraq Şekerinskaya dedi ki, qarşımızda duran ən böyük vəzifələr Kanadanı NATO-ya daha sıx bağlamaq, NATO ilə Avropadakı üzvlər arasında əlaqələri gücləndirmək və Ukraynaya daha çox hərbi, siyasi və diplomatik dəstək verməkdir. O qeyd etdi ki, bu istiqamətdə iş aparırıq, çalışırıq ki, bunların hamısını qısa müddətdə həyata keçirək.
Yəni verilən suala bir kəlmə də olsun birbaşa cavab vermədi. NATO-nun bu mövzuda susmasının səbəbi nədir?
Politoloq Xaqani Cəfərli məsələ ilə bağlı “Bakı-Xəbər” qəzetinə açıqlamasında bildirdi ki, Türkiyə Respublikasının Prezidenti Rəcəb Tayyib Ərdoğanın himayəsi, Türkiyə Respublikası Xarici İşlər Nazirliyinin ev sahibliyi ilə təşkil olunan 5-ci Antalya Diplomatiya Forumunda (ADF2026) iştirak edən NATO baş katibinin müavini Radmila Şekerinskayanın İsrailin İrandan sonra Türkiyəni vuracağı barədə sualı cavabsız qoyması bir neçə məqamla bağlıdır: "Çox böyük ehtimalla, NATO baş katibinin müavini bu mövzuda müzakirələrin tərəfi olmamaq, eyni zamanda müzakirələri növbəti mərhələyə daşımamaq üçün belə addım atıb. Ancaq problem haqqında susmaqla problem yox olmur. Türkiyə-İsrail münasibətlərində həqiqətən problem var. Bu problem 2023-cü ildəkindən daha kəskindir. Əgər 2023-cü ildə Azərbaycanın vasitəçiliyi ilə bir qədər yumşalma mümkün olmuşdusa, HƏMAS-ın hücumu Azərbaycanın vasitəçiliyi ilə əldə olunan nailiyyətləri məhv eləmişdi. Bu isə onu göstərir ki, iki ölkə arasında münasibətlər çox kövrəkdir və kənar təsirlərdən çox asılıdır. NATO baş katibinin müavini Radmila Şekerinskayanın bu mövzuda susması həm də bu məqamla bağlı ola bilər. İndi hər kəs anlayır ki, istənilən yanlış bir dəyərləndirmə problemi qızışdıra bilər.
NATO baş katibinin müavininin İsrail və Türkiyə arasında mümkün hərbi toqquşma ilə bağlı sualı cavablandırmamasının digər səbəbi ABŞ-ın möveyini nəzərə almaq cəhdi ola bilər. Hazırda ABŞ-ın ən yaxın müttəfiqi İsraildir. Bunu NATO baş katibinin müavini də bilir və ona görə də Vaşiqntonda narazılıq yaradacaq mövqe bildirməkdən yayınır".
Dəniz NƏSİRLİ
