Hindistan Silahlı Qüvvələrinin Müdafiə Qərargahının rəisi general Anil Çauxan və Ermənistan müdafiə naziri Suren Papikyan İrəvanda ikitərəfli əlaqələrin inkişafını müzakirə ediblər. Papikyan müdafiə sahəsində Ermənistan-Hindistan əməkdaşlığının hazırkı səviyyəsini yüksək qiymətləndirib və Ermənistanın Hindistanla hərbi-texniki əməkdaşlığı davam etdirməyə hazır olduğunu bildirib.
General Çauxan Hindistan Silahlı Qüvvələrinin mövcud sahələrdə əməkdaşlığı inkişaf etdirməyə və qarşılıqlı maraq doğuran yeni istiqamətlərə təşəbbüs göstərməyə hazır olduğunu ifadə edib. Görüş zamanı həmçinin regional və beynəlxalq təhlükəsizliklə bağlı bir sıra məsələlər müzakirə edilib. Ermənistan Silahlı Qüvvələrinin Baş Qərargah rəisi Edvard Asryan da l Anil Çauhanla görüşüb. Görüşdə Ermənistan-Hindistan müdafiə əməkdaşlığının hazırkı vəziyyətini müzakirə ediblər və 2026-cı il üçün iş istiqamətləri barədə razılığa gəliblər. Tərəflər Ermənistan və Hindistanda təhsil tədbirlərinin, peşəkar hazırlıqların, təlimlərin və hərbi təlimlərin keçirilməsinin, eləcə də müxtəlif sahələrdə təcrübə mübadiləsinin vacibliyini vurğulayıblar. Asryan Ermənistan Silahlı Qüvvələrinin transformasiyasının əsas istiqamətlərini təqdim edərək, bu prosesdə Hindistanla əməkdaşlığın vacibliyini vurğulayıb. Məlumata görə, son illərdə İrəvan və Nyu Delhi 1,5 milyard dollar dəyərində silah müqavilələri imzalayıblar. Razılaşmalar çərçivəsində Hindistan yaylım atəş sistemləri, top artilleriyası, hava hücumundan müdafiə vasitələri və sair təchiz edir.
Qeyd edək ki, Hindistan 2022-2024-cü illər arasında istehsal etdiyi bütün silahların 43%-ni Ermənistana satıb. Hindistanın Ermənistana satdığı eksperimental xarakterli, heç bir müharibə və döyüş sınağından çıxmamış silahların əksəriyyəti - "Akaş" hava hücumundan müdafiə kompleksi, "ATAGS" haubitsaları, “MArG 155” özüyeriyən haubitsalarının keyfiyyəti və dəqiqliyi ciddi sual altındadır. Onu da qeyd edək ki, 2020-ci il Vətən müharibəsindən sonra Ermənistanın silahlanma strategiyasında baş verən dəyişikliklər bu ölkənin regiondankənar tərəfdaşlarla, o cümlədən Hindistanla münasibətlərini ön plana çıxarmasına səbəb olub. Bu əməkdaşlıq təkcə ikitərəfli münasibətlər çərçivəsində deyil, bütövlükdə Cənubi Qafqazın təhlükəsizlik balansına təsir edən ciddi amil kimi qiymətləndirilir. Ermənistan və Hindistan arasında hərbi əməkdaşlıq əsasən silah-sursat tədarükü, artilleriya sistemləri, raket texnologiyaları və hərbi təlimlər sahəsini əhatə edir. Bu əməkdaşlığın Cənubi Qafqaz üçün əsas mənfi təsiri regionda silahlanma yarışını sürətləndirməsidir. Ermənistanın yeni və müasir silahlarla təmin olunması sülh danışıqlarına marağın azalmasına, revanşist meyllərin güclənməsinə zəmin yaradır. Halbuki münaqişədən sonrakı dövrdə əsas prioritetlərdən biri etimadın möhkəmləndirilməsi və davamlı sülhün təmin edilməsi olmalıdır. Silahlanmaya üstünlük verilməsi isə bu prosesi əngəlləyir və gərginliyi artırır.
Tahir TAĞIYEV
