Dünya təcrübəsi göstərir ki, hər bir cəmiyyətdə ictimai və dövlət maraqlarının qorunması sabitliyin, milli inkişafın və vətəndaşların rifahının təməl daşı kimi çıxış edir. Bu maraqlara qanunun və asayişin qorunması, iqtisadi yüksəliş, milli təhlükəsizlik, ictimai rifah və qanunun aliliyi daxildir.
Hökumətlər, qurumlar və vətəndaşlar kollektiv maraqların milli birliyə və tərəqqiyə xələl gətirə biləcək həm daxili, həm də xarici təhdidlərdən qorunmasını təmin etmək üçün məsuliyyət daşıyırlar. Bu xüsusda Azərbaycan uğurlu bir nümunə formalaşdıra bilib.
Ərazilərin işğaldan azad edilməsi ümumi maraqların, iqtisadi tərəqqinin dinamikliyinin təmin edilməsində mühüm rol oynadı
Ölkəmizdə ictimai və dövlət maraqlarının uğurlu müdafiəsinin ən böyük nəticələrindən biri heç şübhəsiz ki, Azərbaycanın ərazi bütövlüyünün təmin olunmasıdır. Bu xüsusda prezident İlham Əliyev Ağdam Muğam Mərkəzinin açılışında etdiyi çıxışı zamanı qeyd edib: “Erməni faşizmi bu bölgəni daim işğal altında saxlamaq istəyirdi və əfsuslar olsun ki, onların arxasında duran bəzi xarici dövlətlər onlarla həmrəy idi. Açıq olmasa da, gizli kanallarla onlara verilən mesajlar ondan ibarət idi ki, Azərbaycan cürət edib heç vaxt azadlıq müharibəsinə başlamayacaq, biz sizin arxanızdayıq, biz sizə dəstək olacağıq, sizə silah veririk, mənəvi dəstək veririk, sizin üçün mənəvi dayağıq. Bütün bu amillər Ermənistanı faktiki olaraq öz işğalçılıq siyasətində daha da gücləndirirdi. Ancaq onlar bir şeyi hesablaya bilməmişlər: o da Azərbaycan xalqının iradəsi, milli ruhu, xalqımızın əyilməz ruhu və bu torpağa olan bağlılığımız.İşğal dövründə - 30 il ərzində biz hər gün bu müqəddəs azadlıq gününü yaxınlaşdırırdıq. Hər birimiz öz iş yerində vahid amal uğrunda birləşərək, azadlıq üçün, azadlıq müharibəsi üçün yorulmadan çalışırdıq. Bütün cəmiyyət bir amal uğrunda birləşəndə o cəmiyyət böyük işlərə qadirdir. Heç bir qüvvə xalq qarşısında dura bilməz. Xalqımızın böyüklüyü məhz bundadır...Biz “öldü var, döndü yoxdur” şüarı ilə yaşayırdıq və 44 günlük Vətən müharibəsi həm peşəkarlıq, həm qəhrəmanlıq, həm milli ruh salnaməsidir. Bu, bütün dünyaya Azərbaycan xalqının nə qədər böyük xalq olduğunu göstərdi. Onu göstərdi ki, Azərbaycan xalqı mütləq və tam qələbə qazanmaq üçün öz canından keçməyə hazırdır”. Azərbaycan dövləti və xalqı hər hansı iqtisadi, sosial və səhiyyə çətinliklərinə, müharibənin gətirdiyi maddi ziyanlara, çoxsaylı və çoxçeşidli maliyyə xərclərinə baxmayaraq, özünə qarşı edilmiş təcavüzə son qoydu. Bu, milli maraqların uğurla təmini oldu, cəmiyyət vahid mövqedə birləşdi. Həmin maraqların təmin olunması Azərbaycan üçün yeni mərhələ açdı. Özü də bu mərhələdə də ümumi maarqların müdafiəsi üçün yeni imkanlar yarandı. Bəllidir ki, ölkənin 20 faizə yaxın ərazisinin 27 ildən çox işğal altında qalması həmin torpaqlarımızın iqtisadi potensialından istifadəsinə imkan verməyib. Amma indi vəziyyət dəyişib. İşğaldan azad olunan ərazilərdə 155 müxtəlif növ faydalı qazıntı yataqları, o cümlədən: 5 qızıl, 6 civə, 2 mis, 1 qurğuşun və sink, 19 üzlük daşı, 10 mişar daşı, 4 sement xammalı, 13 müxtəlif növ tikinti daşları, 1 soda istehsalı üçün xammal, 21 pemza və vulkan külü, 10 gil, 9 qum-çınqıl, 5 tikinti qumu, 9 gips, anhidrid və gəc, 1 perlit, 1 obsidian, 3 vermikulit, 14 əlvan və bəzək daşları yataqları yerləşir. Ermənistanın işğalı dövründə bundan istifadə mümkünsüz idi. Bu, Azərbaycanın milli maraqlarına, iqtisadi mənafeyinə zidd hal idi. Ancaq indi vəziyyət dəyişib. Azərbaycan bu yerlərdən ölkənin rifahı naminə istifadə edir və bu da ümumi maraqların qorunmasında müstəsna əhəmiyyət kəsb edir.
