Qulamhüseyn Əlibəyli: “Prezidentin səfirlik terroru ilə bağlı açıqlaması o deməkdir ki, təxribatlar davamlıdır”
Prezident İlham Əliyev Təhlükəsizlik Şurasının iclasında deyib ki, Azərbaycan tərəfinə İran rəsmiləri izahat verməlidir, üzr istənilməlidir və bu hücumu törədənlər cinayət məsuliyyətinə cəlb edilməlidir:
“Birinci dəfə deyil ki, İran dövləti Azərbaycana və azərbaycanlılara qarşı terror aktları həyata keçirir”.
Prezident Əliyev 2023-cü il yanvarın 27-də Azərbaycan səfirliyinə silahlı hücumu yada salıb: “Onda səfirliyin bir əməkdaşı ölmüş, ikisi isə yaralanmışdı. O vaxt da bizdə şübhə yox idi ki, bunu törədən İran dövlətidir”.
Diqqəti çəkən məqam həm də odur ki, Prezident 3 il əvvəl səfirlikdə baş verən terrorun arxasında İran dövlətinin dayandığını xüsusi qeyd edib. Bu, bir daha onu göstərir ki, baş verənlər təsadüfü deyil.
Sözügedən məsələni baki-xeber.com-a şərh edən sabiq millət vəkili, hüquqşünas Qulamhüseyn Əlibəylinin fikrincə, Prezident Əliyev Naxçıvana dron zərbəsinin mahiyyətini izah edərkən məsələni çox düzgün qoyur: “İran Azərbaycan dövlətini rəsmən tanısa da, bir dövlət kimi ölkəmizlə qarşılıqlı əlaqədə olmaq istəmir. Düzdür, son illər yeni prezident Pezeşkian Azərbaycanla müəyyən əlaqələr yaratmağa çalışır, səfərlər edir və s. Ancaq ümumilikdə ali dini rəhbərlik Azərbaycan dövlətini qəbul etmək istəmir. Ona görə də İranın Azərbaycandakı səfirliyinin adını “Bakı səfirliyi” kimi yazırlar. Sanki Azərbaycan adını dilə gətirməkdən qorxurlar. Müstəqilliyimiz dövründə dəfələrlə Azərbaycana qarşı təxribatlar törədilib. Bu təxribatlar Azərbaycanın hava sərhədlərinin pozulmasında, dəniz sərhədlərinin pozulmasında ifadə olunur. Həmçinin bu təxribatlar Azərbaycan sərhədinə yaxın ərazilərdə hərbi təlimlərin keçirilməsində özünü göstərib. Ermənistanı dəstəkləməklə ifadə olunub. Azərbaycanın işğal edilmiş ərazilərindəki yaşayış məntəqələrinin sökülüb ordakı materialların İrana aparılmasında özünü göstərib. Bu vaxta qədər İran Azərbaycana daha çox hədə-qorxu gəlib. Ancaq Naxçıvan hadisəsi göstərdi ki, bunlar nəinki hədə-qorxu gəlirlər, həm də real işə keçiblər. Azərbaycan ərazisini dron zərbələrinə məruz qoyublar. Özü də bu, təsadüfi hesab edilmir. Artıq rəsmi şəkildə bildirildi ki, silahlı qüvvələr bunu həyata keçiriblər. Ona görə də Naxçıvana dron zərbəsi Azərbaycanın milli təhlükəsizliyi üçün təhdid törədən haldır. Təhlükəsizlik Şurasının bu məsələni müzakirə etməsi də çox normaldır. Bu baxımdan Azərbaycan Ordusunun tam hazırlıq vəziyyətinə gətirilməsini də başa düşmək olar. Düzdür, biz heç bir ölkənin ərazisinə hücum etməli deyilik, amma özümüzü müdafiə etmək imkanına malikik. Bunu da Ermənistana göstərmişik. İndi bunu İrana da göstərməliyik. Prezidentin səfirlik terroru ilə bağlı açıqlaması o deməkdir ki, Azərbaycana qarşı təxribatlar davamlıdır. Bunların da arxasında İran dövləti dayanır. Söhbət dini hakimiyyətin müəyyən etdiyi aqressiv siyasətdən gedir”.
Vidadi ORDAHALLI
