Mübariz Göyüşlü: "Bunun üçün günlərin birində Ermənistan Rusiya ilə hesablaşmalı olacaq, bu hesablaşma isə Ermənistan üçün son ola bilər..."
Ermənistanla Avropa İttifaqı arasında münasibətlər görünməmiş sürətlə dərinləşməkdə davam edir. Bu barədə Avropa Xarici Fəaliyyət Xidmətinin X sosial şəbəkəsindəki mikrobloqunda yazılıb.
Burada Aİ diplomatiyasının rəhbəri Kaja Kallasın Ermənistanın xarici işlər naziri Ararat Mirzoyanla görüşünün təfərrüatları təqdim olunub. "Ali komissar Kaja Kallas Ermənistanın xarici işlər naziri Ararat Mirzoyan ilə görüşüb. Ermənistanla münasibətlər görünməmiş sürətlə dərinləşməkdə davam edir. Onlar Aİ-nin Ermənistan və Azərbaycan arasında münasibətlərin normallaşdırılması prosesinə yardımını müzakirə ediblər", - şərhdə deyilir.
Ali komissar Kaja Kallas "Ermənistanla münasibətlər görünməmiş sürətlə dərinləşməkdə davam edir" dedikdə nəyi nəzərdə tutur? Bu münasibətlərin hədəfi nədir və hara qədər inkişaf edə bilər?
Cross Media Təhlil Mərkəzinin analitiki, siyasi şərhçi Mübariz Göyüşlü baki-xeber.com-a məsələ barədə açıqlamasında deyib ki, Ermənistanla Avropa İttifaqının arasında münasibətlərin dərinləşməsi Cənubi Qafqazda təhlükəli nəticələrə gətirib çıxara bilər: "Çünki Avropa İttifaqının məqsədi Ermənistanla yalnız iqtisadi ticarət əlaqələri qurmaq deyil. Bu tip dövlətlərin əsas məqsədi mövcud olduqları ölkələrdən istifadə edərək regionda öz geosiyasi məqsədlərini həyata keçırməkdir. Bu isə Aİ-nin mövcud olduğu ölkə ilə digər dövlətlər arasında qarşıdurmaya və münaqişəyə səbəb olur. Daha doğrusu, onlar bu münaqişələri məqsədyönlü şəkildə yaradırlar ki, bundan istifadə edərək həm regionu öz istəklərinə uyğun idarə etsinlər, həm də regiondan uzun müddət iqtisadi mənfəət əldə etsinlər. Bu gün biz NATO-ya üzvlük məqsədlərindən dolayı Ukraynanın başına gələnlərin şahidiyik. Gurcüstanda da eyni səbəbdən yaranan qarşıdurmalar göz önündədir. İndi də Ermənistanla əlaqələri dərinləşdirmək adı altında Aİ regionda öz varlığını daha qabarıq şəkildə təmin etməkdədir. Artıq iki ildən çoxdur ki, "mülki monitorinq" adı altında Aİ-nin casus qrupu Ermənistanda fəaliyyət göstərir. Ermənistan siyasi hakimiyyəti Aİ-nin dəstəyindən ruhlanaraq artıq Azərbaycana qarşı təxribatları intensivləşdirməkdədir.
Hətta Aİ Cənubi Qafqazdan platsdarm kimi istifadə edərək bu ölkələrin qonşularına qarşı təxribat hazırlaya bilər.
Mən bu tendensiyadan heç bir müsbət nəticə gözləmirəm.
Paşinyanın təqdimatından belə anlaşılır ki, Ermənistanla Aİ arasında münasibətlər hələ erkən inkişaf mərhələsindədir. Amma bu münasibətlər hara qədər inkişaf edəcək, bundan dövlət və cəmiyyət hansı müsbət nəticələr əldə edəcək, bunlar hələ də sual doğurur. Bu yaxınlaşmadan həm Ermənistan, həm də regionun digər ölkələri üçün böyük fəlakətlər gözləmək olar. Ona görə ki, Ermənistan yüzilliklərlə Rusiyanın forpostu kimi yaşayıb və bu gün də eyni statusdadır. İndi isə Avropa onu Rusiyanın əlindən almaq istəyir. Ermənistanın ərazisində Rusiyanın hərbi varlığı ən müxtəlif formada təmsil edilir. Ölkə iqtisadiyyatı rus şirkətlərinin monopoliyası altîndadır. Xarici ticarətin 80 faizindən çoxu Rusiya və onun müttəfiqlərinin payına düşür. Belə bir şəraitdə Ermənistanın Aİ ilə əlaqələrinin dərinləşməsi mümkün deyil. Bunun üçün günlərin birində Ermənistan Rusiya ilə hesablaşmalı olacaq, bu hesablaşma isə Ermənistan üçün son ola bilər..."
Dəniz NƏSİRLİ
