Xəyal Bəşirov: "Azərbaycan ev sahibliyi edəcəyi növbəti beynəlxalq tədbirdə də öz yeni təşəbbüslərini irəli sürəcək və onun gerçəkləşməsinə nail olacaq"
Azərbaycanın paytaxtı Bakı şəhəri BMT-nin İqlim Dəyişmələri üzrə Çərçivə Konvensiyasına Tərəf Dövlətlərin 29-cu Konfransına (COP29) ev sahibliyi edəcək. Azərbaycanın 2024-cü ildə COP29-a ev sahibliyi etməsini Şərqi Avropa regional qrupu dekabrın 9-da müəyyənləşdirib.
Məlum olduğu kimi, 2024-cü il COP29-a ev sahibliyi etmək növbəsi Şərqi Avropa regional qrupuna düşüb, sözügedən qrupa daxil olan ölkəmiz konfransın Azərbaycanda keçirilməsini təklif edib. Azərbaycanla yanaşı, Ermənistan və Bolqarıstan da öz namizədliklərini irəli sürüblər. Bildiyimiz kimi, 2023-cü il dekabrın 7-də Azərbaycan Prezidentinin Administrasiyası və Ermənistan Baş nazirinin Aparatı arasında aparılmış birbaşa danışıqların nəticəsi olaraq verilmiş birgə bəyanatda Ermənistan Azərbaycanın xeyrinə öz namizədliyini geri çəkib. Bundan sonra Bolqarıstan da öz namizədliyini geri götürüb.
Ekspertlər hesab edirlər ki, Ermənistan jest etməsəydi belə, Azərbaycan yenə də COP 29-a ev sahibliyi edəcəkdi.
COP 29 Azərbaycanda keçiriləcək. Bu, BMT TŞ üzvü seçiləndən, Qoşulmama hərəkatına 4 il sədrlikdən sonra Azərbaycanın 3- cü qlobal siyasi qələbəsidir. Azərbaycan burada hansı tarixi təşəbbüslərlə çıxış edə bilər?
"Azərbaycanın beynəlxalq aləmdə üçüncü siyasi qələbəsi..."
Siyasi və Hüquqi Strateji Araşdırmalar Mərkəzinin rəhbəri, politoloq Xəyal Bəşirov "Bakı-Xəbər"ə bildirdi ki, COP mövzusu gündəmi zəbt etməkdədir. "Dünya İqlim Fəaliyyəti Sammiti bir müddət əvvəl Birləşmiş Ərəb Əmirliklərində keçirildi. Prezident İlham Əliyev də COP 28-də iştirak etdi. Ümumiyyətlə, beynəlxalq aləmdə Azərbaycanın nüfuzunun çox böyük sürətlə artığı hazırkı dönəmdə ölkəmizin bir sıra mötəbər tədbirlərə dəvət edilməsi prosesinin şahidi ouruq. Hətta bəzən Azərbaycanın özünün belə olmadığı təşkilatların tədbirlərinə Prezident İlham Əliyev fəxri qonaq qismində dəvət edilir. Bu da, təbii ki, Azərbaycan dövlətinin İkinci Qarabağ müharibəsindəki qələbəsi, eyni zamanda siyasi və diplomatik sahədəki uğurları ilə daha çox bağlıdır. Sözsüz ki, bu prosesi daha da sürətləndirir. Prezident İlham Əliyev hakimiyyətdə gəldiyi dönəmdən indiyə kimi beynəlxalq münasibətlər baxımından Azərbaycanın uğurlarını, inkişafını təmin edəcək siyasət yürüdüb ki, bu daxili siyasətlə paralel olaraq həyata keçirilən uğurlu siyasətdir. Düşünürəm ki, İkinci Qarabağ müharibəsində əldə etdiyimiz uğurlar, ondan sonra baş verən müsbət proseslər bir sıra dövlətlərin və beynəlxalq təşkilatların diqqətinə çatdırdı ki, əslində Azərbaycan həqiqətən də düzgün yoldadır, doğru xarici siyasət, diplomatiya yürütdüyünə görə bu inkişafı, bu uğurları əldə edib"-deyə X.Bəşirov bildirdi.
X.Bəşirovun bildirdiyinə görə, Azərbaycanın 2011-ci ildə BMT Təhlükəsizlik Şurasının qeyri-daimi üzvü seçilməsi, 2011-ci ildə Qoşulmama Hərəkatına üzv olduqdan sonra bir neçə il dünyanın ikinci ən böyük təşklatı olan bu quruma sədrlik etməsi göstərdi ki, ölkəmizin bütün fəaliyyətində ümumbəşəri addımlar, təşəbbüslər var. "Azərbaycan Qoşulmama Hərəkatına sədrlik etdiyi dövrdə qlobal səviyyədə bir sıra müsbət təşəbbüslər ortaya qoydu və həmin təşəbbüslərin həyata keçməsinə nail oldu. Bütün bu proseslər onu göstərir ki, Azərbaycan özünün yürütdüyü siyasətdə beynəlxalq təşkilatlarla, ayrı-ayrı dövlətlərlə bərabərhüquqlu dövlətlərlə münasibət qurmaqda maraqlıdır. Yəni biz bunu təkcə sözdə demirik, eyni zamanda əməlimizdə, işimizdə, fəaliyyətimizdə göstəririk. Elə pandemiya ilə mübarizə çərçivəsində Qoşulmama Hərəkatının yüksək tribunasından istifadə edib BMT Baş Assambleyasının Dövlət və Hökumət başçılarının xüsusi sessiyasının çağırılmasına nail olmaq tarixdə çox nadir hallarda baş tutan tədbirlərdən biridir ki, Azərbaycan bu təşəbbüsü həyata keçirdi. Təbii ki, bu cür tədbirlərin davamı gəlir. Azərbaycanın beynəlxalq aləmdə üçüncü siyasi qələbəsi COP29 iclasına ev sahibliyi etməsi olacaq. Bütün bu tədbir dünyanın diqqətini ölkəmizə yönəldəcək. Fikrimcə, Azərbaycan ev sahibliyi edəcəyi növbəti beynəlxalq tədbirdə də öz yeni təşəbbüslərini irəli sürəcək və onun gerçəkləşməsinə nail olacaq. Əlbəttə, inanırıq ki, növbəti təşəbbüs də tarixi hadisə kimi yadda qalacaq. Bu təşəbbüslərin ortaya qoyulması sadəcə sözdə, fikirdə və bəyanatlarda deyil, həm də onun arxasında böyük iş dayanır. Həmişə biz bunu göstərmişik. Düşünürəm ki, belə mötəbər tədbirlərə ev sahibliyi etmək, daha sonra o tədbirlərin iştirakçısına çevrilmək, orada ortaya qoyulan təşəbbüslərin həyata keçməsinə nail olmaq əslində Azərbaycanın İkinci Qarabağ müharibəsindən sonra qələbəsinin regionda formalaşdırdığı yeni reallıqların və dünyanın tərkib hissəsi kimi bu reallıqların diqtə edilərək təsdiq edilməsi baxımdan da çox önəmlidir. Hesab edirəm ki, bu kimi beynəlxalq uğurlarımız əslində Azərbaycanın bütün istiqamətlərdə yürütdüyü siyasətin beynəlxalq aləmdə qəbul edilməsi və tədiqlənməsi baxımından bizim üçün ən ciddi əhəmiyyətli proseslərdən biridir"-deyə X.Bəşirov qeyd etdi.
İradə SARIYEVA
