Rəsul Cahangirli: “Hindistan özəl şirkətlər vasitəsi ilə Rusiya neftini idxal edərək buna əməl etməyəcək”
ABŞ prezidenti Donald Tramp bəyan etmişdi ki, Hindistanın baş naziri Narendra Modi ilə danışıq aparıb və guya Modi Rusiyadan neft alışını dayandırmağa razılaşıb:
“O, (Modi) Rusiyadan neft alışını dayandırmağa, ABŞ-dan, ola bilsin, Venesueladan daha çox neft almağa razılaşdı. Bu, hazırda gedən, hər həftə minlərlə insanın həlak olduğu Ukraynadakı müharibəyə son qoymağa kömək edəcək”.
O da məlum olub ki, Hindistan mallarının ABŞ-a ixracına tariflər 25 faizdən 18 faizə endirilib. Tramp qeyd edib ki, bu razılaşma çərçivəsində Hindistan ABŞ-dan, kömür daxil, enerjidaşıyıcılar və kənd təsərrüfatı məhsulları, 500 milyard dollardan çox dəyərində məhsul alacaq.
Ancaq bütün bunlara baxmayaraq, Kremlin sözçüsü Dmitri Peskov jurnalistlərə açıqlamasında Hindistanın Rusiya neftindən imtina etməsini təkzib edib: “Bu məsələyə dair bizə Dehlidən heç bir rəsmi açıqlama daxil olmayıb”.
Sözügedən məsələni baki-xeber.com-a şərh edən ekspert Rəsul Cahangirlinin fikrincə, bütün bunlar Hindistanın əslində Rusiya neftindən imtina etməyəcəyi qənaətini yaradır: “Bunun bir neçə səbəbi var. Rusiya Ukraynaya müdaxiləyə başlayandan Hindistan Qərb sanksiyaları altındakı Rusiya neftini böyük həcmdə və endirimli qiymətlərlə almağa başlayıb. Rusiya qazı və neftinin Qərbə satışı dayandığından bu, Rusiya büdcəsinin doldurulmasının vacib yollarından biri sayılır. Hindistan Rusiya neftindən ona görə imtina etməz ki, onu çox ucuz qiymətə idxal edir. Məgər bu qiymətə Venesueladan və ya digər dövlətlərdən neft idxal edə bilər? Əlbəttə ki, yox. Başqa bir tərəfdən Venesuela məsafə baxımından Hindistana çox uzaq ölkədir. Rusiya isə məsafə baxımından çox yaxındır. Digər bir səbəb Hindistanla Rusiya arasında müxtəlif sahələrdə çox yaxın əməkdaşlığın mövcud olmasıdır. Söhbət iqtisadi, hərbi və bir sıra təşkilatlarda iki ölkənin siyasi əməkdaşlığından gedir. Hindistan Rusiyadan bir sıra silahlar alır. Ən nəhayət, Hindistan bu günlərdə Avropa İttifaqı ilə böyük ticarət sazişi imzalayıb. Bütün bunların fonunda Hindistan mallarının ABŞ-a ixracına tətbiq edilən tariflərin 25 faizdən 18 faizə endirilməsi nədir ki? O baxımdan hesab edirəm ki, Hindistan özəl şirkətlər vasitəsi ilə Rusiya neftini idxal edərək buna əməl etməyəcək. Ona görə Rusiya rəsmiləri Hindistan məsələsində bu qədər arxayın danışırlar”.
Vidadi ORDAHALLI
