Afsəddin Nəbiyev: “Abbasovun "Rusiya ehtiyat kadrı" kimi nəzərdən keçirilməsi təsadüfi bir nəticə deyil”
Dövlət Təhlükəsizliyi Xidmətinin İstintaq Baş İdarəsində istintaq olunan sabiq PA rəhbəri “Ramiz Mehdiyev İşi” üzrə cinayət məsuliyyətinə cəlb olunan və barəsində axtarış elan olunan baş nazirin sabiq birinci müavini Abbas Abbasovun Bakıdakı mənzillərində axtarış aparılıb.
Məlumata görə, A.Abbasovun Bakıda bağ evində və əsas yaşadığı mənzilində aparılan axtarışda onun ailə üzvləri iştirak edib. Bildirilir ki, A. Abbasovun ötən illər ərzində Rusiya hökuməti və ayrı-ayrı qurumları tərəfindən aldığı mükafatlar, fəxri fərmanlar və sair sənədlər istintaq qrupu tərəfindən götürülüb.
O da məlumdur ki, kiməsə elə-belə bu qədər mükafat verilmir. Özü də Rusiya kimi dövlət heç vaxt bunu təmənnasız verməz. O baxımdan maraqlıdır, Abbas Abbasov Rusiyadan məlum mükafatları, orden və medalları nəyin müqabilində alıb?
Sözügedən məsələyə aydınlıq gətirən AMİP-in sədr müavini Afsəddin Nəbiyev hesab edir ki, Azərbaycan Dövlət Təhlükəsizliyi Xidmətinin sabiq baş nazirin birinci müavini Abbas Abbasovun mənzillərində həyata keçirdiyi axtarışlar ölkənin daxili siyasətində ciddi bir anonsdur: “Uzun illər "toxunulmaz" statusunda görünən və Rusiya elitasına yaxınlığı ilə seçilən bir fiqurun cinayət məsuliyyətinə cəlb edilməsi, Azərbaycanın öz suverenliyini qorumaq naminə atdığı növbəti strateji addımdır. Axtarış zamanı müsadirə olunan Rusiya dövlət təltifləri, orden və fəxri fərmanlar bu işin ən kritik nöqtəsidir. Beynəlxalq siyasi münasibətlər kontekstində bu tip mükafatlar çox vaxt şəxsin xarici dövlətin maraqlarına göstərdiyi xüsusi xidmətlərin rəsmi "təşəkkürnaməsi" kimi qəbul edilir. Bu kimi hadisələr Abbasovun bu mükafatları nəyin müqabilində alması ilə bağlı bir neçə ehtimalı önə çıxarır. Abbas Abbasovun "Rusiya ehtiyat kadrı" kimi nəzərdən keçirilməsi təsadüfi bir nəticə deyil. 2013-cü ildə yaradılmış və xalq arasında "Milyarderlər İttifaqı" kimi tanınan Rusiyadakı Azərbaycanlı Milyarderlər İttifaqı bu ssenarinin ən bariz nümunəsi idi. Abbasovun bu layihədəki liderliyi, onun Moskva tərəfindən Bakıdakı mövcud hakimiyyətə qarşı bir "alternativ" və ya "təzyiq rıçaqı" kimi saxlanıldığını təsdiqləyirdi. A.Abbasovun evində aparılan axtarış və "Ramiz Mehdiyev işi" çərçivəsindəki istintaq göstərir ki, Azərbaycan dövləti artıq öz daxilində "ikili sadiqlik" (həm Bakıya, həm Moskvaya) nümayiş etdirən kadrları qəbul etmir. Rusiya mükafatlarının və digər xüsusi sənədlərin götürülməsi, bu şəxsin kəşfiyyat və ya siyasi nüfuz agenti kimi fəaliyyətinin dərindən araşdırılacağından xəbər verir. Bu hadisə ilə Abbasovun bir zamanlar təmsil etdiyi "Rusiya meylli qanad" tamamilə darmadağın edilir. Artıq o, Rusiyanın ehtiyat kadrı deyil, beynəlxalq axtarışda olan və keçmiş fəaliyyəti ifşa olunan bir fiqurdur”.
Vidadi ORDAHALLI