Qlobal Cənub QHT Platforması beynəlxalq miqyasda dövlət maraqlarının müdafiəsinə xidmət edir
O da bəllidir ki, ictimai maraq dedikdə əhalinin ümumi rifahı və hüquqları nəzərdə tutulur. O, təhsil, səhiyyə, infrastruktur, təhlükəsizlik və ədalətə çıxışı əhatə edir. Dövlət marağı isə milli dövlətin özünün suverenliyinə, ərazi bütövlüyünə və funksionallığına aiddir. Bura milli sərhədlərin qorunması, ictimai institutların saxlanması və idarəetmənin səmərəli fəaliyyətinin təmin edilməsi daxildir. Bu maraqlar təmin edildikdə, cəmiyyətlər inkişaf edir. Azərbaycan nümunəsi yenə bunun əyani sübutudur.
Azərbaycanda təhsil, səhiyyə, təhlükəsizlik kii hüquqlar ən yüksək səviyyədə təmin olunur. Eyni zamanda ölkədə vətəndaş cəmiyyətinin sürətli inkişafı da ictimai maraqların təmini baxımından böyük önəmə malikdir. Azərbaycandakı müstəqil ictimai təşkilatlar əhaliyə sosial xidmət göstərir, sosial əhəmiyyətli fəaliyyətlə məşğul olur, insan hüquqlarını qoruyur Eyni zamanda onlar ictimai nəzarət mexanizmləri vasitəsilə dövlət orqanlarının şəffaflığını və səmərəliliyini təmin etməyə kömək edir. Bununla yanaşı, aparılan genişmiqyaslı islahatlar insanların dünyagörüşünü, həyat tərzini müsbətə doğru mütləq dəyişir və nəticədə ictimai maraqları təmin edir. Ancaq bu sahəyə xüsusi diqqət olunması da vacibdir. Məsələ burasındadır ki, Azərbaycanın inkişafı xaricdəki bəzi qüvvələr tərəfindən qısqanclıqla qarşılanır. Onlar QHT-lər və digər vasitələrlə Azərbaycana qarşı müəyyən addımlar atmağa can atırlar. Artıq bununla bağlı istintaq da aparılır. Amma QHT sektorunun ümumi fəaliyyəti və dövlət maraqlarının müdafiəsində zəruri rol oynayır. Hətta bu günlərdə Bakıda “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” adlı Forumda Qlobal Cənub QHT Platforması təsis olunub. BMT-nin Azərbaycandakı rezident əlaqələndiricisi Vladanka Andreyevanın sözlərinə görə, təcrid edilmiş səslərin Qlobal Cənub çərçivəsində ucaldılması olduqca vacibdir. Qlobal Cənub QHT Platforması bu mənada mühüm funksiyalar yerinə yetriəcək. Təbii ki, Azərbaycanın Qlobal Cənubun səsini dünyaya çatdırmaq uğrunda atdığı addımlar olduqca qürurvericidir. Bu, həm də beynəlxalq miqyasda dövlət maraqlarının müdafiəsi üçün mühüm addım hesab olunur.
Samirə SƏFƏROVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
