Məhəmməd Əsədullazadə: “Heç bir region dövləti İrana görə Birləşmiş Ştatlarla qarşıdurmaya getməz”
İranın ali rəhbəri Əli Xamenei ABŞ-ın İrana qarşı hərbi əməliyyatının regional miqyaslı münaqişəyə çevriləcəyi ilə hədələyib. Xamenei bildirib ki, əgər bu dəfə müharibəyə başlasalar, bu, yalnız iki ölkə arasında olmayacaq, bütün regionu əhatə edən müharibə olacaq.
O əlavə edib ki, İran xalqı ABŞ prezidenti Donald Trampın Yaxın Şərqə silahlı qüvvə göndərməsi ilə bağlı açıqlamalarından qorxmamalıdır. “Biz müharibəyə başlamırıq və heç bir ölkəyə hücum etmək istəmirik, amma İran xalqı hücum edənə qarşı möhkəm müqavimət göstərəcək”, - deyə Xamenei vurğulayıb.
Xameneinin xəbərdarlığına Trampın cavabı belə olub: “Əlbəttə, belə deyəcək. Razılaşma əldə etməsək, onun haqlı olub-olmadığını görəcəyik”.
Maraqlıdır, hansı regional müharibədən söhbət gedə bilər? Regional müharibə o halda ola bilər ki, bölgə dövlətlərindən biri müqavimət göstərsin. İrana görə hansı dövlət müqavimət göstərər ki? Məgər qonşu dövlətlər olan Azərbaycan, Türkiyə, Rusiya, Səudiyyə Ərəbistanı, İraq, BƏƏ İrana görə müharibəyə qoşular? Axı bu real görünmür. İstənilən halda İranın vurulması regional müharibəyə çevrilə bilərmi?
Sözügedən məsələ ilə bağlı fikirlərini baki-xeber.com-la bölüşən politoloq Məhəmməd Əsədullazadə hesab edir ki, İrana hücum heç bir halda regional müharibəyə səbəb olmayacaq: “İranla ABŞ arasında siyasi və hərbi böhran davam edir. Fevralın 5-6-da ABŞ prezidentinin xüsusi nümayəndəsi Uitkoffla İranın xarici işlər naziri Ərakçi arasında nüvə sazişi və digər məsələlərlə bağlı danışıqlar keçiriləcək. Nəzərə almaq lazımdır ki, ABŞ İran ətrafında böyük hərbi donanma və aviasiya cəmləşdirir və bu ölkəyə qarşı hərbi əməliyyatlar masadadır. Sadəcə olaraq Xamenei belə bir açıqlama ilə çıxış edərək qarşı tərəfi bununla çəkindirməyə çalışır. Regional müharibə hətta Üçüncü Dünya Müharibəsinə də gətirib çıxara bilər. Ancaq heç bir region dövləti İrana görə Birləşmiş Ştatlarla qarşıdurmaya getməz. İran Küveyti, Birləşmiş Ərəb Əmirliyini və digər region dövlətlərini vursa, həmin ölkələri özünə qarşı qaldırmış olacaq. Yəni bu dövlətlər ABŞ-a qarşı yox, İrana qarşı birləşəcəklər. Bunun da nəticəsi İran üçün ağır olacaq. O üzdən, Tramp Xameneinin fikirlərinə istehza ilə yanaşır. Çünki İrana görə heç bir region dövləti ABŞ-la qarşıdurmaya getməz. Düzdür, bölgə dövlətləri müharibənin olmasını istəmir. Ancaq bu, o demək deyil ki, ABŞ hərbi əməliyyatlara başladıqdan sonra buna güc yolu ilə müqavimət göstərəcəklər. Bu, heç bir halda real görünmür”.
Vidadi ORDAHALLI
