Sahil Kərimli: “Molla rejimi növbəti dəfə bu cür nankor və çirkin əməllərə əl atarsa ən ağır formada öz layiqli cavabını alacaq”
Prezident İlham Əliyev Təhlükəsizlik Şurasının iclasında bildirib ki, bizim Silahlı Qüvvələrimiz - Müdafiə Nazirliyi, Dövlət Sərhəd Xidməti, digər bütün Xüsusi Təyinatlı Qüvvələr bir nömrəli səfərbərlik vəziyyətinə gətirilib və istənilən əməliyyatı keçirməyə hazır olmalıdırlar.
Bu o demək deyilmi ki, İran ikinci zərbəni vursa Azərbaycandan ağır cavab alacaq?
Politoloq Sahil Kərimli baki-xeber.com-a bildirdi ki, Prezident İlham Əliyevin Təhlükəsizlik Şurasının iclasında çıxışı, səsləndirdiyi sərt və qətiyyətli bəyanatlar bu gün İran üçün çox ciddi xəbərdarlıq mesajı olmalıdır: “İran Azərbaycan Prezidentinin bu xəbərdarlıq mesajından çox ciddi şəkildə nəticə çıxarmalıdır”.
S.Kərimlinin sözlərinə görə, İran anlamalıdır ki, həm 44 günlük müharibə, həm də 1 günlük lokal antiterror tədbirləri ilə bütün dünyaya nümunə ola biləcək hərbi uğur qazanan, qələbə ortaya qoyan Azərbaycanla bu cür davramaq, Azərbaycana qarşı nankorcasına həmlələr etmək yolverilməzdir. “Azərbaycan bu məsələdə çox sərt, haqlı və ədalətli mövqeyini həmişə ortaya qoyacaq. Cənab Prezidentin də qeyd etdiyi kimi bu gün Azərbaycan bölgədə sülh və təhlükəsizlik istəyən ölkədir, amma bizə qarşı hər hansısa bir hərbi təhdid, hərbi təhlükə yaranarsa bu zaman dövlətimiz öz suveren hüququndan birmənalı sərt formada istifadə edəcək. İran əgər gələcəkdə də bu cür hərbi təxribatlara, nankor əməllərə yol verərsə, Azərbaycana qarşı yenidən hərbi təhdid, yaxud təhlükə yaradarsa bu Azərbaycan tərəfindən artıq bağışlanmayacaq və Silahlı Qüvvələrimiz qarşı tərəfə ən ağır və layiqli formada cavab verəcək. Bu gün molla rejimi “mən batıramsa hamı da mənimlə bərabər batmalıdır, bütün bölgə ölkələri bir yerdə bu burulğana düşməlidir” kimi yanlış siyasət həyata keçirir. Bu isə yolverilməzdir. Yaxşı olardı ki, molla rejimi öz naşı səhvlərinə, öz ambisiyalarına dönüb baxsın və bundan nəticə çıxarsın. Bu gün molla rejiminə qarşı haqlı olaraq hərbi əməliyyatlar həyata keçirilir. Niyə haqlı əməliyyatlar? Çünki molla rejimi bir daha öz mahiyyətini ortaya qoydu. Bu rejim Azərbaycanın xoş niyyətli, sülhpərvər siyasətinə qarşı Naxçıvanın mülkü obyektlərinə dron hücumu edərək öz “mövqeyini” ortaya qoymuş oldu. Təbiidir ki, bu Azərbaycan tərəfindən hələki müəyyən qədər səbrlə qarşılanıb. Amma Azərbaycanın səbri tükənməz deyil. Əgər molla rejimi növbəti dəfə bu cür nankor və çirkin əməllərə əl atarsa ən ağır formada öz layiqli cavabını alacaq”-deyə S.Kərimli vurğuladı.
İradə SARIYEVA
