Emin Həsənli: "Onun dövlət halında fəaliyyət göstərməsi Azərbaycan və Türkiyədən asılıdır"
Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı birgə açıqlama yayıb.
Açıqlamada bildirilir: "Azərbaycan Respublikası və Ermənistan Respublikası regionda çoxdan gözlənilən sülhün əldə olunması üçün tarixi fürsətin yarandığı fikrini bölüşür. İki ölkə münasibətləri normallaşdırmaq, suverenlik və ərazi bütövlüyü prinsiplərinə hörmət əsasında sülh sazişinə nail olmaq niyyətini bir daha təsdiq edir. Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqlar nəticəsində iki ölkə arasında etimad quruculuğu istiqamətində ciddi addımların atılmasına dair razılıq əldə olunub.Humanizm dəyərlərini rəhbər tutaraq və xoşməramlı addım olaraq, Azərbaycan Respublikası 32 erməni hərbçini azad edir. Ermənistan Respublikası öz növbəsində humanizm dəyərlərini rəhbər tutaraq və xoşməramlı addım olaraq, 2 azərbaycanlı hərbçini azad edir".
Bu addım iki ölkə arasındakı gələcək münasibətlərə və sülh sazişinin imzalanmasına necə təsir edəcək?
Hərbi-siyasi ekspert Emin Həsənli "Bakı-Xəbər"ə açıqlamasında bildirdi ki, Azərbaycan dəfələrlə bu proseslərdə humanist addım atıb: "Ancaq Ermənistan buna qarşılıq verməyib, əvəzində isə xəyanətkar addımlarını davam etdirib. Azərbaycan xalqı həqlı olaraq ermənilərə inanmır. Onlar bu bölgəyə köçürülüb gələndən sonra xəyanətkar fəaliyyətlərini davam etdiriblər. 1905/07 - ci illərdə, 1918 - ci il hadisələrində, Çar Rusiyası dönəmində, Azərbaycan Xalq Cümhuriyyəti zamanında baş verən qeyd edə biləcəyimiz bu kimi faktlar çox olub. Münaqişə başlayandan sonra da ermənilərin başına dəfələrlə dəmir yumruq dəydi və onlar artıq vəziyyətin fərqinə varmağa başladılar. Azərbaycan əvvəlki Azərbaycan deyil, milli maraqlarından geri dönməyəcək. Bu bir balaca ümid yaradır. Ancaq tam inanmaq olmaz. Azərbaycan dövləti bölgədəki oyunçuların missiyasını, hər şeyi gözəl bilir. O ki qaldı iki əsgərə qarşı 32 nəfəri verməyə, bir Azərbaycan əsgəri bütün Ermənistan ordusundan dəyərlidir. Ramil Səfərovun azad edilməsi, Mübariz İbrahimovun nəşinin alınması, əsirlərimizin daima geri alınması və bu son hadisə də onu göstərir ki, Azərbaycan dövləti vətəndaşlarına nə qədər qiymət verir. Bu da orduda xidmət edən gənclərimiz, hərbiçilərimiz üçün çox önəmlidir. Onlar bilir ki, bütün hallarda olduğu kimi, son məsələdə də Azərbaycan dövləti necə əlindən gələni etdi. Bu, dövlətə, orduya güvəndir, mühüm bir psixoloji məsələdir. Danışıqlarda isə Ermənistan üçün artıq son şansdır. Ermənistan bunu dəyərləndirməlidir. Dəyənləndirməsə, daha böyük itkilərlə üz-üzə qalacaq. Azərbaycan Ermənistanla münasibət qurmadıqca, sülh müqaviləsi imzalanmadıqca Ermənistan ərazisi çıxarışsız, "kupçasız" bir torpaq kimidir. Yəni onun dövlət halında fəaliyyət göstərməsi Azərbaycan və Türkiyədən asılıdır. Ermənistan bu məsələni nəzərə almalıdır və onun ən zəif cəhəti də odur ki, o hər zaman kimdənsə asılı olub. Asılılıq olmadan onlar yaşaya bilmirlər. Əgər elə yaşaya bilmirlərsə, Azərbaycanla da, Türkiyə ilə də normal münasibət qurub kiçik bir dövlət kimi yaşaya bilərlər. Yox, əgər başqa addımlar atacaqlarsa, öz məhvlərini gətirəcəklər".
Məhəmmədəli QƏRİBLİ
