"ABŞ səfirliyi Azərbaycanı 1991-ci ildə müstəqillik əldə etdikdən sonra dəstəkləyib və son 32 il ərzində heyrətamiz dəyişikliklərin şahidi olub". Bunu ABŞ-ın Azərbaycanda yeni fəaliyyətə başlayan səfiri Mark Libbi videomüraciətində deyib.
Səfir müraciətini Azərbaycan dilində edib. "Ümid edirəm ki, burada olduğum müddətdə biz bu regionda davamlı və ləyaqətli sülh üçün birlikdə çalışacağıq. Azərbaycanın daha da inkişaf etdiyini, regionda və dünyada mühüm rol oynamağa davam etdiyini görəcəyik", - deyə səfir bildirib.
Səfir deyib ki, qısa müddət ərzində Bakını gəzib və onun əzəmətli yerlərini görmək şansını əldə edib.
Diplomat Azərbaycan mətbəxinin ləzzətli plovunu və dolmasını dadıb.
"Mən bu yerləri daha yaxından tanımağa, Azərbaycanda daha çox yer görməyə və dad dadmağa ümid edirəm. Azərbaycanı daha yaxından tanımaq üçün təkliflərinizi gözləyirəm", - o deyib.
ABŞ-ın ölkəmizdəki səfiri Mark Libbiyə təklifiniz nə olardı?
Bu sualla QHT və media təmsilçilərinə, elm adamına, kulinariya mütəxəssisinə müraciət etdik.
Tahir Əmiraslanov: "ABŞ səfiri Azərbaycanın mətbəx mədəniyyəti ilə geniş şəkildə tanış olmaq, yeni dadlar dadmaq istəyirsə..."
Tarix üzrə fəlsəfə doktoru, Əməkdar Mədəniyyət İşçisi Tahir Əmiraslanovun səfir Libbiyə təklifi belə oldu: "ABŞ səfiri Azərbaycanın mətbəx mədəniyyəti ilə geniş şəkildə tanış olmaq, yeni dadlar dadmaq istəyirsə, "Xanədan Etno" restoranına öncədən sifarişini versin, gəlib burada Azərbaycan yeməklərilə tanış olsun. Xanədan restoranında 8 bölgənin yeməkləri təqdim edilir. Bunlar 8 xanlığa məxsus tarixi yeməklərdir. Orada təkcə yeməklərin, bişmişlərin dadına baxmayacaq, eyni zamanda həmin yeməklərin tarixi barədə səfirə məlumat veriləcək. Bu restoranda təklif edilən yeməklər bərpa olunmuş tarixi yeməklərdir. Orada xanlıqların tarixi, xanlıqlar dövrünə aid xalçalar, xanların arvadlarının geyimləri və sair də təqdim edilir. Səfir Libbi o restoranda Azərbaycan etnoqrafiyası ilə Azərbaycan mətbəxini eyni anda görə biləcək".
Yadigar Məmmədli: "...Libbi mütərəqqi, konkret mövqe tutsun..."
Tanınmış media eksperti Yadigar Məmmədli "Bakı-Xəbər"ə bildirdi ki, ABŞ-ın ölkəmizə təyin etdiyi səfir Libbini media cameəsi də maraqla izləyir. "Mark Libbinin çox maraqlı açıqlamaları var. Maraqlı məqamlardan biri də onun Azərbaycan dilində müraciət etməsidir. Bu ilk deyil. Ümumiyyətlə, Amerikanın belə bir siyasəti var: təyin ediləcək şəxslər hər hansı bir ölkəyə səfir getməmişdən əvvəl həmin ölkənin dilini müəyyən səviyyədə öyrənirlər. Dili ən azından məişət səviyyəsində bilirlər. Bu həm də bir psixoloji məqamdır ki, öz dilində müraciət eşidəndə müraciət edənə inam yaranır. Bunlar siyasi addımlardır. O ki qaldı onun Azərbaycanı yaxından tanımaq istəyini dilə gətirməsinə, yeni təkliflər gözləməsinə, bu, siyasətçinin sözləridir, bu sahədə fəaliyyət göstərən şəxsin siyasi addımlarıdır. O, Azərbaycanı yaxşı tanıyır, dilini öyrənib, Azərbaycan məsələlərini, regiondakı vəziyyəti, Azərbaycan həqiqətlərini bəlkə də bir çoxlarından yaxşı bilir. Hətta incə məqamları da bilməmiş deyil".
