Ramil Məmmədli: "Sülh sazişi olmasa, bu təkcə regiondakı sabitliyə təsir etməyəcək"
Prezident İlham Əliyev "Euronews" televiziyasına müsahibəsində Ermənistan ilə Azərbaycan arasında sülhə nail olunması ilə bağlı sualı cavablandırarkən deyib ki, saziş imzalanmasa, bu, bütöv bölgə üçün çox pis olacaq:
"Biz sentyabrın 11-də onlara sonuncu şərhlərimizi təqdim etmişdik və onlardan cavabı yalnız iki gün əvvəl almışıq. Beləliklə, təqribən iki ay yarımdır ki, onlar bir neçə səhifədən ibarət mətn layihəsini nəzərdən keçiriblər. Bu nə deməkdir? O deməkdir ki, onlar süni olaraq prosesi ləngitmək istəyirlər. İlin axırına qədər sülh sazişinin imzalanması ilə bağlı ümidlər o qədər də nikbin deyil. Lakin hesab edirəm ki, zaman qrafiki o qədər də vacib deyil. Vacib olan hər iki ölkənin gündəliyidir. Biz müxtəlif rəsmilər arasında və fərqli kanallar vasitəsilə işçi səviyyədə təmasları saxlayırıq. Düşünürəm ki, sülh üçün alternativ yoxdur. Əgər sülh sazişi imzalanmasa, bu, bütöv bölgə üçün çox pis olacaq".
"Bunlardan sığortalanmaq üçün Avroittifaq sazişin tezləşdirilməsi istiqamətində İrəvana təzyiq göstərməlidir"
Sözügedən məsələni "Bakı-Xəbər"ə şərh edən hərbi ekspert Ramil Məmmədli hesab edir ki, Ermənistanla sülh sazişi imzalanmasa regionda gərginlik və təhdid amili ortadan qalxmayacaq: "Prezidentin bununla bağlı fikirləri tamamilə reallığı əks etdirir. Məsələ ondadır ki, sülh sazişi olmasa regionda daim bir gərginlik ab-havası hökm sürəcək. Bu da regional layihələri dolayı da olsa təhdid altında saxlaya bilər. Tərəflər arasında sülh olmasa Fransa, Hindistan və digər ölkələr mərhələli şəkildə Ermənistanı silahlandırmaqda davam edəcəklər. Bu da, öz növbəsində, Ermənistanda revanşizm əhval-ruhiyəsini yenidən körükləyəcək. Sülh olmasa Azərbaycan tərəfi məcburdur ki, yarana biləcək bəzi təhdidləri önləmək üçün müəyyən preventiv addımlar atsın. Məsələn, görsək ki, Ermənistanın aldığı bəzi silahlar ölkəmizə təhdid yaradır, o zaman Azərbaycan onları məhv edəcək. Sülh sazişi olmasa, bütün kommunikasiya xətlərinin açılması mümkün olmayacaq. Bəzi yollar açılsa belə, onların işləkliyi şübhə doğurur. İstənilən vaxt Ermənistan nəyisə bəhanə edib yolu bağlayacaq, insidentlərin baş verməsinə şərait yaradacaq və s. Deməyim odur ki, güclü saziş, ciddi öhdəliklər olmasa Ermənistandan nə dəsən gözləmək olacaq. Bu da təkcə regiondakı sabitliyə təsir etməyəcək. Eyni zamanda Avropa İttifaqının Mərkəzi Asiya ölkələri ilə olan tranzit əlaqələrinə təsir edəcək. Çindən Avropaya və əks istiqamətdə daşımalara təsir edəcək. Nəzərə almaq lazımdır ki, istənilən gərginlik bu kimi nəqliyyat, enerji layihələrinə öz təsirini göstərir. Bu da Rusiyanın, müəyyən mənada İranın maraqlarına cavab verir. Ona görə də bütün bunlardan sığortalanmaq üçün sazişin tezləşdirilməsi istiqamətində Avroittifaq İrəvana təzyiq göstərməlidir".
Vidadi ORDAHALLI
