Əli Mustafa: “Paşinyanın mesajı odur ki, Rusiya ya öhdəliklərini yerinə yetirsin, ya da idarəçilikdən çəkilsin”
“Regional kanalların açılması məsələsində əməkdaşlığımızı dərinləşdirmək üçün rusiyalı tərəfdaşlarımızla nəinki əməkdaşlıq etməyə hazırıq, həm də bunu istəyirik”. Bunu Ermənistan baş naziri Nikol Paşinyan keçirdiyi brifinqdə bildirib.
Paşinyan növbəti dəfə açıq bəyan edib ki, dəmir yolu ilə bağlı Rusiyanın qərarını gözləyir: “Düzünü desəm, (Rusiyaya) yazılı müraciət etmişik, hazırda cavab olub-olmadığını bilmirəm. Biz regional prosesləri dayandıra bilmərik. Ümid edirik ki, rusiyalı tərəfdaşlarımız tərəddüd etməyəcəklər. Eyni şey Axurik hissəsinə də aiddir. Əgər rusiyalı tərəfdaşlar nədənsə bu investisiyanı etmək istəmirlərsə, Ermənistan tərəfi həmin hissələri geri götürəcək və onları müstəqil şəkildə təmir edəcək”.
Paşinyanın “biz regional prosesləri dayandıra bilmərik” və Rusiyadan cavab gözlədikləri ilə bağlı fikirləri çox ciddi siqnaldır. Artıq Ermənistan Rusiyanın əlindən dəmir yollarının hissə-hissə geri alınması prosesinə başlaya bilər. Paşinyan bunu açıq formada qarşı tərəfə bildirir.
Sözügedən məsələni baki-xeber.com-a şərh edən siyasi ekspert Əli Mustafanın fikrincə, hazırda Ermənistanla Rusiya arasında bir sıra məsələlərdə bir qeyri-müəyyənlik var: “Xüsusən dəmir yolları ilə bağlı məsələdə bu, özünü daha çox göstərir. Ermənistan dəmir yolları 2008-ci ildən Rusiyanın mülkiyyətindədir. Ancaq Paşinyan da fərqindədir ki, Rusiya Zəngəzur dəhlizinin reallaşmasında maraqlı deyil. Ona görə maraqlı deyil ki, dəhlizə ABŞ nəzarət edəcək. Ona görə də Nikol bu qeyri-müəyyənliyi tez aradan qaldırmaq istəyir. Paşinyanın mesajı odur ki, Rusiya ya öhdəliklərini yerinə yetirsin, ya da idarəçilikdən çəkilsin. Yəni dəmir yollarının idarəçiliyini Ermənistana təhvil versin. Çünki prosesin uzanması birinci növbədə Ermənistanın maraqlarına zərbədir. Rusiya isə konkret olaraq qəti heç bir addım atmır. Niyə? Ona görə ki, iyunda Ermənistanda keçiriləcək parlament seçkilərinin nəticələrini gözləyir. Rusiya indi bunu etsə, bu, revanşistlərin mövqelərini zəiflədəcək, Paşinyanın mövqelərini gücləndirəcək. Nəzərə alsaq ki, Kreml ona bağlı olan revanşistləri hakimiyyətə gətirmək istəyir, o zaman niyə Paşinyana kömək etsin ki? Bax budur məsələnin mahiyyəti. Paşinyan hakimiyyəti anlayır ki, Rusiyanın səssizliyi regional layihələri pozur. O üzdən, getdikcə daha açıq formada tələblərini dilə gətirir. Çox güman ki, Ermənistan özü birtərəfli formada dəmir yollarını bərpa edəcək”.
Vidadi ORDAHALLI
