Mirkazım Seyidov: "Onlar çalışırlar ki, Bayden administrasiyası ilə Əliyev hökuməti arasında anlaşma olmasın"
ABŞ Konqresində Azərbaycan əleyhinə çıxış edən Dövlət katibinin Avropa və Avrasiya məsələləri üzrə köməkçisi Ceyms O`Braynın Azərbaycana səfəri zamanı nələr söyləyəcəyi səbrsizliklə gözlənilirdi. Çünki Ceyms O`Brayn Konqresdəki çıxışı ilə ABŞ-ın təhlükəsizlik maraqlarına zərbə vurmuşdu.
Ceyms O`Brayn Bakıda Konqresdəki sözlərindən imtina etdi. Amerikalı diplomat ABŞ ilə Azərbaycan arasında əlaqələrin dərin köklərə malik olduğunu və ölkələrimizin yaxşı tərəfdaş olduqlarını vurğuladı.
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki, O`Braynın buraxdığı səhv sadə deyildi və iki dövlət arasında münasibətlərin gərginləşməsinə səbəb oldu: "Təsadüfi deyil ki, dövlət katibi Entoni Blinken Bakıya zəng edərək Prezident İlham Əliyevin Ceyms O`Braynın Bakıda qəbulunu xahiş etdi. Görüşdən əvvəl Vaşinqtondan münasibətləri yumşaldacaq daha bir açıqlama gəldi. Dövlət Departamentinin mətbuat katibi Metyu Miller "biz heç vaxt deməmişik ki, Azərbaycanla əlaqələrimizi davam etdirmək fikrində deyilik. Bu, bizim maraqlarımıza zidd olardı" açıqlamasını səsləndirdi. Gözlənildiyi kimi, Bakıda Ceyms O`Braynla İlham Əliyev arasındakı görüşdə münasibətlərdəki müsbət məqamlar önə çəkildi.
Amerikalı diplomat ABŞ ilə Azərbaycan arasında əlaqələrin dərin köklərə malik olduğunu və ölkələrimizin yaxşı tərəfdaş olduqlarını vurğuladı. Sülh müqaviləsi üzrə danışıqları dəstəklədiyini deyən Ceyms O`Brayn danışıqların Vaşinqtonda davam etdirilməsi üçün ABŞ-ın hazır olduğunu İlham Əliyevin diqqətinə çatdırdı. O, bundan başqa, Transxəzər nəqliyyat dəhlizi konsepsiyasının inkişafı, həmçinin Ermənistanla Azərbaycan arasında kommunikasiyaların açılması üzrə müzakirələrin davam etdirilməsinin ABŞ tərəfindən dəstəkləndiyi vurğuladı.
Bununla da O`Brayn Konqresdəki sözlərindən imtina etmiş oldu.
Göründüyü kimi, Ağ Evdən verilən yeni mesajlar artıq tamamilə fərqli məzmun daşıyır. Üstəlik, ABŞ Azərbaycana qarşı buraxılan kobud diplomatik səhvə haqq qazandırmağa da xüsusi həvəs göstərmir. Əksinə, Ağ Ev sadəcə, rəsmi Bakı ilə məlum böhranın ümumiyyətlə yaşanmadığı kimi davranmağa üstünlük verir. Azərbaycanın adekvat reaksiyası qarşısında geri çəkilmiş olub. Adətən belə davranışlara Ağ Evin xarici siyasət kursunda çox nadir hallarda təsadüf edilir. ABŞ dövlət katibi Entoni Blinken Prezident İlham Əliyevlə telefon danışığında rəsmi Bakının bütün şərtlərini qəbul etdiyini demişdi. Bundan sonra gözləmək olardı ki, münasibətlər sürətlə düzələcək. Lakin bu təmasdan sonra da Vaşinqtonla Bakı arasında gərginlik qalır. Əksər ekspertlər iddia edirlər ki, Birləşmiş Ştatlarla Azərbaycanın münasibətlərinin gərgin qalmasında maraqlı olan qüvvələr var. Bildirilir ki, bu qüvvələr ABŞ-da erməni lobbisindən maliyyələşən şəxslərdir. Onlar çalışırlar ki, Bayden administrasiyası ilə Əliyev hökuməti arasında anlaşma olmasın. Ancaq görünür, ABŞ Bakı ilə barışmağı daha məqsədəuyğun sayır".
Məhəmmədəli QƏRİBLİ
