ABŞ-ın vitse-prezidenti Cey Di Vens 2026-cı il Qış Olimpiya Oyunlarının açılışı üçün İtaliyaya yola düşüb. Onun daha sonra Ermənistana və Azərbaycana səfər edəcəyi, ötən il Ağ Evdə əldə olunmuş sülh razılaşmasına dəstək ifadə edəcəyi gözlənilir.
"The Associated Press" yazır ki, bir həftə çəkəcək səyahət Vensin bu il azsaylı beynəlxalq səfərlərindən biri ola bilər. Prezident Donald Tramp və hökumət üzvləri noyabrda Konqresə aralıq seçkilərdən dolayı daha çox daxili məsələlərə, daxili səfərlərə fokuslanırlar. İtaliyada açılış mərasiminə vitse-prezidentin xanımı Uşa Vens, dövlət katibi Marko Rubio, ABŞ-ın İtaliyada səfiri Tilman Fertitta da qatılacaq. Agentlik qeyd edir ki, Tramp Vensə Azərbaycanla Ermənistan arasında 30 ildən çox davam etmiş münaqişəni bitirəcək sazişi möhkəmləndirməyi tapşırıb. Sülh razılaşması Vaşinqtonun regiondakı mövqeyini gücləndirir, bu arada Rusiyanın nüfuzunun azaldığı bildirilir. Beynəlxalq Böhran Qrupu 2005-ci ildə ABŞ prezidenti Corc Buşun Gürcüstana səfərini yada salaraq qeyd edir ki, Vensin marşrutu ABŞ-ın Qafqazdakı prioritetlərinin necə dəyişdiyini göstərir: "Tiflisin yeni administrasiyanın könlünü xoş etməyə çalışmasına baxmayaraq, vitse-prezident vaxtilə Amerikanın regiondakı siyasətinin əsas elementi olan Gürcüstana getməyəcək". Qurumun Cənubi Qafqaz üzrə aparıcı təhlilçisi Coşua Kuçeranın fikrincə, ABŞ-ın kiçicik diqqəti belə Qafqaz kimi regionda böyük təsir yarada bilər. O, Donald Trampın ötən ilin avqustunda Azərbaycanla Ermənistan arasında razılaşmaya vasitəçilik etməsinin real təsiri olduğunu vurğulayır. Belə ki, tərəflər kiçik həcmlərdə ticarətə başlayıb, ABŞ və Ermənistan isə "Tramp marşrutu" üzrə çərçivə razılaşmasını açıqlayıb: "Vensin səfəri ABŞ-ın "Tramp marşrutu"na sadiqliyini bir daha təsdiqləməlidir. Regionda çoxları Vensdən ABŞ-nin bu münaqişənin həllində iştirakının daha da dərinləşməsi mesajını gözləyəcək. Nəqliyyat razılaşmasının təsiri hərtərəfli olsa da, Tramp administrasiyası hələlik normallaşma prosesinin digər aspektlərində daha dərin iştiraka çalışmayıb". Kuçera Vensin səfərinin gündəmində İranın da olacağını qeyd edir. Bakı və İrəvan həm ABŞ-ın potensial hücumunun təsirini azaltmağa, həm də Tehran və Vaşinqtonla mehriban əlaqələr saxlamağa çalışırlar. Tahir TAĞIYEV
