Ermənistanın Avropa İttifaqı ilə sürətlənmiş yaxınlaşması həm Rusiya ilə müttəfiqlik münasibətlərinə, həm də postsovet məkanında inteqrasiya proseslərinin inkişafına mənfi təsir göstərəcək. Bunu Rusiya Xarici İşlər Nazirliyinin Avropa məsələləri departamentinin direktoru Vladislav Maslennikov TASS agentliyinə verdiyi müsahibədə bildirib.
İrəvanın Avropa İttifaqına qoşulmaq niyyətini şərh edən rusiyalı diplomat qeyd edib: "Aİ-nin sürətlə aqressiv hərbi-siyasi alyansa çevrilməsi və Rusiya ilə qarşıdurmaya yönəlmiş strateji xətti nəzərə alınmaqla, Ermənistanın bu təşkilata qoşulmaq marağı narahatlıq doğurmaya bilməz. Ümid edirik ki, Avrasiya İqtisadi İttifaqının üzvü olan Ermənistan Brüssel ilə sürətləndirilmiş yaxınlaşmanın həm müttəfiq münasibətlərimiz, həm də postsovet məkanında inteqrasiya proseslərinin inkişafı üçün mümkün mənfi nəticələrini dərk edəcək". Rusiya Xarici İşlər Nazirliyinin nümayəndəsi eyni zamanda vurğulayıb ki, Rusiya digər dövlətlərin inteqrasiya birliklərində iştirak etmək suveren hüququna və xüsusən də onların iqtisadi inkişaf üçün əlavə imkanlar əldə etmək və öz əhalisinin rifahını yaxşılaşdırmaq istəyinə hörmətlə yanaşır. Diplomat bildirib ki, Aİİ və Aİ-yə eyni vaxtda üzvlük mümkün deyil. Ermənistanın Avropaya inteqrasiya perspektivləri ilə bağlı şərh verən Rusiya xarici işlər naziri Sergey Lavrov bir müddət əvvəl bildirmişdi : "Avrasiya İqtisadi İttifaqının prinsipləri və Avropa ittifaqının fəaliyyəti ilə tanış olan hər kəs bilir ki, Aİİ-in üzvü olaraq Aİ standartlarını qəbul etmək mümkün deyil". Lavrov 2025-ci ilin dekabrında Avropa İttifaqı ilə Ermənistan arasında imzalanmış sənədə toxunaraq qeyd edib: "Ermənilərə viza liberallaşdırılması təklif olunur ki, bu da Aİ-nin hüquq-mühafizə sistemində, sərhəd mühafizəsi məsələlərində rol oynaması ilə bağlıdır. Sərhədçilərimizin Ermənistanda olduğu aydındır. Bu halda sual yaranır: bu, İrəvanın hazırkı öhdəlikləri ilə necə uyğun gəlir?". Ermənistanın xarici işlər naziri Ararat Mirzoyan bu yaxınlarda Ermənistan Respublikası hökumətinin Rusiyanı Ermənistandan çıxarmaq və ya Rusiya ilə siyasi, iqtisadi və digər əlaqələri kəsmək gündəliyinin olmadığını bildirib. Mirzoyan Avropa İttifaqı ilə münasibətlərin dərinləşdirilməsinin Rusiya ilə əlaqələri kəsmək məqsədi daşımadığını vurğulayıb: "Rusiya ilə əlaqələrin kəsilməsi Aİİ-ə üzvlüklə eyniləşdirilməməlidir. Biz artıq Aİİ-nin üzvüyük və Aİİ çərçivəsində faydalı əməkdaşlığımız var. Əgər bir gün Avropa İttifaqına qoşulmaq məsələsi ortaya çıxsa, bu suala paralel olaraq hamımız oturub bu barədə düşünəcəyik. Bu, müzakirə mövzusuna çevriləcək".
Nahid SALAYEV
