Şakir Ağayev: “Prezident İlham Əliyev qəti iradə, prinsipiallıq nümayiş etdirərək bütün bunları dəf etdi”
Azərbaycan xalqına qarşı cinayət aktları, kütləvi qırğınlar həyata keçirən erməni sepatçılarının, əli qanlı canilərin Bakı məhkəməsində mühakimə olunması dünyada sepatizmə açıq və gizli dəstək verən qüvvələri, bəzi beynəlxalq qurumlardakı ermənipərəstləri, erməni lobbi təşkilatlarının pulla ələ aldığı muzdlu deputatları, vəzifə sahiblərini onların müdafiəsinə səfərbər etdi. Bu qüvvələr birləşərək anti-Azərbaycan kampaniyası aparmağa başladılar, caniləri “qəhrəman”, “hərbi əsir” kimi qələmə verdilər, paralel olaraq da bəzi Qərb təşkilatları ölkəmizə qarşı əsassız bəyanatlar səsləndirdilər, hansısa qətnamələr qəbul etdilər. İnsanlıq əlehyinə müharibə cinayətləri törədən şəxslərin Bakı məhkəməsindən bir sıra qurumlar və dövlətlər Azərbaycana qarşı təzyiq vasitəsi kimi istifadə etməyə cəhd göstərdi. Gizlin deyil ki, Azərbaycana məhkəmə ilə əlaqədar xaricdə güclü əsassız siyasi təzyiqlər var idi. Lakin bu Azərbaycan Prezidentin bu sahədə qəti mövqeyinə heç bir təsir göstərmədi, Azərbaycan öz möveyindən geri çəkilmədi.
“Həmin qüvvələrin təzyiqləri iflasa uğrayıb”
“Novoye vremya” qəzetinin baş redaktoru Şakir Ağayev baki-xeber.com-a bildirdi ki, Azərbaycan dövləti erməni separatçılarına məhkəmə qurmaqla, xalqımıza qarşı insanlıq əleyhinə və müharibə cinayətləri törətməkdə ittiham olunan şəxsləri ədalət mühakiməsi qarşısına çıxarmaqla ədalətin bərpasına nail oldu. “Diplomatiyada görünməyən və elan olunmayan addımlar var ki, bunlar ictimaiyyət üçün həmin anda açıqlanmır. Təbii ki, bu milli və dövlət maraqlarının qorunması baxımından belə olur.
İstər Co Bayden administrasiyası dövründə, istərsə də indi ABŞ-da müəyyən konqresmenlər bu məsələ ilə bağlı Azərbaycan Prezidenti İlham Əliyevə çağırışlar edib, onların buraxılmasını istəyiblər. Biz demirik ki, Donald Tramp administrasiyası bizdən bunu istəyib. Xeyr. Tramp administrasiyası Azərbaycanla yaxşı münasibətlərin tərəfdarıdır. Amma yenə də Konqresdə erməni lobbisinin maliyyələşdirdiyi konqresmenlər, Senatda senatorlar var. Erməni lobbisinin pulu hesabına həmin qüvvələrin, eləcə də Avropa Parlamentinin, bəzi Avropa Birliyi dövlətlərinin bu məsələ ilə bağlı bizə qarşı hesabatları, təziqləri müşahidə olunurdu. Azərbaycana qarşı çox güclü təzyiqlər vardı, amma Prezident İlham Əliyev qəti iradə, prinsipiallıq nümayiş etdirərək bütün bunları dəf etdi. Ölkə başçısı vədinə əməl etdi, anti-Azərbayan qüvvələrin təzyiqlərinə baxmayaraq həmin şəxslər mühakimə olundular”.
Ş.Ağayev vurğuladı ki, Azərbaycan Prezidenti bütün bu təzyiqləri nəzərə almadı, Qərb təşkilatlarının bizə qarşı çıxardığı qətnamələrə əhəmiyyət vermədi və separatçıların məhkəmə prosesi başa çatdırıldı. “Bizə təzyiq edən dövlətlərə, təşkilatlara və ayrı-ayrı şəxslərə mühakimə olunan şəxslərin hansı cinayətlər törətdikləri onlara sübut olunmalı idi. Həmin qüvvələrə sübut olundu ki, onlar Azərbaycan ərazisində separatçı, terrorçu dəstələri düzəldib bizim dövlətçiliyimizə, ərazi bütövlüyümüzə, suverenliyimizə qarşı amansız silahlı cinayətlər törədiblər, soyqırım aktları gerçəkləşdiriblər. Bu cinayətlər bütün beynəlxalq aktların, konvensiyaların əleyhinədir. Bu bəşəriyyət əleyihə müharibə cinayətləridir ki, bunu bütün beynəlxalq ictimaiyyət bilməlidir. Bunu Bakıda məhkəməsi gedən ermənilər törətmişdi. Bu sübut olunmalı idi və məhkəmə də sübut olundu. Belə bir məhkəmə prosesinin həyata keçirilməsi göstərdi ki, separatçıların azadlığının tələb edilməsinin özü beynəlxalq hüquqa ziddir. Onların Azərbaycan xalqına qarşı etdiklərinin mində biri Avropa dövlətlərində, ABŞ-da baş versəydi bu cinayətləri törədənlər çoxdan ömürlük həbs cəzasına məhkum edilərdilər. Bu bir reallıqdır.
Fikrimcə, necə ki, Azərbaycan Prezidenti bu canilərin cinayətlərini dünyaya sübut etdi, gələcəkdə də onlar məhkəmənin onlara verdiyi ağır cəzaları çəkəcəklər. İctimaiyyətin görmədiyi təzyqilərin bu gün də davam etdiyinə baxmayaraq, Azərbaycan bir addım da geri çəkilməyəcək və o terrorçular, separatçılar, canilər layiqli cəzalarını alacaqlar. Yəni həmin qüvvələrin təzyiqləri iflasa uğrayıb”-deyə Ş.Ağayev qeyd etdi.
İradə SARIYEVA
