Arzuxan Əlizadə: “Bu ölkədə Çinin aktiv iştirakı və bəzi layihələri həyata keçirməsi Vaşinqtonu qane etmir”
Gürcüstanın Baş naziri İrakli Kobaxidze ABŞ-ın vitse-prezidenti Cey Di Vensin İrəvan və Bakıya səfər planlaşdırmasını, Tiflisi proqramdan kənarda saxlamasını belə izah edib.
Baş nazir bildirib ki, vitse-prezidentin səfəri “TRIPP marşrutu” (Zəngəzur dəhlizi) ilə əlaqəlidir və bu baxımdan əsas ölkələrin Ermənistan və Azərbaycan olması məntiqlidir. O, Gürcüstanın ABŞ-la strateji tərəfdaşlığın bərpasına hazır olduğunu və Vaşinqtondan bu istiqamətdə konkret addımlar gözlədiklərini qeyd edib.
O da məlumdur ki, Gürcüstanın ABŞ-la münasibətləri, Avropa İttifaqı ilə olan qədər gərgin deyil. Üstəlik, 2024-cü ildə ABŞ-da prezident seçkiləri kampaniyası dövründə Gürcüstan hakimiyyətinin Trampdan gözləntiləri böyük idi. Hesab edirdilər ki, Demokratlar Partiyası hakimiyyətdən gedəndən sonra yeni administrasiya Gürcüstanla münasibətlərə yenidən baxacaq. Ancaq bunların heç biri baş vermədi.
Maraqlıdır, Tiflislə Vaşinqton arasında davam edən soyuqluq nədən irəli gəlir?
Sözügedən məsələyə aydınlıq gətirən AMİP sədri, millət vəkili Arzuxan Əlizadə baki-xeber.com-a açıqlamasında bildirdi ki, bunun bir neçə səbəb var: “Səbəblərdən biri 2012-ci ildən Gürcüstanda hakimiyyətdə olan “Gürcü Arzusu” Partiyasının qurucusu Bidzinə İvanişvilinin Rusiya ilə olan gizli əlaqələridir. Düzdür, Abxaziya və Cənubi Osetiyanın işğal altında olması səbəbindən Gürcüstanla Rusiya arasında diplomatk münasibətlər mövcud deyil. Ancaq Gürcüstan hakimiyyətinin yeritdiyi siyasət Moskvanın maraqlarına cavab verir. Gürcüstan məsələsində ABŞ-ı narahat edən digər amil Çinlə bağlıdır. Məsələ ondadır ki, ABŞ bir sıra regionlarda Çinin iqtisadi və siyasi təsir sferasının genişlənməsinə qarşıdır. Son illər Gürcüstanla Çin arasında iqtisadi əlaqələr genişlənir. Çin Gürcüstanda bir sıra layihələri maliyyələşdirir. Onlarda biri də Anakli dəniz limanıdır. Nəzərə almaq lazımdır ki, Gürcüstan yeganə Cənubi Qafqaz dövlətidir ki, açıq dənizə çıxışı var. Bu ölkədə Çinin aktiv iştirakı və bəzi layihələri həyata keçirməsi Vaşinqtonu qane etmir. Bu səbəbdən ABŞ-ın siyasətində Gürcüstana münasibət dəyişmir. Tramp istəyir ki, Gürcüstan Çinlə əlaqələri aşağı səviyyəyə salsın, ölkənin mühüm dəniz limanlarında ABŞ şirkətlərinə xüsusi önəm versinlər. Fikrimcə, bu səbəbdən ABŞ-ın vitse-prezidenti Cey Di Vensin proqramına Tiflis daxil edilməyib”.
Vidadi ORDAHALLI
