Ramil Məmmədli: "Yaxşı olar ki, Ermənistan özü bu barədə yaxşı düşünsün və sülh sazişi istiqamətində konstruktiv addımlar atsın"
Ermənistan Azərbaycanla sülh müqaviləsini o zaman imzalayacaq ki, bunun Ermənistanın maraqlarına, regional sülh və sabitliyə uyğunluğuna əmin olacaq. Ərazi bütövlüyünün tanınması prinsipi çox mühümdür və Azərbaycanın bu prinsipə sadiqliyini bir daha təsdiqləməsini təkid edirik.
Bu sözləri Ermənistan parlamentinin Xarici Əlaqələr Komissiyasının sədri, "Mülki müqavilə" fraksiyasından deputat Sərkis Xandanyan jurnalistlərə açıqlamasında deyib:
"Əgər Azərbaycan danışıqlar zamanı dağıdıcılığını davam etdirərsə, Ermənistan beynəlxalq tərəfdaşları və danışıqlarda vasitəçilik etmək istəyi və məsuliyyətini ifadə edən tərəfləri Azərbaycana təzyiqləri artırmağa çağıracaq".
Bu, Azərbaycana ünvanlanan açıq şantaj deyilmi?
Hərbi-siyasi şərhçi Ramil Məmmədli "Bakı-Xəbər"ə açıqlamasında bildirdi ki, Azərbaycan sülh danışıqları ilə bağlı kifayət qədər konstruktivlik ortaya qoyur: "Dağıdıcılığı edən Ermənistandır. Müxtəlif bəhanələrlə prosesdən yayınır. Belə deputatların mövqeyi təsadüfən ortaya çıxmır. Onlar nəbzi yoxlayırlar. Azərbaycana öz havadarlarının adı ilə hədə gəlirlər. Bizə onsuz da təzyiqlər göstərilir, amma ölkə olaraq buna alışmışıq. Yaxşı olardı ki, Paşinyan bu deptatların ağzını yumsun. Azərbaycana təzyiqlə nəyisə qəbul etdirmək mümkün deyil. Yaxşı olar ki, Ermənistanın özü konstruktivlik nümayiş etdirsin. Ermənistanla Azərbaycan arasında sülh müqaviləsinin imzalanması son vaxtlar beynəlxalq müstəvidə müzakirə olunan əsas məsələlərdəndir.
Türkiyə, ABŞ, Rusiya, İran və digər beynəlxalq oyunçular intensiv olaraq bu məsələ barədə öz mövqelərini ortaya qoyurlar. Ermənistan baş naziri Nikol Paşinyan və onun komandası da sülhlə bağlı qulağa xoş gələn açıqlamalar verir.
Son aylaradək sülh müqaviləsinə mane olan əsas məsələlərdən biri məhz Qarabağdakı separatçı rejim idi. Çünki terrorçular müntəzəm olaraq təxribat törətməklə qarşılıqlı etimad mühitinin yaranmasına əngəl törədirdilər.
Azərbaycan Ordusunun bir sutka ərzində həyata keçirdiyi lokal antiterror tədbirləri nəticəsində xunta təslim oldu. Bu, sülh perspektivi ehtimalını xeyli artırdı. Məhz rəsmi Bakının səyləri nəticəsində əsas baryerlərdən biri aradan qaldırıldı. Yaxşı olar ki, Ermənistan özü bu barədə yaxşı düşünsün və sülh sazişi istiqamətində konstruktiv addımlar atsın".
Məhəmmədəli QƏRİBLİ
