Elxan Şıxəliyev: "Demək istəyirlər ki, Rusiya onlara qarşı hətta Ermənistanın öz daxilində belə istədiyini edir"
Ermənistanda Rusiya hərbi polisi döyüşməkdən imtina edən rusiyalını saxlayıb. Hüquq müdafiəçiləri onun "Ermənistanın qanuni himayəsi altına" qaytarılmasını tələb ediblər.
Rusiya hərbi polisinin əməkdaşları Rusiya vətəndaşı Dmitri Setrakovu Ermənistanda saxlayaraq Gümrü şəhərindəki Rusiya hərbi bazasının ərazisinə aparıblar. Helsinki Vətəndaş Assambleyası - Vanadzor hüquq müdafiə təşkilatının məlumatına görə, Rusiyada Setrakova qarşı hərbi bölməsini icazəsiz tərk etdiyinə görə cinayət işi açılıb.
Təşkilatın rəhbəri Artur Sakunts "Azadlıq" radiosunun erməni xidməti ilə söhbətində Setrakovun Rusiyada müqaviləli hərbçi olduğunu, lakin Rusiya Federasiyasının Ukraynanı genişmiqyaslı işğalından sonra Ermənistana köçdüyünü bildirib. Sakunts onun saxlanmasını rus hüquq müdafiəçilərindən öyrənib, rusiyalının həyat yoldaşı onlarla əlaqə saxlayıb.
Gümrüdəki Rusiya hərbi bazasında Sakuntsun onu saxladığı təsdiqlənib və Setrakovun həbsdə olduğu bildirilib. Rusiyalının hansı əsasla həbs edildiyini soruşduqda, hüquq müdafiəçisinə "bu, Rusiya prezidenti Vladimir Putinin bütün belə inkarçıları həbs etmək əmridir" deyib. "Məhkəmə onu təqsirli bilsə, cəzasını harada çəkəcəyini soruşduqda mənə dedilər ki, bu, Rusiya Federasiyasında olacaq", - Sakunts əlavə edib. O vurğulayıb ki, Rusiya hərbi polisinin Ermənistanda hətta Rusiya vətəndaşlarını da saxlamağa ixtiyarı yoxdur, bunu yalnız Ermənistanın hüquq-mühafizə orqanları edə bilər (Rusiya tərəfi axtarışda olan vətəndaşın axtarışı üçün onlarla əlaqə saxlamalıdır). Hüquq müdafiəçisi Rusiya hərbi polisinin hərəkətlərini "Ermənistanın hüquq sisteminə, suveren dövlət kimi Ermənistana hücum" adlandırıb.
"Helsinki Vətəndaş Assambleyası - Vanadzor" Ermənistan hakimiyyətindən "Dmitri Leonidoviç Setrakovun Ermənistan Respublikasının hüquqi müdafiəsi altına qaytarılması üçün bütün lazımi səyləri göstərməyi" tələb edib.
Bu, hüquqi qalmaqalın sonu nə ilə nəticələnə bilər?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki,
Rusiya Ukrayna müharibəsi fonunda belə hadisələr çox olur: "Rusiyanın özünün vətəndaşları da müharibəyə görə oranı tərk edib. Orduda müqaviləli xidmət edən və başqa ölkələrin vətəndaşı olub , sonra Rusiya vətəndaşlığını qəbul edənlər də fərarilik edirlər. Strakov da belələrindən biridir. Kontraktla qulluq edibsə, onu Rusiya məsiliyyətə cəlb etməlidir. Ermənilər bilməlidir ki, onların ölkəsinə daxil olan bütün xarici ölkə vətəndaşlarını ilk yoxlayan məhz Rusiya hərbçiləri olur. Dolayısı ilə fərarilik etmiş bütün vətəndaşların məlumatları da Rusiya sərhədçilərinə ötürülür. Keçmiş Ermənistan vətəndaşı olsa da, onun Rusiya qarşısında öhdəliyi olub. Hərbi polis Rusiya Sərhəd Xidməti ilə məlumat mübadiləsi edir. Belə adamla bağlı qərarı da Rusiya verməlidir. Ermənilərin qaldırdıqları hay-küy əsaslı deyil. Onların müvafiq müqaviləsi olmasa, Ermənistanın sərhədlərinə nəzarəti təmin edə bilməzlər. Bu prosedur əvvəl də belə aparılıb. Ermənistan hüquq müdafiəçilərinin bu etirazı nəyisə dəyişmək gücündə deyil. Onların hava limanı və digər gömrüklərində Rusiya sərhədçiləri ilə yanaşı, hərbi polis də fəaliyyət göstərir ki, xidmətdən yayınıb, qaçmaq istəyənləri müəyyənləşdirə bilsin. Strekova qarşı atılan addım həm də görk olaraq atılır ki, bu statusda olan adamlar məsuliyyətlərini dərk etsinlər. Harda tutulmasında daha çox, burada hərbi xidmətdən yayınmaqla bağlı olan cinayət əməlinə verilən hüquqi qiymətdən söhbət gedir. Ermənilər Rusiyaya qarşı olan dalğada bu detaldan da öz xeyrinə istifadə etməyə çalışır. Demək istəyirlər ki, Rusiya onlara qarşı hətta Ermənistanın öz daxilində belə istədiyini edir".
Məhəmmədəli QƏRİBLİ