Y.Məmmədli hesab edir ki, səfir doğrudan da Azərbaycanın problemləri ilə yaxından maraqlanmaq, hər hansısa işdə köməklik göstərmək istəyirsə, 2020-ci ildən, yəni Vətən müharibəsindən sonra ölkəmizin yaratdığı və nəinki Azərbaycanı, bütövlükdə Cənubi Qafqazı inkişafa aparan reallıqları dəstəkləməli, həqiqətin yanında yer almalıdır. "O, həqiqətin yanında olardı"-deyə Y.Məmmədli vurğuladı. Y.Məmmədli qeyd etdi ki, ABŞ super gücdür və ona uyğun hərəkət etməlidir. "Təbii ki, Amerikanın burada maraqları var və o maraqların təmin olunması ilə bağlı fəaliyyəti olmalıdır. Amma hər halda o, Azərbaycan reallığına uyğun hərəkət etməlidir. Azərbaycan reallığı budur ki, 30 ilə yaxın bir müddətdə BMT-nin, ATƏT-in missiyasının görmədiyi işləri həyata keçirdi, beynəlxalq hüquqa söykənən fəaliyyət göstərdi və işğalda olan torpaqları azad etdi. Bu gün də Azərbaycanın regionun inkişafı ilə bağlı təklifləri var. Orada Libbi mütərəqqi, konkret mövqe tutsun və daha çox real olsun. Onda, fikrimcə, ABŞ-Azərbaycan münasibətləri də zamana uyğun bəzən ziqzaqlı yollarla yox, düz və və inkişaf edən xətlə irəliləyər, dayanıqlı olar"-deyə Y.Məmmədli qeyd etdi.
Elyar İslamoğlu: "Səfir Azərbaycan yallıları ilə tanış olsun və görsün bizim necə unikal rəqslərimiz var"
Filologiya üzrə fəlsəfə doktoru, dosent Elyar İslamoğlu "Bakı-Xəbər"ə "təklif edərdim ki, səfir Libbi Azərbaycan tarixi haqda məlumatlar əldə etsin. O bunu həm tarix kitablarından, həm bədii əsərlərdən və bədii filmlərdən öyrənə bilər. O, bizim başımıza gətirilən faciələr, soyqırımlar barədə də öyrənməlidir, bilməlidir ki, bu qədər zülmün qarşısında əyilməməişik, sınmamışıq, qürurumuzu qoruyub saxlamışıq. Bizim mətbəximizlə və milli geyimlərimizlə bağlı məlumatlar toplasın. Çünki Azərbaycan mətbəxi dünyanın ən zəngin mətbəxidir. Geyimlərimiz də öz gözəlliyi ilə seçilir. Səfir Azərbaycan yallıları ilə tanış olsun və görsün bizim necə unikal rəqslərimiz var. Azərbaycanın tarixi abidələrini ziyarət etsin, turistik bölgələrə baş çəksin, bu halda Azərbaycan tarixi və Azərbaycan xalqı haqda daha ətraflı məlumat əldə edə biləcək. Bakıda isə ilk növbədə ziyarət etməli yer Şəhidlər Xiyabanı və Hərbi Qənimətlər Parkı olmalıdır. Şəhidlər Xiyabanı bizim qəhrəmanlarımızın uyuduğu məkandır, orada canını Vətən yolunda qurban verənlərin məzarını görəcək, Hərbi Qənimətlər Parkında isə Azərbaycana uzanan əllərin necə kəsildiyinin, işğalçı ordunun silah-sursatının orada olduğunun şahidi olacaq. Təbii, səfirə təklif edərdim ki, imkanı olanda 30 il blokada şəraitində qalan Naxçıvana gəlsin və naxçıvanlıların blokada şəraitində necə yaşadıqlarını görsün. Bizim orada da çox zəngin tarixi abidələrimiz, mineral sullarımız var, Naxçıvan mətbəxi də zəngindir. Deyim ki, Naxçıvan həm də üç ölkə ilə həmsərhədir. Naxçıvanı ziyarət etmək də cənab səfir üçün faydalı və maraqlı olardı "-deyə bildirdi.
Samir Adıgözəlli: "Təklif edərdim ki, cənab Libbi Əshabi-Kəhfə getsin"
İSBAM sədri Samir Adıgözəlli "Bakı-Xəbər"ə bildirdi ki, səfirin Azərbaycan dilində təklif gözlədiyini deməsi xoş haldır. "Təklif edərdim ki, cənab Libbi Əshabi-Kəhfə getsin. Bu ziyarətgahın dünyanın ən qədim inanc ocağı olduğunu və insanlığın burada yaratdığı mədəniyyəti müşahidə etsin, görsün ki, Azərbaycan dünyanın ən qədim inanc ocaqlarına sahib bir ölkədir. Ölkəmizin multikultural, tolerant dəyərlərə sahib olduğunu yaxından müşahidə etmək üçün bölgələrə səfər edə bilər. Bir təklifim də var ki, cənab səfir bu gün İran adlanan ölkədə molla rejimi tərəfindən milli-mədəni haqları tapdanan, səsi boğulan, həbs olunan, edam edilən Cənubi azərbaycanlı soydaşlarımızın, azərbaycanlıların harayını öz ölkəsində ən yüksək səviyyədə qaldırmağa çalışsın. 40 milyon soydaşımızın haqqı tapdanır, amma ABŞ başda olmaqla dünya dövlətləri susur. Soydaşlarımızın tapdanan haqlarının müdafiəsinə dəstək olsunlar"-deyə S.Adıgözəlli qeyd etdi.
İradə SARIYEVA
