Tural İsmayılov: "Avroittifaq tərəflər arasında görüş keçirmək istəyirsə, bunu daha yaxşı təşkil etməlidir"
Prezident İlham Əliyev ADA Universitetində keçirilən "Qarabağ: 30 ildən sonra evə dönüş. Nailiyyətlər və çətinliklər" Forumunda dedi ki, Avropa İttifaqı vasitəçiliyi ilə keçiriləcək görüş nəticəyönümlü olmalıdır:
"Biz indi mümkün yeni görüşü müzakirə edirik. Mənim köməkçim Hikmət Hacıyev Şarl Mişelin komandası ilə daimi əlaqədədir. Artıq 5-dən çox görüş keçirmişik. Növbəti görüşümüz isə nəticəyönümlü olmalıdır. Biz əvvəlcədən bəyanat layihəsini razılaşdırmalıyıq. Bu, Azərbaycan, Ermənistan və Avropa İttifaqı arasında razılaşdırılmalıdır. Bu görüş yaxşı hazırlanmalı və nəticəyönümlü olmalıdır. Çünki nəticəyönümlü olmasa, həm xalqlarımıza, həm də beynəlxalq aləmə yanlış mesaj vermiş olarıq".
Bununla əslində dövlət başçısı demək istədi ki, Avroittifaq tərəflər arasında vasitəçi olmaq istəyirsə bu şərti mütləq nəzərə almalıdır.
Sözügedən məsələni baki-xeber.com-a şərh edən politoloq Tural İsmayılov da hesab edir ki, Avropa İttifaqı bu amili nəzərə almalıdır: "Əvvəla, cənab Prezidentin ADA Universitetində səsləndirdiyi fikirlər vacib əhəmiyyət kəsb edir. Çünki bu günə qədər Brüsselin vasitəçiliyi ilə 5 görüş keçirilib. Ancaq Brüssel bu günə qədər keçirilən görüşlərdən sonra real məntiqi nəticənin əldə olunması üçün praktiki olaraq Ermənistana təzyiqlər etməyib. Bəli, Avropa İttifaqı Şurasının prezidenti Şarl Mişelin moderatorluğu altında keçirilən görüşlərdə müsbət və nəticə yönümlü proseslər də baş verib. Ancaq bütövlükdə, Azərbaycan-Ermənistan münasibətlərində nəticəyə yönəlik böyük dəyişikliklər baş verməyib. Bunun da səbəbi onunla əlaqədardır ki, Avropa İttifaqı əlində olan təsir rıçaqlarından Ermənistana qarşı istifadə etmir. Ona görə də məhz Avropa İttifaqı Şurasının bu məsələdə praktiki həll imkanlarından istifadə etməməsi və həmçinin Ermənistanın üzərinə getməməsi üzündən, Brüssel görüşləri böyük müsbət dəyişikliklər yaratmır. Eyni zamanda Brüssel görüşlərinin praktiki olaraq Azərbaycan-Ermənistan arasında münasibətlərdə nəticəyə yönəlik həll imkanlarına təkan vermədiyini görmüşük. Ona görə də bundan sonra Avroittifaq tərəflər arasında görüş keçirmək istəyirsə, bunu daha yaxşı təşkil etməlidir. Konkret olaraq sülh müqaviləsinin imzalanması və yaxud da ilkin sülh sənədi üçün əlindən gələn bütün imkanlardan istifadə etməlidir. Belə olacağı təqdirdə Avropa İttifaqı Şurasının moderatorluğu altında keçirilən görüşlərin perspektivi və əhəmiyyəti olacaq. Əks təqdirdə isə Brüssel görüşlərinin mahiyyəti də qalmayacaq və lazımsız olacaq".
Vidadi ORDAHALLI
