Rusiyanın İrəvandakı səfiri Sergey Kopırkin bildirib ki, Ermənistanın xarici siyasət əlaqələrinin geniş şaxələndirilməsi kontekstində Qərblə yaxınlaşması Moskva ilə İrəvan arasındakı münasibətlərdə yeni çətinliklər yaradır.
Kopırkin "Rossiya 24" televiziya kanalında bildirib: "Biz bilirik ki, AB hazırda Rusiya Federasiyasına qarşı düşmənçilik siyasəti yürüdür və ümumiyyətlə, tərəfdaşlarına açıq şəkildə sanksiyalar da daxil olmaqla, bu siyasəti dəstəkləməli olduqları barədə siqnal verir. Əlbəttə ki, bu, münasibətlərimizdə yeni çətinliklər yaradır və hər iki tərəfdən çox ağlabatan, balanslı və müdrik yanaşma, eləcə də strateji uzaqgörənlik tələb edir". O əlavə etdi ki, bu, ikitərəfli münasibətlərin yeni reallıqlara uyğunlaşdırılmasını tələb edir.
Səfir həmçinin qeyd edib ki, Moskva, xüsusən də Rusiya və Ermənistanın dəmir yolu sektorunun inkişafında əməkdaşlığı nəzərə alınmaqla, Rusiyanın Tramp marşrutu layihəsində iştirakı ehtimalını müzakirə etməyə hazırdır. Kopırkinin sözlərinə görə, Rusiyada "Beynəlxalq Sülh və Rifah üçün Tramp Marşrutu" layihəsi ətrafındakı inkişaflar diqqətlə izlənilir. Daha əvvəl Rusiyanın xarici işlər naziri Sergey Lavrov spiker Alen Simonyanla görüşündə bildirib ki, Moskva İrəvanın şimaldan gələn təhlükə ilə bağlı açıqlamalarını eşitməkdə qəribədir. O əlavə edib ki, Rusiya Ermənistanın Moskva ilə əlaqələrini qorumaq istəyindən xəbərdardır, lakin Avropa Birliyində hamı bununla razı deyil və fəal şəkildə əks siyasət yürüdür. Lavrov ümid etdiyini bildirib ki, Ermənistan AB-nin Rusiyaya müharibə elan etdiyi və ona "strateji məğlubiyyət" vurmağı hədəflədiyi bu vəziyyətin arxasında nəyin dayandığını çox yaxşı başa düşür: “Ermənistan rəhbərliyinin Rusiya Federasiyası ilə mövcud əlaqələrin və əməkdaşlığın səviyyəsini qorumaqda maraqlı olduqları barədə açıqlamalarını eşidirik. Digər tərəfdən, region xaricindəki bütün ölkələrin bundan məmnun olmadığını görürük. Avropa Birliyindən olan həmkarlarımız əks siyasət yürütməkdə çox, çox fəaldırlar”. Lavrov Moskvanın heç vaxt tərəfdaşların digər sahələrdə xarici əlaqələr qurmasına etiraz etmədiyini vurğulayıb.
O bildirib ki, Rusiya Moskvanın müttəfiqi olan Ermənistanla münasibətləri inkişaf etdirməkdə maraqlıdır: "Biz son illərdə ən yüksək, siyasi və parlament səviyyələrində əlaqələrimizin davamlı və çox intensiv şəkildə inkişaf etdiyini əsas götürürük. Biz bununla maraqlanırıq. Ermənistan bizim müttəfiqimiz, strateji tərəfdaşımızdır. Cənubi Qafqazdakı vəziyyətin nə qədər çətin olduğunu görürük".
Ramil QULİYEV
